ޔަހޫދީ ނިރުބަވެރި ދައުލަތް އިޒްރޭލުން ޣައްޒާގައި ހިންޤާ ގަތުލްޢާންމު ކުށްވެރިކުރައްވައި، އދ ގެ ސެކިއުރިޓީ ކައުންސިލު ވީޓޯގެ ބާރުން "ޕެރެލައިޒްވެފައި" އޮތް އޮތުން ނިމުމަކަށް ގެންނަން ޖެހޭ ކަމަށް އދ. ގެ 80 ވަނަ ޖެނެރަލް އެސެމްބްލީގައި ދިވެހިރާއްޖޭގެ ޚާރިޖީ ވަޒީރު ޑރ. އަބްދުﷲ ޚަލީލް ވިދާޅުވެއްޖެއެވެ.
ރޭ، އެމެރިކާގައި ހުންނަ އދ.ގެ މައި އިމާރާތުގައި ވާހަކަފުޅު ދައްކަވަމުން ވަޒީރު ވިދާޅުވީ ޣައްޒާގައި އިސްރާއީލުން ހިންގަމުންދާ އަނިޔާވެރި ޢަމަލުތަކަކީ ނަސްލު ނައްތައިލުމުގެ ޢަމަލުތަކެއް ކަމަށާއި، މިއީ ޤަރުނުގެ އެންމެ ބޮޑު ކާރިސާ ކަމަށެވެ.
އެގޮތުން އިޒްރޭލުން ބައިނަލްއަޤްވާމީ ޤާނޫނުތައް ތަކުރާރުކޮށް ޚިލާފުވެފައިވާކަމުގައި ފާހަގަކުރައްވަމުން ވަޒީރު ވަނީ ސެކިއުރިޓީ ކައުންސިލާއި ޖެނެރަލް އެސެމްބްލީން ނިންމާފައިވާ ސަތޭކަ އެތައް ޤަރާރަކަށް އިޙްތިރާމް ނުކުރާ ކަމަށާއި، އިންޓަނޭޝަނަލް ކޯޓް އޮފް ޖަސްޓިސްގެ ނިންމުންތަކަށް ވެސް އިޒްރޭލުން ތަބާނުވާ ކަމަށް ވެސް ވިދާޅުވެފައެވެ.
އަދި އެކަމުން ދައްކުވައިދެނީ ފަލަސްޠީނު ރައްޔިތުންނަކީ އިންސާނީ ކަރާމާތާއި، މިނިވަންކަމާއި، ދިރިހުރުމުގެ ޙައްޤު ލިބިގެންވާ ހަމަހަމަ އިންސާނުންގެ ގޮތުގައި އިޒްރޭލުގެ ވެރިން ނުދެކޭކަން ކަމަށް ވަޒީރު ވިދާޅުވިއެވެ.
އަދި އިންސާނީ ޙައްޤުތަކަށް ތިމަންނަމެން ތާއީދުކުރަމޭ ބުނެ އުޅުނު ޤައުމުތަކުން މިހާރު އެ ޙައްޤުތައް ނިގުޅައިގަތުމަށް ހަތިޔާރާއި ފައިސާގެ އެހީތެރިކަން ފޯރުކޮށްދެމުންދާ ކަމަށް ފާހަގަކުރައްވަމުން ވަޒީރު ވިދާޅުވީ، އދ. ގެ ސެކިއުރިޓީ ކައުންސިލަށް އަވަސް އިސްލާޙުތަކެއް ގެންނަން ޖެހޭ ކަމަށެވެ. އޭގެ ތެރޭގައި މެންބަރުން އިތުރުކުރުމާއި، ކުދި ޖަޒީރާ ޤައުމުތަކަށް ވަކި ގޮނޑިއެއް ކަނޑައެޅުމާއި، ވީޓޯ ބާރުގެ ނަހަމަ ބޭނުންކުރުން ހުއްޓުވުމާއި، މަސައްކަތްތައް ހާމަކަން ބޮޑު ގޮތެއްގައި ކުރިއަށް ގެންދިއުން ހިމެނޭ ކަމަށް ވިދާޅުވިއެވެ.
މީގެ އިތުރުން ބައިނަލްއަޤްވާމީ ނިޒާމާ ގުޅޭގޮތުން ވާހަކަފުޅު ދައްކަވަމުން، އެ ނިޒާމު ތިން ގޮތަކުން ބަލިކަށިވަމުންދާ ކަމަށް ވަޒީރު އިންޒާރު ދެއްވިއެވެ. އެގޮތުން، ބާރުގެ ބޭނުންކޮށްގެން ސަރަޙައްދީ ބޮޑުމިން ބަދަލުނުކުރެވޭނެ ކަމުގެ އުސޫލު ގެއްލެމުންދާ ކަމަށާއި، ބާރުވެރި ޤައުމުތަކުން މިނިވަންކަމާއި ސަރަޙައްދީ ސަލާމަތަށް އިޙްތިރާމްކުރުން އިޚްތިޔާރީ ކަމެއްގެ ގޮތުގައި ދެކެމުންދާ ކަމަށާއި، ގިނަ ފަރާތްތަކުގެ ބައިވެރިވުމާއެކު މަސައްކަތްކުރުމުގެ ނިޒާމަށް ނުރައްކާވެފައިވާ ކަމަށް ވަޒީރު ވިދާޅުވިއެވެ.
އަދި ކުދި ޖަޒީރާ ޤައުމުތަކުން ކުރިމަތިލާންޖެހޭ މޫސުމީ ބަދަލުތަކާއި، ދަރަނީގެ ބުރައާއި، ގެއްލުމާއި ގޮންޖެހުންތަކާއި ގުޅޭ ގޮތުން ވެސް ވަޒީރު ވާހަކަފުޅު ދެއްކެވިއެވެ. އެގޮތުން ޕެރިސް އެއްބަސްވުމާއި، 2030 އެޖެންޑާއާއި، އެޑިސް އަބާބާ އެކްޝަން އެޖެންޑާގެ ދަށުން ވެފައިވާ ވަޢުދުތައް ފުރިހަމަނުވާ ކަމަށް ވެސް ވަޒީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
