ސުލްޙަވެރި އިޙްތިޖާޖެއްގެ ނަމުގައި ޤައުމުގެ ސުލްޙަމަސަލަސްކަން ނަގާލައި ހަލަބޮލިކުރުމަށް އެމްޑީޕީން ކުރިން ރޭ ބޭއްވީ ނިރުބަވެރި ހަރަކާތެއްކަމަށް ނައިބު ރައީސް ހުސައިން މުޙައްމަދު ލަތީފް ވިދާޅުވެއްޖެއެވެ.

"އެކްސް"ގައި ކުރެއްވި ޕޯސްޓެއްގައި އެމަނިކުފާނު ވިދާޅުވީ، އެމްޑީޕީން ގެންދިޔަ އެ ހަރަކާތް ކުށްވެރިކުރާ ކަމަށާއި، އެ ހަރަކާތަކީ ރައްޔިތުންގެ ބާރާއި، ޚިޔާފާޅުކުރުމުގެ ޙައްޤުގެ ނިވަލުގައި، ޤާނޫނުއަސާސީއާއި ޤާނޫނު ހުއްދަކުރާ ހަމަތައް ގިރާކޮށް، ޤާނޫނީ ވެރިކަމަކާ ދެކޮޅަށް ރޭވިގެން ހިންގުނު ނިރުބަވެރި ޙަރާކާތެއްގެ ގޮތުގައި ސިފަކުރާ ކަމަށެވެ.

ނައިބު ރައީސް ވިދާޅުވީ އެތައް ރައްޔިތުންނެއް އެއްތަނަކަށް ޖަމާކޮށް، ފުލުހުންގެ އެއްބާރުލުމާއެކު ކުރިއަށްގެންދިޔުމަށް ހުއްދަދީފައިވާ ހަރަކާތެއް ހަލަބޮލިކޮށް، ފުލުހުންގެ އެންގުމާ ޚިލާފަށް އަނބުރާލައި، ރައްޔިތުން ނުރައްކަލަށް ހުށައެޅުމަކީ އެމްޑީޕީގެ ލީޑާޝިޕުން ގަސްދުގައި ހިންގި ފިނޑި އަމަލެއް ކަމަށެވެ.

އެމްޑީޕީގެ އެއްވުމުގެ ތެރެއިން -- ވޮއިސް ފޮޓޯ

އަދި އެކަމަކީ އެމްޑީޕީން ވަކާލާތުކުރާ އަސާސްތައް ނެގެހެއްޓުމުގައި ހުދު އެޕާޓީ މިއަދު ފެއިލްވެފައިވާ ކަމުގެ ހެއްކެއް ކަމުގައި ޤަބޫލުކުރައްވާ ކަމުގައި ވެސް ނައިބު ރައީސް ވިދާޅުވިއެވެ.

ނައިބު ރައީސް އެފަދައިން ވިދާޅުވިއިރު، އެރޭ އެމްޑީޕީގެ ހިނގާލުން ވެސް ބާއްވަން އަސްލުވަނީ ހަމަޖެހިފައި އަމީނީމަގުންނެވެ. އެހެން ނަމަވެސް ފަހު ވަގުތު ޚިޔާލު ބަދަލުކޮށް އެމްޑީޕީން ވަނީ މަޖީދީ މަގަށް ނުކުމެފައެވެ.

އެކަމާއި ގުޅިގެން ފުލުހުން ވަނީ ރިއަޓް ގިއަރުގައި ނުކުމެ އެ އެއްވުން ހުއްޓުވައިފައެވެ.