ނެޝަނަލް ނިއުސް އެޖެންސީ އިފްތިތާހްކޮށްފި
މީޑިއާތަކަށް ކޮންޓެންޓް ފޯރުކޮށްދިނުމުގެ މަޤްސަދުގައި "ނެޝަނަލް ނިއުސް އޭޖެންސީ" އިފްތިތާހްކޮށްފިއެވެ.
ނެޝަނަލް ނިއުސް އޭޖެންސީ އިފްތިތާހްކުރުން އޮތީ މިކަމަށްޓަކައި މިއަދު ދައުލަތުގެ މީޑިއާގައި ކުރިއަށްދިޔަ ހާއްސަ ރަސްމިއްޔާތެއްގައެވެ. މި ރަސްމިއްޔާތުގައި ނެޝަނަލް ނިއުސް އޭޖެންސީގެ ލޯގޯ އާއި ވެބްސައިޓްގެ އިތުރުން ކާޑު އިފްތިތާޙުކޮށްދެއްވީ ރައީސުލްޖުމްހޫރިއްޔާގެ ތަރުޖަމާން ހީނާ ވަލީދާއި ޒުވާނުން ބާރުވެރިކުރުމާއި މަޢުލޫމާތާއި ފަންނާ ބެހޭ ވުޒާރާގެ ސްޓޭޓް މިނިސްޓަރ އަލީ ޝަމްޢާނުގެ އިތުރުން ދައުލަތުގެ މީޑިއާގެ މެނޭޖިން ޑިރެކްޓަރ އިބްރާހިމް ނަސްރީނެވެ.
ރާއްޖޭގެ ގިނަ މީޑިއާތަކަކުން ބައިވެރިވި މި ރަސްމިއްޔާތުގައި ވަނީ އެންއެންއޭގައި ބައިވެރިވި މީޑިއާތަކާއެކު އެއްބަސްވުމުގައި ސޮއިކޮށްފައެވެ. މި ޕްލެޓްފޯމާ މިއަދު 20 މީޑިއާއަކުން ގުޅުނުއިރު މީގެ ތެރޭގައި ބްރޯޑްކާސްޓިން މީޑިއާތަކުގެ އިތުރުން އޮންލައިން ނޫސްތައް ހިމެނެއެވެ.
މި ަރސްމިއްޔާތުގައި ވާހަކަދައްކަވަމުން ޒުވާނުން ބާރުވެރިކުރުމާއި މަޢުލޫމާތާއި ފަންނާ ބެހޭ ވުޒާރާގެ ސްޓޭޓް މިނިސްޓަރ އަލީ ޝަމްޢާން ވިދާޅުވީ، ނެޝަނަލް ނިއުސް އޭޖެންސީގެ ހިދުަތް ފެށިގެންދިއުމާއެކު މީޑިއާތަކަށް ވަރަށްބޮޑު ލުއިފަސޭހަކަމެއްލިބި ފަހި ފުރުސަތުތަކެއް ލިބިގެންދާނެ ކަމަށެވެ. އެގޮތުން ދައުލަތުގެ މީޑިއާއިން ނަގާ ނިއުސްއިވެންޓްތަކާއި އެކިއެކި އިވެންޓްތަކުގެ ކޮންޓެންޓްތައް މީޑިއާތަކަށް ލިބިގެންދާނޭކަމަށެވެ.
ދައުލަތުގެ މީޑިއާގެ މެނޭޖިންގ ޑިރެކްޓަރު އިބްރާހިމް ނަސްރީން ވިދާޅުވީ މި ހިދުމަތާއެކު އަމިއްލަ މީޑިއާތައް އިތުރު ހަރުފަތަކަށް ގެނައުމަށް ދައުލަތުގެ މީޑިއާގެ އެހީތެރިކަން ލިބިގެންދާނޭ ކަމަށާއި، ނެޝަނަލް ނިއުސް އޭޖެންސީ ޕްލެޓްފޯމުން މީޑިއާތަކަށް ގިނަ އަދަދެއްގެ ކޮންޓެންޓް ހިލޭ ލިބިގެންދާނެކަމަށެވެ. އަދި ކަނޑައެޅޭ ހާއްސަ އުސޫލުގެ ދަށުން އިތުރު ކޮންޓެންޓްތައްވެސް އަމިއްލަ މީޑިއާތަކަށް ލިބޭނޭކަން ނަސްރީން ފާހަގަކުރެއްވިއެވެ.
ނެޝަނަލް ނިއުސް އޭޖެންސީގެ ހިދުމަތަކީ އޭޕީ ނުވަތަ ރޮއިޓާސް ކަހަލަ ހިދުމަތެކެވެ. މި ހިދުމަތުގެ ދަށުން ކުރިމަތިވާ ކާރިސާތަކުގެ ވީޑިއޯ ފަދަ ތަކެތި އަމިއްލަ މީޑިއާތަކަށް ނުނެގުނު ނަމަވެސް އެ ވީޑިއޯތައް ނެޝަނަލް ނިއުސް އޭޖެންސީގެ މެމްބަރު މީޑިއާތަކަށް ކޮލިޓީކޮށް ލިބިގެންދާނެއެވެ. މިހާރު އެފަދަ ބައެއް ވީޑިއޯތައް ނުލިބޭ މީޑިއާތަކުން ބޭނުންކުރަންޖެހެނީ އެ ނެގި ފަރާތަކުންދޭ ކޮލިޓީއެއްގައި ގިނަފަހަރަށް އެ ފަރާތުގެ ވޯޓަރމާކްވެސް ހިމަނައިގެންނެވެ.
Advertisement
This content is created and paid for by advertisers and does not involve Voice Journalists
