ށ. ކަނޑިތީމުގައި 20 އެނދުގެ ސިއްޚީ މަރުކަޒުގެ މަސައްކަތް މި މަހުގެ ތެރޭގައި ބަޔަކާއި ހަވާލުކޮށް މި އަހަރުގެ ތެރޭގައި ފެށޭނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

މިއަދު ށ. އަތޮޅަށް ފެއްޓެވި ދަތުރުފުޅުގެ ތެރެއިން އެ އަތޮޅު ކަނޑިތީމަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، އެ ރަށުގެ ސިއްޚީ މަރުކަޒުގައި ދެ ބުރީގެ އިމާރާތެއް އިމާރަތްކުރުމަށް ބަޔަކާއި ހަވާލުކުރި ނަމަވެސް އެ މަސައްކަތް ކުރިޔަށްނުދާތީވެ އެ އެއްބަސްވުން އުވާލައިފައިވާ ކަމަށެވެ.

އެހެންކަމުން އެ މަސައްކަތް އެހެން ބަޔަކާއި ހަވާލުކޮށްގެން މި އަހަރުގެ ތެރޭގައި މަސައްކަތް ފެށުމަށް ނިންމަވައިފާކަމަށް ރައީސް ވިދާޅުވިއެވެ. ރައީސް ވިދާޅުވި ގޮތުގައި އެ މަޝްރޫއުގެ ދަށުން ޤާއިމްކުރާނީ 10 އެނދުގެ ވޯޑާއި ޕްރައިވެޓް ރޫމް ވެސް ހިމެނެހެން 20 އެނދުގެ އިމާރާތެކެވެެ.

އެ ރަށުގެ ސިއްޚީ މަރުކަޒަށް ފަހު އެ ރަށުގެ އުމްރާނީ ތަރައްގީގެ މަސައްކަތްތަކަށް ވެސް އެމަނިކުފާނު ވަނީ އަލިއަޅުއްވާފައެވެ. އެގޮތުން އެ ރަށުން އަލަށް މީހުން އާބާދުވި ސަރަހައްދުގައި ކަރަންޓާއި ފެން ލުމުގެ މަސައްކަތަކީ ވަރަށް އިސްކަމެއް ދެއްވައިގެން ކުރައްވާނެ މަސައްކަތެއް ކަމަށް ރައީސް ވިދާޅުވިއެވެ.

އަދި އެކަމަކީ ވަރަށް ގިނަ ރަށްތަކުގައި ހައްލުކުރަން ޖެހިފައިވާ މައްސަލައެއްކަން ރައީސް ވަނީ ފާހަގަކުރައްވާފައެވެ.

ރައީސް ވަނީ ކުޅިވަރުގެ ދާއިރާއިންވެސް އެރަށަށް މުހިއްމު މަސއްކަތްތަކެއް ކުރައްވާނެކަމަށް ވިދާޅުވެފައެވެ. އެގޮތުން އެ ރަށުގެ ފުޓްބޯޅަ ދަނޑުގައި ރޭގަނޑު ކުޅޭވޭނެ އިންތިޒާމް ހަމަޖައްސަވާދެއްވާނެކަމަށާއި އެގޮތުން ފެންސް ޖަހައި، ލައިޓް ޖަހާދީ ޗޭންޖިން ރޫމްއާއެކު ތަރައްޤީކޮށްދެއްވާނެކަމަށް ރައީސް ވިދާޅުވިއެވެ.