ޗެމްޕިއަންސް ލީގުގެ ގްރޫޕް ސްޓޭޖްގެ ފުރަތަމަ މެޗުގައި ޔުވެންޓަސް އާއި ބޮރޫސިއާ ޑޯޓްމަންޑް ދެމެދު ކުޅުނު މެޗް ވަރަށް ފޯރިގަދަ ކުޅުމަކަށްފަހު 4-4 އިން އެއްވަރުވެއްޖެއެވެ.

ޔުވެންޓަސްގެ ޓިއުރިންގައި ކުޅުނު މި މެޗުގެ ފުރަތަމަ ހާފް ނިމުނީ ލަނޑެއް ނުޖެހި ކަމުގައި ވީ ނަމަވެސް، ދެވަނަ ހާފްގައި ދެ ޓީމުން ޖުމްލަ 8 ލަނޑު ޖަހާފައިވެއެވެ.

މެޗުގެ 52 ވަނަ މިނެޓްގައި ޑޯޓްމަންޑްގެ ކަރިމް އަޑެއެމީ ވަނީ ފުރަތަމަ ލަނޑު ޖަހާފައެވެ. ނަމަވެސް ޔުވެންޓަސްގެ ތުރުކީ ފޯވާޑް ކެނަން ޔިލްޑިޒް ވަނީ ރީތި ފިނިޝިންއަކުން މެޗް އެއްވަރު ކޮށްފައެވެ. އޭގެ ކުޑައިރުކޮޅެއްގެ ފަހުން ފެލިކްސް ންމެޗާ ވަނީ ޑޯޓްމަންޑަށް ލީޑް ހޯދައިދިން ނަމަވެސް، ބަދަލު ކުޅުންތެރިއެއްގެ ގޮތުގައި ކުޅެން އަރައި ހަތަރު މިނެޓް ފަހުން ޑުސަން ވްލަހޯވިޗް ވަނީ ޔުވެންޓަސް އަށް މެޗު އަނެއްކާވެސް އެއްވަރުކޮށްދީފައެވެ.

މެޗުގައި ލަނޑުޖެހުމަށްފަހު ޔުވެންޓަސްގެ ވްލަހޯވިޗް އުފާފާޅުކުރަނީ -- ފޮޓޯ: ގެޓީ އިމޭޖެސް

މެޗުގެ ފަހު މިނެޓްތަކާ ހަމައަށް ދިޔައިރު، ޔަން ކޯޓޯ އަދި ރާމީ ބެންސެބައިނީގެ ޕެނަލްޓީ ލަނޑާއެކު ޑޯޓްމަންޑް ވަނީ 4-2 ގެ ލީޑެއް ނަގާފައެވެ. ނަމަވެސް އިތުރު ވަގުތުގައި ޔުވެންޓަސް ވަނީ ކަމްބެކެއް ހަދައި މެޗުން އެއް ޕޮއިންޓް ހޯދާފައެވެ.

އެގޮތުން މި ކަމްބެކްގައި ވްލަހޯވިޗް އޭނާގެ ދެވަނަ ލަނޑު ޖެހުމަށްފަހު، ލޮއިޑް ކެލީއަށް ނަގައިދިން ރީތި ހުރަހެއްގައި ވަނީ ބޮލުން ގޯލުޖަހަން ފުރުސަތު ފަހިކޮށްދީފައެވެ.

މި ނަތީއްޖާއާ އެކު ދެ ޓީމަށް ވެސް އެއް ޕޮއިންޓް ލިބުނުއިރު، ޔުވެންޓަސް އިން ދެން ނުކުންނާނީ ރޭ އިނގިރޭސި ކުލަބް، ޓޮޓްނަމް އަތުން އެއް ލަނޑުން ބަލިވި ސްޕެއިންގެ ވިލަރެއަލްއާ ދެކޮޅަށެވެ. އަދި ޑޯޓްމަންޑް އިން ނުކުންނާނީ ސްޕެއިންގެ އެތްލެޓިކޯ ބިލްބާއޯ އާއި ދެކޮޅަށެވެ.