ދިވެހި ޕްރިމިއާ ލީގު ފެށިތާ ދެ ދުވަސް ފަހުން، އެ ލީގުގެ ވެބްސައިޓު ހަދަން އެފްއޭއެމް އިން އިއުލާނުކޮށްފިއެވެ.

ގާތްގަޑަކަށް ދެ އަހަރުގެ މެދުކެނޑުމުކަށްފަހު ދިވެހި ޕްރިމިއާ ލީގުގެ މެޗުތައް މިދިޔަ ބުރާސްފަތި ދުވަހުގެ ރޭ ވަނީ ފަށާފައެވެ.

އެހެން ނަމަވެސް އެފްއޭއެމް އިން ރޭ ކުރި އިއުލާނުގައި ވަނީ، ދިވެހި ޕްރިމިއާ ލީގުގެ ވެބްސައިޓު ފަރުމާކޮށް ޑެވެލޮޕްކޮށްދޭނެ ފަރާތެއް ހޯދަން އިއުލާނުކޮށްފައެވެ. މި އިއުލާނުގައި ބުނާ ގޮތުން އެ ލީގުގެ މައުލޫމާތާއި، ޓީމުތަކާއި ކުޅުންތެރިންނާއި، މެޗުތަކުގެ މައުލޫމާތުގެ އިތުރުން ފޮޓޯ އަދި ވީޑިއޯ ހިމެނޭ ގޮތަށް ވެބްސައިޓް ފަރުމާކުރަން ބޭނުންވާ ކަމަށެވެ.

އެ އިއުލާނުގައި ބުނާ ގޮތުން ޕްރޮޕޯޒަލްތައް އިވެލުއޭޓްކުރާއިރު ބެލުމަށް ހަމަޖެހިފައިވާ މައިގަނޑު ކަންކަމުގެ ތެރޭގައި ތަޖުރިބާ އަދި ޕޯޓްފޯލިއޯ, ޓެކްނިކަލް ކެޕޭސިޓީ އަދި އީޖާދީ ވިސްނުން ހިމެނެއެވެ. އެ ބީލަމަށް ޕްރޮޕޯޒަލްތައް ހުށަހެޅުމުގެ އެންމެ ފަހުގެ މުއްދަތަކީ އަންނަ ހޮނިހިރު ދުވަހެވެ.

ދިވެހި ޕްރިމިއާ ލީގްގެ ރަސްމީ ވެބްސައިޓް ހެދުމަށް އެފްއޭއެމުން ހުޅުވާލިއިރު، ދިވެހި ފުޓްބޯޅައިގެ ހާލަތު އޮތީ ވަރަށް ދަށުގައިކަމަށް ގިނަ ބަޔަކު ފާހަގަކުރެއެވެ.