ފެނަކައިން އަމިއްލަ ކުންފުންޏެއްކަމަށްވާ އެލްފި މޯލްޑިވްސް ޕްރައިވެޓް ލިމިޓެޑަށް ދައްކަންޖެހޭ 3.8 މިލިއަން ރުފިޔާ އެންމެފަހުން ސިވިލްކޯޓު މެދުވެރިކޮށް އެ ފައިސާ ނަގައިދީފިއެވެ.

އެ ފައިސާ އެލްފިއަށް ނަގައިދީފައިވަނީ، ސިވިލްކޯޓުން މީގެ ކުރިން ފައިސާ ދެއްކުމަށް ހުކުމްކުރުމުން އެ ހުކުމާ އެއްގޮތަށް ފަނަކައިން އަމަލުކޮށްފައިނުވާތީ، ހުކުމް ތަންފީޒު ކުރުމަށް އެލްފިން ކޯޓަށް މައްސަލަ ހުށަހެޅުމުންނެވެ.

ފެނަކައަށް ވިއްކި މުދަލަށް ދޭންޖެހޭ ފައިސާ ނުދީގެން އެ މައްސަލަ ސިވިލްކޯޓަށް ހުށަހެޅުމުން ކޯޓުން ފެނަކައިގެ މައްޗަށް ފައިސާ ދެއްކުމަށް ހުކުމްކޮށްފައިވަނީ މިއަހަރުގެ މެއިމަހުގެ ތެރޭގައެވެ. ފެނަކައިގެ މައްޗަށް ކޯޓުން ހުކުމް ކުރީ މެއިމަހުގެ 15 ދުވަހުން ފެށިގެން 14 ދުވަހުގެ ތެރޭގައި 3.8 މިލިއަން ރުފިޔާ ދައްކައި ހަލާސްކުރުމަށެވެ. ނަމަވެސް މުއްދަތު ފަހަނަ އަޅައި ދިޔައިރުވެސް ފެނަކައިން އެ ފައިސާ ދައްކާފައެއް ނުވެއެވެ.

އެންމެފަހުން ޖުލައިމަހުގެ 29 ވަނަ ދުވަހު ކޯޓު އަމުރެއްގެ ދަށުން ފެނަކައިގެ އެކައުންޓް ހިފަހައްޓައި ސިވިލްކޯޓަށް އެފައިސާ ޖަމާކޮށްފައިވަނީ އޮގަސްޓްމަހުގެ 3 ވަނަ ދުވަހެވެ. އަދި ކޯޓުން އެލްފިގެ އެކައުންޓަށް އެފައިސާ ޖަމާކޮށްފައިވާކަން މިއަދު އެކުންފުނިން އަންގާފައިވާކަމަށްވެސް ސިވިލްކޯޓުން މިއަދު ގަޒިއްޔާ ނިންމި ހުކުމްގައި ވަނީ ބަޔާންކޮށްފައެވެ.

ފެނަކައިގެ ދަރަނި އެތައް ބިލިއަން ރުފިޔާއަށް އަރާއިރު، އެކުންފުނިން އަމިއްލަ ވަރަށް ގިނަ ކުންފުނިތަކަށް ދޭންޖެހޭ ފައިސާ ހުރިކަމަށާް ސަރުކާރުން ވަނީ ބުނެފައެވެ.