ދިވެހި ސަރުކާރާއި ހަންގޭރީ ސަރުކާރާ ދެމެދު ވެވުނު "ކޯޕަރޭޝަން ވިދިން ދަ ފްރޭމްވަރކް އޮފް ދަ ސްޓިޕެންޑިއަމް ހަންގަރިކަމް 2025-2027" އެއްބަސްވުމުގެ ދަށުން ހަންގޭރީގެ ޔުނިވަރސިޓީތަކުން ދިވެހި ދަރިވަރުންނަށް ސްކޮލަރޝިޕް ފުރުސަތުތަކެއް ހުޅުވާލައިފިއެވެ.

މި އެއްބަސްވުމުގެ ދަށުން، މި އަހަރުން ފެށިގެން 2027 އަށް، ކޮންމެ އަހަރަކު 25 ސްކޮލާޝިޕް ދިވެހި ދަރިވަރުންނަށް ދެވޭނެއެވެ. މީގެ ތެރޭގައި އަންޑަގްރެޖުއޭޓް، ގްރެޖުއޭޓް އަދި ޑޮކްޓޯރަލް ޕްރޮގްރާމްތައް ހިމެނެއެވެ.

މި އެއްބަސްވުމުގައި ސޮއިކޮށްފައިވަނީ ނިއުޔޯކްގައި މިހާރު ކުރިޔަށްދާ އދ.ގެ 80 ވަނަ އާންމު ޖަލްސާގެ ހަވާސާގެ ތެރެއިންނެވެ.  އެގޮތުން ރާއްޖޭގެ ފަރާތުން އެ އެއްބަސްވުމުގައި ސޮއިކުރެއްވީ ޚާރިޖީ ވަޒީރު ޑރ. އަބްދުﷲ ހަލީލް އެވެ. އަދި ހަންގޭރީގެ ފަރާތުން ސޮއިކުރެއްވީ އެ ގައުމުގެ ފޮރިން އެފެއާޒް އެންޑް ޓްރޭޑްގެ ވަޒީރު، ޕީޓަރ ސިޖާޓޯއެވެ.

ސްޓިޕެންޑިއަމް ހަންގަރިކަމް ޕްރޮގްރާމަކީ ބައިނަލްއަޤްވާމީ ދަރިވަރުންނަށް ހަންގޭރީގައި މަތީ ތަޢުލީމު ހާސިލުކުރުމުގެ ފުރުސަތު ދިނުމަށް ރޭވިފައިވާ ޕްރޮގްރާމެކެވެ. މި ޕްރޮގްރާމްގެ ދަށުން ދަރިވަރުންނަށް ހަންގޭރީގެ އިޖްތިމާޢީ އަދި ސަޤާފީ ދިރިއުޅުމުގެ ތަޖުރިބާ ހޯދުމުގެ ފުރުސަތުވެސް ލިބިގެންދެއެވެ. އަދި ޔޫރަޕަށް މުހިންމު ވަކި ދާއިރާތަކުން ކިޔެވުމުގެ ފުރުސަތުވެސް މި ޕްރޮގްރާމްގެ ދަށުން ލިބިގެންދެއެވެ.

ހަންގޭރީ ސަރުކާރުން މި ޕްރޮގްރާމް ދުނިޔޭގެ އެކި ގައުމުތަކާއެކު ކުރިއަށް ގެންދެއެވެ. މި އެއްބަސްވުމުގެ ސަބަބުން ދިވެހި ދަރިވަރުންނަށް މަތީ ތަޢުލީމު ހާސިލުކުރުމަށް އިތުރު ފުރުސަތުތަކެއް ހުޅުވިގެންދާނެއެވެ.