ތ.ވިލުފުށީ ބީއެމްއެލް އިސްލާމިކް ބްރާންޗުގެ އަމަލީ މަސައްކަތް ފަށައިފި
ބޭންކް އޮފް މޯލްޑިވްސްއިން ތ.ވިލުފުށީގައި ގާއިމްކުރާ އެ ބޭންކްގެ އިސްލާމިކް ބްރާންޗުގެ ބިންގާ މިއަދު އަޅައި އޭޓީއެމްގެ ހިދުމަތް އެރަށުގައި ފަށައިފިއެވެ.
ބީއެމްއެލުން ވިލުފުށީގައި ގާއިމްކުރި އޭޓީއެމްގެ ހިދުމަތް ފަށައި، އިސްލާމިކް ބްރާންޗުގެ ބިންގާ އަޅާފައިވަނީ ރައީސް ޑރ.މުހައްމަދު މުއިއްޒު އެރަށަށް ކުރެއްވި ޒިޔާރަތުގެ ތެރެއިންނެވެ. މި ރަސްމިއްޔަތު ރައީސުލްޖުމްހޫރިއްޔާ ޝަރަފްވެރިކޮށްދެއްވިއިރު، އެމަނިކްފާނު ވަނީ އޭޓީއެމްގެ ހިދުމަތް ރަސްމީކޮށް ފައްޓަވައިދެއްވާފައެވެ. އޭޓީއެމްގެ ހިދުމަތް ފައްޓަވައިދެއްވުމަށްފަހު ރައީސް ވަނީ ފައިސާ ނެގި ކާޑު ކައުންސިލާ ހަވާލުކޮށްދެއްވާފައެވެ.
ބީއެމްއެލް އޭޓީއެމް ހިދުމަތް ފެށުމުގެ ތެރެއިން... ފޮޓޯ: ރައީސް އޮފީސް
ބީއެމްއެލުްނ ވިލުފުށީގައި ގާއިމްކޮށްފައިވަނީ ސެލްފް ސާވިސް އޭޓީއެމެކެވެ. މި އޭޓީއެމުން 24 ގަޑިއިރު ފައިސާ ނެގުމާއި ޖަމާކުރުމުގެ އިތުރުން ޓްރާންސްފާ ހިދުމަތް ލިބެއެވެ.
މި ރަސްމިއްޔާތުގައި ބީއެމްއެލް އިސްލާމިކް ބްރާންޗުގެ ބިންގާ އަޅުއްވާދެއްވީ މާލީ ވަޒީރު މޫސާ ޒަމީރާއި، ބީއެމްއެލްގެ ޗެއަރޕާސަން އަޙްމަދު ޢަލީ ޙަބީބު، ބީއެމްއެލްގެ މެނޭޖިން ޑިރެކްޓަރ މުޙައްމަދު ޝަރީފްގެ އިތުރުން ވިލުފުށީ ދާއިރާގެ މެމްބަރު، އަދި ވިލުފުށީ ކައުންސިލްގެ ރައީސްއެވެ.
ރަށްރަށުގައި ބީއެމްއެލްގެ ހިދުމަތްތައް ފުޅާކުރުމަށް ކުރަމުންގެންދާ މަސައްކަތްތަކުގެ ދަށުން ބީއެމްއެލުން ވަނީ 13 އަތޮޅެއްގެ މީހުން ދިރިއުޅޭ ހުރިހާ ރަށެއްގައި އޭޓީއެމްގެ ހިދުމަތް ފަށާފައެވެ.
Advertisement
This content is created and paid for by advertisers and does not involve Voice Journalists
