މި މަހުގެ 14 ވަނަ ދުވަހުގެ ރޭ ޕީއެންސީން ބާއްވާ ބޮޑު ޖަލްސާގައި ރާއްޖޭގެ ގިނަ ބަޔަކު ސަޕޯޓުކުރަނީ ކޮން ފިކުރަކަށް އަދި ކޮން ލީޑަރަކަށް ކަން ވަރަށް ސާފުކޮށް ފެންނާނެ ކަމަށް ރައްޔިތުންގެ އެ ޕާޓީގެ ޗެއާޕާސަން އަދި މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.

މި މަހުގެ 14 ވަނަ ދުވަހުގެ ރޭ ޕީއެންސީން ބާއްވާ ބޮޑު ޖަލްސާ އަށް ތައްޔާރުވުމުގެ ގޮތުން މިއަދު އެ ޕާޓީގެ ހަރުގޭގައި ބޭއްވި ޚާއްސަ ހަރަކާތުގައި ވާހަކަފުޅު ދައްކަވަމުން އަބްދުއްރަހީމް ވިދާޅުވީ، އެއީ ޕީއެންސީގެ ޖަލްސާއެއް ކަމަށާއި، އެ ޖަލްސާގައި ރައްޔިތުން ބައިވެރިވަނީ ރައީސް ޑރ. މުޙައްމަދު މުޢިއްޒު ރާއްޖެއަށް ގެނެސްދެއްވާ ތަރައްގީއަށްޓަކައި އެމަނިކުފާނަށް ޝުކުރުއަދާކުރައްވަން ކަމަށެވެ.

އަބްދުއްރަޙީމް ވިދާޅުވީ، ރާއްޖޭގެ ތަރައްގީގެ މަޝްރޫއުތައް ވަރަށް ބާރު ސްޕީޑެއްގައި ކުރިޔަށްދާއިރު، ރައްޔިތުން އެ ޖަލްސާއަށް އަންނަނީ މި ސަރުކާރުދާ މިސްރާބު ރަނގަޅުކަމުގައި ޤަބޫލުކުރެވޭތީ ކަމަށެވެ.

އަދި ޕީއެންސީގެ ވެރިކަމާއި އެކު ރައްޔިތުން ބޭނުންވާ ތަރައްގީއަށް ވާސިލުވެވޭނެ ކަމުގެ ޔަގީންކަން އެ ރައްޔިތުންނަށް އެބައޮތް ކަމަށާއި، އެ ޔަގީންކަން ރައީސަށް ކަށަވަރުކުރުމަށްޓަކައި އެ ޖަލްސާގައި ގިނަ އަދަދެއްގެ ރައްޔިތުން ބައިވެރިވެވާނެ ކަމަށް ވެސް އަބްދުއްރަހީމް ވިދާޅުވިއެވެ.

އެ ޕާޓީގެ ޗެއާޕާސަންކަން ވެސް ފުރުއްވާ އަބްދުއްރަހީމް އިތުރަށް ވިދާޅުވީ، ވާދަވެރި ސިޔާސީ ފަރާތްތަކުން ދައްކާ ވާހަކަތަކަކީ އަސްލެއް ނެތް ވާހަކަތަކެއްކަން އެ ރައްޔިތުން އެ ދުވަހު ސާބިތުކޮށްދޭނެ ކަމަށެވެ. 

އެހެންކަމުން އެ ދުވަހު ރާއްޖޭގައި އޮތީ ކޮން ފިކުރެއްކަމާއި އެ ރައްޔިތުން ތިބީ ކޮން ލީޑަރެއްގެ ފަހަތުގައިކަން ވަރަށް ސާފުކޮށް އެނގޭނެ ކަމަށް ވެސް އަބްދުއްރަހީމް ވިދާޅުވިއެވެ.

މި މަހުގެ 14 ވަނަ ދުވަހުގެ ރޭ ޕީއެންސީން ބާއްވާ ބޮޑު ޖަލްސާ ބޭއްވުމަށް ހަމަޖެހިފައިވަނީ އާޓިފިޝަލް ބީޗުގައެވެ. މި ހަރަކާތުގައި ރައީސް ޑރ. މުޙައްމަދު މުޢިއްޒު އާއި ސަރުކާރުގެ ވެރިން ވެސް ބައިވެރިވެވަޑައިގަންނަވާނެއެވެ.

އެ ބޮޑު ހަރަކާތަށް އާންމުންނަށް ދަޢުވަތު ދިނުމުގެ ގޮތުން، ޚާއްސަ ހަރަކާތެއް ވެސް މިއަދު އެ ޕާޓީން ވަނީ ފަށައިފައެވެ.