އަތޮޅުތެރޭގައި ކުލިވަރު މުބާރާތްތައް ކުރިއަށްގެންދިއުމަށް ސަރުކާރުގެ އެއްބާރުލުން އަބަދުވެސް ލިބެމުންދާނޭކަމަށް ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް ވިދާޅުވެއްޖެއެވެ.

ހއ.އުތީމުގައި ނިމިގެންދިޔަ ތިލައުތުރު ފުޓުސަލް މުބާރާތް ނިންމުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން ނައިބުރައީސް ވިދާޅުވީ މިފަދަ ފުޓްސަލް މުބާރާތެއް އަތޮޅުކައުންސިލުން އިންތިޒާމުކޮށްގެން ކުރިޔަށް ގެންދިއުމަކީ، ކުރިޔަށް އެޅޭ ވަރަށް މުހިންމު ފިޔަވަޅެއް ކަމަށެވެ. އަދި މިއީ ވަރަށްބޮޑު އިޖުތިމާޢީ ޙަރަކާތެއް ކަމުގައި ނައިބުރައީސް ފާހަގަކުރެއްވިއެވެ.

ނިމިގެންދިޔަ ފުޓްސަލް މުބާރާތަކީ ކުޅިވަރުގެ އިތުރަށް އިޤުތިޞާދީ މަންފާތަކެއްވެސް ލިބިގެންދިޔަ މުބާރާތެއްކަން ފާހަގަ ކުރައްވައި، މުބާރާތް ރާވައި ދެއްވިކަމަށްޓަކައި ނައިބުރައީސް ވަނީ އަތޮޅުކައުންސިލަށް ޝުކުރު އަދާކުރައްވާފައެވެ. އަދި މިފަދަ މުބާރާތްތައް ހިންގުމުގައި ސަރުކާރުގެ އެއްބާރުލުން ލިބޭނެ ކަމުގެ ޔަޤީންކަންވެސް އެމަނިކުފާނު ދެއްވިއެވެ.

ތިލައުތުރު ފުޓްސަލް މުބާރާތުގެ ފައިނަލް މެޗްގައި ބައްދަލުކުރީ އުތީމާއި މުރައިދޫއެވެ. މިމެޗް ޕެނަލްޓީ ޖަހައިގެން ކާމިޔާބުކުރީ އުތީމެވެ. ޕެނަލްޓީއަށް ގޮސްފައިވަނީ މެޗްގެ ފުރިހަމަ ވަގުތު ހަމަވިއިރު 1-1 ގެ ނަތީޖާއިން ދެޓީމް އެއްވަރުވުމުންނެވެ. ޕެނަލްޓީއަށްގޮސްގެން އުތީމުން މެޗް ކާމިޔާބުކުރީ 5-3 ކުންނެވެ. މިއީ މި މުބާރާތުގެ ޗެމްޕިއަންކަން އުތީމް ނެގި ފުރަތަމަ ފަހަރެވެ.