ލ. ފޮނަދޫގެ ފަޅުތެރެއިން 30 ހެކްޓަރުގެ ބިން ހިއްކުމުގެ އަމަލީ މަސައްކަތް މިއަދު ފަށައިފިއެވެ.

މި މަޝްރޫޢުގެ އަމަލީ މަސައްކަތް ފެށުނީ ރައީސް ޑރ. މުޙައްމަދު މުޢިއްޒު، ލ. އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.

މަޝްރޫޢުގެ އަމަލީ މަސައްކަތް ފައްޓަވައި ދެއްވީ ފިނޭންސް މިނިސްޓަރު މޫސާ ޒަމީރެވެ. އަދި މި ރަސްމިއްޔާތުގައި ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ އާއި އެމްއޭސީއެލްގެ މެނޭޖިން ޑިރެކްޓަރު އިބްރާހިމް ޝަރީފް ވެސް ބައިވެރިވެ ވަޑައިގެންނެވިއެވެ.

ފޮނަދޫ ރައްޔިތުންނާ ބައްދަލުކުރައްވައި ރޭ ދެއްކެވި ވާހަކަފުޅުގައި ރައީސް މުޢިއްޒު ވިދާޅުވީ، ފޮނަދޫގައި ސޮއިކުރި މަޝްރޫޢުތަކުގެ ތެރެއިން އެންމެ ބޮޑު މަޝްރޫޢަކަށްވާނީ ކައްދޫ އެއަާޕޯޓު ރަނގަޅު ފެންވަރުގެ ބޮޑު އިންޓަނޭޝަނަލް އެއަރޕޯޓެއްގެ ގޮތުގައި ހެދުމަށް ބިން ހިއްކުން ކަމަށެވެ.

ލ. ފޮނަދޫގެ ބިން ހިއްކުމުގެ މަސައްކަތް ފެށުމުގެ ތެރެއިން -- ފޮޓޯ: ރައީސް އޮފީސް

މި މަޝްރޫޢުގެ ދަށުން އެއާޕޯޓުގެ ބޭނުމަށާއި ރަށުގެ ބޭނުމަށް ޖުމްލަ 144 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. އޭގެ ތެރެއިން އެއާޕޯޓުގެ ބޭނުމަށް 114 ހެކްޓަރު އަދި ރަށުގެ ބޭނުމަށް 30 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ.

ރައީސް މުޢިއްޒު ވިދާޅުވި ގޮތުގައި ކައްދޫ އެއާޕޯޓަށް ގެންނަ ބަދަލުތަކުގެ ތެރޭގައި 2،800 މީޓަރުގެ ދިގު ރަންވޭއެއް އެޅިގެންދާނެއެވެ. އަދި ކައްދޫގައި މިހާރު ހުރި އެމްއެންޑީއެފްގެ މަރުކަޒު އެހެން ތަނަކަށް ބަދަލުކުރަން ނުޖެހޭ ގޮތަށް އެއާޕޯޓުގެ މަސައްކަތް ކުރިއަށްދާނެ ކަމަށް ވެސް ވިދާޅުވިއެވެ.

މި ދެ މަޝްރޫޢުގެ މަސައްކަތް ވަނީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާ ހަވާލުކޮށްފައެވެ. އަދި މި މަޝްރޫޢުގެ އެންމެހައި މަސައްކަތްތައް 36 މަސްދުވަހުގެ ތެރޭގައި ނިންމުމަށް ވަނީ ހަމަޖެހިފައެވެ.