ތ. ވިލުފުށީ ފުޓުބޯޅަ ދަނޑު ތަރައްޤީކުރުމުގެ މަސައްކަތް އެމްޓީސީސީއާ މިއަދު ޙަވާލުކޮށްފިއެވެ.

ރައީސް ޑރ. މުޙައްމަދު މުޢިއްޒު ތ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން މި މަޝްރޫއު އެމްޓީސީސއާ ހަވާލުކޮށްފައިވަނީ މިއަދު އެ ރަށުގައި ބޭއްވި ޚާއްސަ ރަސްމިއްޔާތުގައެވެ.

މި ރަސްމިއްޔާތުގައި އެ މަޝްރޫއުގެ އެއްބަސްވުމުގައި އެމްޓީސީސީގެ ފަރާތުން ސޮއިކުރެއްވީ، އެ ކުންފުނީގެ މެނޭޖިން ޑިރެކްޓަރު ޑީސީޕީ ރިޓަޔާޑް އަޙްމަދު ސަޢުދީއެވެ. އަދި ސަރުކާރުގެ ފަރާތުން ސޮއިކުރެއްވީ މިނިސްޓްރީ އޮފް ސްޕޯޓްސް ފިޓްނަސް އެންޑް ރިކްރިއޭޝަންގެ ސްޓޭޓް މިނިސްޓަރު، ޢަބްދުއްރައްޒާޤު އިބްރާހީމްއެވެ.

2،297 މީހުންގެ އާބާދީއެއް އޮންނަ ވިލުފުށީގެ ފުޓްބޯޅަ ދަނޑުގެ މަޝްރޫގެ ދަށުން ސްޓޭޑިއަމްގެ ލައިޓިން ހަރުކުރުމާއި ރޮސްޓްރަމް ހެދުމުގެ މަސައްކަތްތައް ކުރާނެއެވެ. މިއާީ 21.73 މިލިއަން ރުފިޔާއަށް، 360 ދުވަހުގެ ތެރޭގައި ނިންމާ ގޮތަށް އެމްޓީސީސީއާ ހަވާލުކޮށްފައިވާ މަޝްރޫއެކެވެ.

މި މަޝްރޫއުގެ އިތުރަށް ވެސް، އެ ރަށުގެ ބިން ހިއްކުމުގެ މަޝްރޫއު ވެސް ވަނީ އެމްޓީސީސީއާ ހަވާލުކޮށްފައެވެ.