ށ. މާއުނގޫދޫ ޞިއްޙީ މަރުކަޒުގެ އަލަށް އިމާރާތްކުރާ ބައިގެ މަސައްކަތް ނިމުމުން، އެތަނަކީ 24 ގަޑިއިރު ޚިދުމަތްދޭ މަރުކަޒަކަށް ހެދުމަށް ސަރުކާރުން ނިންމަވާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ށ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ އެންމެ ފަހު މަންޒިލުގެ ގޮތުގައި މާއުނގޫދޫއަށް ވަޑައިގެން، އެރަށުގެ ރައްޔިތުންނާ ބައްދަލުކުރައްވައި ރައީސް ވިދާޅުވީ، މޫސުން ގޯސްވުމުގެ ސަބަބުން މަޝްރޫޢުތައް ފެށުމުގެ ރަސްމިއްޔާތުތައް ނުބޭއްވުނު ނަމަވެސް، އެ މަޝްރޫޢުތައް ކުރިއަށް ގެންދަވާނެކަމުގެ ޔަޤީންކަންދެއްވާ ކަމަށެވެ.

މީގެ ތެރޭގައި ރަށު ކައުންސިލްގެ އައު އިމާރާތާއި، މާއުނގޫދޫ ސްކޫލްގެ އައު އިމާރާތާއި، ޤުރުއާނާބެހޭ މަރުކަޒުގެ ގޮތްޕެއް އަދި ފިޓްނަސް އެންޑް ރެކްރިއޭޝަން ސެންޓަރާއި ފުލުހުންގެ މަރުކަޒު އިމާރާތްކުރުމުގެ މަސައްކަތް ހިމެނޭކަމަށް ރައީސް ވިދާޅުވިއެވެ.

އެގޮތުން އެ ރަށުގެ ޞިއްޙީ މަރުކަޒުގެ އެކްސްޓެންޝަން ޢިމާރާތުގެ މަސައްކަތް ނިމޭއިރު އެތަން 24 ގަޑިއިރު ޚިދުމަތްދޭ މަރުކަޒަކަށް ހެދުމަށް މަސައްކަތްކުރައްވާނެ ކަމުގައި ރައީސް ވިދާޅުވުއެވެ.

މީގެއިތުރުން ރަށުގެ ފެނާއި ނަރުދަމާގެ މަސައްކަތް އެމް.ޑަބްލިއު.އެސް.ސީއާ ހަވާލުކޮށްގެން ކުރިއަށް ގެންދަވާނެ ކަމަށާއި، އެމްޓީސީސީން ކުރިއަށްގެންދާ ބަނދަރު މަޝްރޫޢަށް ރައްޔިތުން އެދިވަޑައިގެންނެވި ކަންކަން އިތުރުކުރައްވާނެ ކަމަށްވެސް ރައީސް ވިދާޅުވިއެވެ.

އަދި ރަށުގެ ގިރާ ސަރަހައްދުގެ މަސައްކަތް ކުރައްވާނީ މޫދަށްއެރޭ ސަރަހައްދެއް ހިމަނައިގެން ކަމަށާއި، މިއަހަރު ފުޓުބޯޅަ ދަނޑެއްގެ މަސައްކަތް ފައްޓަވައި، އަންނަ އަހަރުގެ ބަޖެޓުގައި މިސްކިތެއް އިމާރާތްކުރުމުގެ މަސައްކަތް ހިމަނުއްވާނެ ކަމަށްވެސް ވިދާޅުވިއެވެ.

އެ ބައްދަލުވުން ނިންމަވާލައްވަމުން ރައީސް ވަނީ، ށ. އަތޮޅުގެ އެންމެހައި ރައްޔިތުންނަށް ޝުކުރު އަދާކުރައްވައި، ރައްޔިތުން އެދިވަޑައިގެންނެވި ކަންކަން ކުރެއްވުމަށް ސަރުކާރުން މަސައްކަތްކުރައްވާނެކަމުގެ ޔަޤީންކަން ތަކުރާރުކޮށް ދެއްވާފައެވެ.