މާލެއިން މުދާ ބަރުކޮށްގެން ހއ އަތޮޅަށް ދަތުރުކުރަމުންދަނިކޮށް ދިއްދޫ މެގަ ހޯރަ ބޯޓު ފަރަކަށް އަރައިފިއެވެ.
ވޮއިސްއަށް މައުލޫމާތު ލިބިފައިވާގޮތުގައި ދިއްދޫގައި ދުއްވާ މި ބޯޓު ފަރަށް އަރާފައިވަނީ ރޭ 11:25 ހާއިރެވެ. ބޯޓު އަރާފައިވަނީ ނ އަތޮޅު ރޮބިންސަން ކްލަބް ނޫނު ރިސޯޓް ކައިރީ އޮންނަ ފަރަކަށެވެ.
ބޯޓު ފަރަށްއެރިއިރު އަންހެނުންނާއި ކުދަކުދިން ތިބިކަމަށް މައުލޫމާތު ލިބެއެވެ. އަދި މާލެއިންނާއި ތިލަފުށިން ބަރުކުރި ގިނަ އަދަދެއްގެ މުދާވެސް ބޯޓުގައި ހުރިކަމަށް މައުލޫމާތު ލިބެއެވެ.
މެގަ ހޯރަ ބޯޓު އޮތް ހިސާބު
ބޯޓު ފަރަށް އެރުމާއެކު ފުލުހުންނަށް އެކަމުގެ މައުލޫމާތު ލިބި އެ ސަރަހައްދަށް މީހުން ސަލާމަތްކުރުމަށް ވަނީ ގޮސްފައެވެ. ބޯޓު ފަރަސް އެރީ ކީއްވެގެންކަމެއް އަދި ސާފެއް ނުވެއެވެ. މި ހާދިސާގައި ބޯޓަށާއި މީހުންނަށް ގެއްލުން ލިބުނުކަމެއް އަދި ޔަގީނެއް ނުވެއެވެ. ފޮލޯމީން ދައްކާގޮތުގައި ބޯޓު އަދިވެސް އޮތީ ފަރަށްއެރި ހިސާބުގައެވެ.
މެގަ ހޯރަ ބޯޓަކީ ދިއްދޫގައި ދުއްވާ މާލެދަތުރުކުރާ އެންމެބޮޑު ބޯޓެވެ. މި ބޯޓު ދަތުރުކުރަން ފެށީ މިއަހަރުގެ ކުރީކޮޅެވެ.
Advertisement
This content is created and paid for by advertisers and does not involve Voice Journalists
