ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް އަހްމަދު ތާރިޤް (ޓޮމް) ފީފާގެ ޓެކްނިކަލް ޑިވެލޮޕްމަންޓް ކޮމެޓީގެ މެންބަރުކަމަށް އައްޔަނުކުރުމަށް ފީފާގެ ކައުންސިލުން ނިންމައިފިއެވެ.
މިއީ ފީފާގެ ސްޓޭންޑިން ކޮމެޓީއެއްގެ މިފަދަ މަގާމަކަށް ދިވެއްސަކު އިންތިހާބުވި ފުރަތަމަ ފަހަރެވެ.
އެފްއޭއެމްގެ ޕޯސްޓް
އެފްއޭއެމްގެ ރައީސަކަށް މިދިޔަ ޖުލައި މަހު އިންތިހާބުވި ފަހުން ޓޮމް ގެންދަނީ ރާއްޖޭގެ ފުޓްބޯޅަ އަލުން ދިރުވުމަށް ފީފާގެ ލަފާގެ ދަށުން ގިނަ މަސައްކަތްތަކެއް ކުރަމުންނެވެ. އޭގެ ނަތީއްޖާއެއްގެ ގޮތުން ގާތްގަޑަކަށް ގާތްގަޑަކަށް ދެ އަހަރުގެ މެދުކެނޑުމުކަށްފަހު ދިވެހި ޕްރިމިއާ ލީގުގެ މެޗުތައް ވެސް މިދިޔަ މަހުގެ ތެރޭގައި ވަނީ ފަށައިފައެވެ.
އެ ނަތީއްޖާތަކާއި ގުޅިގެން ފީފާގެ ރައީސް ޖިއާނީ އިންފަންޓީނޯ ވެސް ވަނީ ތޯރިގްއާއި ބައްދަލުކުރައްވައި، ރާއްޖޭގެ ފުޓްބޯޅަ ކޮޅަށް ނެގުމަށް ތޯރިގް ފަށާފައިވާ މަސައްކަތަށް ތައުރީފުކުރައްވާފައެވެ.
އަދި ރާއްޖެއިން މި އަހަރު ހޯދި ސައުތު އޭޝިއަން ސުޕަ ކްޕަގެ ކާމިޔާބީ އާއި ގުޅިގެން ތަހުނިޔާ ފޮނުއްވައި، ދިހަ އަހަރަށް ފަހު އެފްއޭއެމުން ފުރަތަމަ ފަހަރަށް އިލެވެން ސައިޑް އަންހެން ފުޓްބޯޅަ މުބާރާތެއް އަންނަ މަހު ބޭއްވުމަށް ނިންމުމާއި ގުޅިގެން ވެސް އިންފަންޓީނޯ ވަނީ ތައުރީފުކުރައްވާފައެވެ.
ފާހަގަކުރެވޭ ގޮތުގައި ޓޮމް އެފްއޭއެމްއާއި ހަވާލުވުމުގެ ކުރިން އެފްއޭއެމް ހިންގީ ފީފާއިން އައްޔަން ކުރި ނޯމަލައިޒޭޝަން ކޮމިޓީންނެވެ. އެގޮތުން އެފްއޭއެމްގެ ކުރީގެ ރައީސް ބައްސާމް އަދީލު ޖަލީލުގެ ދައުރުގައި އެފްއޭއެމްގެ ޑިވެލޮޕްމެންޓް ފައިސާ ނަހަމަގޮތުގައި ބޭނުން ކުރިކަމުގެ ތުހުމަތުގައި ފީފާއިން އޮތީ އެ ފަންޑުގެ ފައިސާ ރާއްޖޭ އަށް ދިނުން މެދުކަނޑާލަފަ އެވެ.
އެފަދަ މައްސަލައެއްގައި ބައްސާމް އިއްޔެ ވަނީ ހަތަރު އަހަރަށް ޖަލަށް ލުމަށް ޙުކުމްކޮށްފައެވެ.
Advertisement
This content is created and paid for by advertisers and does not involve Voice Journalists
