ފައިނުގެ އަހަރީ ދުވަހާއި ގުޅިގެން، އެރަށުގައި ބާއްވާ "ފައިނު އެވޯޑު" ހަފުލާގެ އެންމެހާ ކަންކަން އިންތިޒާމްކޮށް ހަމަޖައްސާދޭނެ ފަރާތެއް ހޯދުމަށް އެރަށު ކައުންސިލުން އިއުލާންކޮށްފިއެވެ. 

މި އެވޯޑު ހަފްލާއަކީ ފައިނުގެ ޚިދުމަތްތެރީންނާއި މަސައްކަތްތެރީންނާއި އަދި ރަށަށް ރީތިނަން ހޯދައިދީފައިވާ ފަރާތްތަކަށް ހާއްސަކޮށްގެން، އެކަމުގެ އަގު ވަޒަންކުރުމަށް ބާއްވާ ހަފްލާއެކެވެ. 

ފައިނު ކައުންސިލުން ގެޒެޓުގައި 6 ނޮވެމްބަރުގައި ކޮށްފައިވާ އިއުލާނުގައި ވާގޮތުން، މި ހަފްލާ އިންތިޒާމްކުރުމަށް ޝައުގުވެރިވާ ފަރާތްތަކުން ރަޖިސްޓްރީވުމަށް އެދޭ ފޯމް ފުރުއްވުމަށްފަހު ކައުންސިލް އިދާރާގެ އީމެއިލް [email protected] އަށް ފޮނުއްވައިގެން ނުވަތަ އެއިދާރާއަށް ދުރުވެ ހުށަހަޅައި ރަޖިސްޓްރީ ކުރައްވައިގެން ވެސް ހުށަހެޅިދާނެއެވެ. ގެޒެޓުގައި ވާގޮތުން މި މަސައްކަތަށް ހުށަހެޅޭނީ ވިޔަފާރިކުރުމުގެ ޤާނޫނުގެ ދަށުން މިނިސްޓްރީ އޮފް އިކޮނޮމިކް ޑިވެލޮޕްމަންޓްގައި ރަޖިސްޓްރީކޮށްފައިވާ ފަރާތްތަކަށެވެ. އަދި މިކަމާ ގުޅޭ އިތުރު މައުލޫމާތު ރަޖިސްޓްރީވާ ފަރާތްތަކަށް ވަކިން ހިއްސާކުރެވޭނެކަން ވެސް މި އިއުލާނުގައި ފާހަގަކޮށްފައިވެއެވެ. 

ގެޒެޓުގައި ވާގޮތުން މި އިއުލާނަށް ބީލަން ހުށަހެޅުމަށް ރަޖިސްޓްރީކުރެވޭނީ 13 ނޮވެމްބަރ 2025 ވަނަ ދުވަހުގެ 11:00 ގެ ނިޔަލަށެވެ. އަދި 20 ނޮވެމްބަރ 2025 ވަނަ ދުވަހުގެ 11.00 ގެ ނިޔަލަށް ބީލަން ބަލައިގަތުން ކުރިއަށްދާނެއެވެ. އެ ބީލަންތައް ހުޅުވުން ބެއްވުމަށް ހަމަޖެހިފައިވަނީ 20 ނޮވެމްބަރ 2025 ވަނަ ދުވަހު 11:05 ގައި ފައިނު ކައުންސިލް އިދާރާގެ ޖަލްސާކުރާ މާލަމުގައި ބީލަން ހުށަހަޅާ ފަރާތްތަކުގެ ހާޒިރުގައި ކަމަށް ވެސް މި އިއުލާނުގައި ބަޔާންކޮށްފައިވެއެވެ.

މިކަމާއި ގުޅޭގޮތުން ޝައުގުވެރިވާ ފަރާތްތަކުން އެ އިދާރާގެ ނަންބަރު 4000311 އަށް ގުޅުއްވާ ނުވަތަ އީމެއިލް [email protected] މެދުވެރިކޮށް އިތުރު މައުލޫމާތު ސާފުކުރެއްވޭނެކަމަށް އެރަށު ކައުންސިލުން ބުނެފައިވެއެވެ. 

"ފައިނު ދުވަސް"ގެ ނަމުގައި އެރަށުގައި މިއަހަރު ފާހަގަކުރަން ފެށި ރަށުގެ އަހަރީ ދުވަހަކީ މީހުން މަދުވުމުގެ ސަބަބުން ހުކުރު ކުރުން ހުއްޓާލަން މަޖުބޫރުވެފައި އޮތުމަށް ފަހު، އާބާދީ އިތުރުވަމުން ގޮސް އެރަށުގައި އަލަށް ހުކުރު ނަމާދު ކުރަން ފެށި ދުވަހަށް ހާއްސަކޮށް ނޮވެންބަރުމަހުުގެ 2 ވަނަ ދުވަހު ފާހަގަކުރާ ހާއްސަ ދުވަހެކެވެ.

މި ދުވަހާއި ގުޅިގެން ޖަމާއަތުގައި ފަތިސް ނަމާދަކާއި، ހާއްސަ ހިނގާލުމެއް އަދި ރަށުގެ ރައްޔިތުން ބައިވެރިވާ ހާއްސަ ސައެއް، 2 ނޮވެންބަރުގައި ވަނީ ބައްވާފައެވެ. އަދި މިކަމާއި ގުޅިގެން އަންނަ ޑިސެމްބަރުމަހު ވެސް ހަރަކާތްތަކެއް ކުރިއަށް ގެންދިއުމަށް ހަމަޖެހިފައިވާކަމަށް އެރަށު ކަނުންސިލުން މައުލޫމާތުދެއެވެ. އެގޮތުން އެމަހުގެ 28 ވަނަ ދުވަހު ރައްޔިތުން ބައިވެރިވާ ހާއްސަ ކޭމަކާއި، އުފެއްދުންތެރިކަމުގެ މައުރަޒެއް އަދި ސަގާފީ ހަރަކާތްތަކެއް ކުރިއަށް ގެންދިޔުމަށް ރާވާފައިވެއެވެ. އަދި "ފައިނު އެވޯޑް" ހަފްލާ ބާއްވާ، ފައިނު ކޮމިއުނިޓީ ފަންޑު އިފްތިތާހުކުރުން ކުރިއަށް ދާނީ  ޑިސެންބަރުމަހުގެ 20 ވަނަ ދުވަހުކަމަށް އެ އިދާރާއިން މައުލޫމާތު ދީފައިވެއެވެ.