އަންނަ އަހަރު ދައުލަތުގެ ބައެއް މުއައްސަސާތަކުގެ މުސާރަތައް ބޮޑުކުރަން ނިންމާފައިވާއިރު، ލަފާދެނީ މުސާރަތައް އެއްފަހަރާ މުސާރަތައް ބޮޑު ނުކުރަންކަމަށް މަރުކަޒީ ބޭންކުގެ ގަވަރުނަރު އަހުމަދު މުނައްވަރު ވިދާޅުވެއްޖެއެވެ.
މަޖިލީހުގެ ބަޖެޓް ކޮމިޓީގައި ވާހަކަދައްކަވަމުން މޯލްޑިވްސް މަނިޓަރީ އޮތޯރިޓީގެ ގަވަރުނަރު ވިދާޅުވީ، އަންނަ އަހަރުގެ ދައުލަތުގެ ބަޖެޓް ރިސްކަށް ބަލާއިރު އެންމެ ބޮޑަށް ފާހަގަކުރެވިގެންދާ އެއްކަމަކީ ދައުލަތުގެ ރިކަރަންޓް ހަރަދުތައް އިތުރުވާ އިތުރުވުންކަމަށެވެ. އެގޮތުން ދައުލަތުގެ ޕޭހާމަނައިޒޭޝަން ތެރެއިން މުސާރަތައް ބޮޑުކުރުމަށް ނިންމާފައިވާއިރު، އެ އަހަރުގެ ތެރޭގައި ރިކަރަންޓް ހަރަދުތައް ވަރަށްބޮޑަށް އިތުރުވެގެންދާނޭކަން ގަވަރުނަރު ވަނީ ފާހަގަކުރައްވާފައެވެ.
ގަވަރުނަރު ވިދާޅުވީ އަންނަ އަހަރުގެ ބަޖެޓާ ގުޅޭގޮތުން މަރުކަޒީ ބޭންކުގެ ލަފައަކީ މުސާރަތައް އެއްފަހަރާ ބޮޑު ނުކޮށް ބައިބަޔަށް ބަހާލައިގެން ބޮޑުކުރުންކަމަށެވެ. އެއްފަހަރާ މުސާރަތައް ބޮޑުކޮށްފިނަމަ އެކަމުގެ ނޭދެވޭ އަސަރު އިގްތިސާދަށް ކުރާނޭކަމަށެވެ.
މުސާރަ އިތުރުވެގެންދާއިރު އަޅުގަނޑުމެން އެންމެ މުހިންމު ލަފައެއްގަ ދީފައި އިންނާނީ ބަހާލައިގެން ކުރިއަށްގެންދިއުން. މާނައަކީ އެއްފަހަރާ ހުރިހާ މުސާރަތަކެއް ބޮޑުކޮށްފި ކަމުގައިވާނަމަ އޭގެ ޕްރެޝަރު ހަމަ ހަމަ އިކޮނޮމީއަށް އަންނާނެ. އެއީ ހާއްސަކޮށް އަޅުގަނޑުމެންގެ ފޮރިން އެކްސްޗޭންޖް މާކެޓުގައި މިހާރު އޮތް ޕްރެޝަރަށްވުރެ އިތުރު ޕްރެޝަރެއް އިތުރުވެގެން ހަމަ ގޮސްދާނެ. އެހެންވީމަ އެއީ އެންމެ މުހިންމު ކަމަކަށް އަޅުގަނޑު ގަބޫލުކުރަނީ
ގަވަރުނަރު މުނައްވަރު
ވަޒީރު އިތުރަށް ވިދާޅުވީ ބޭރުގައި ކުރަމުންދާ ހަނގުރާމަތަކާ ގުޅިގެން ތެލުގެ އަގުބޮޑުވުމަކީ ކުރިމަތިވާ ވަރަށްބޮޑު ގޮންޖެހުމެއްކަން ފާހަގަކުރައްވަމުން ގަވަރުނަރު ވިދާޅުވީ ރައްޖޭގައި ތެލުގެ ރިޒާވް އިތުރުކުރުމަކީ ކުރިމަތިވާ އެފަދަ ނޭދެވޭ ކަންކަމުން އަރައިގަތުމަށް ކުރަންޖެހިފައިވާ ވަރަށް މުހިންމު ކަމެއް ކަމަށެވެ.
ތެލުގެ ރިޒާވް އިތުރުކުރެވިއްޖެނަމަ ދުނިޔޭގެ ބާޒާރުގައި ތެލުގެ އަގުބޮޑުވާ ވަގުތުގައި ތެލަށް ކުރަންޖެހޭ ހަރަދު ކުޑަކުރެވިގެންދާނޭކަން ފާހަގަކުރައްވަމުން ގަވަރުނަރު ވަނީ މިކަމަކީ މަޖިލީހުގެ އެހީތެރިކަމާއެކު ކޮންމެހެންވެސް ކުރަންޖެހޭ ކަމެއްކަން ފާހަގަކުރައްވާފައެވެ.
މިއަދުގެ ބަޖެޓް ކޮމިޓީ ބައްދަލުވުމުގައި މަރުކަޒީ ބޭންކުން ވަނީ އަންނަ އަހަރު އެއްފަހަރާ ބޮޑު ދަރަންޏެއް ދައްކަން ޖެހޭއިރު އެކަމަށްވެސް ތައްޔާރުވާންޖެހޭކަން ފާހަގަކޮށްފައެވެ.
ބޭރުގެ އެކި ފަރާތްތަކުން ނަގާފައިވާ ދަރަނީގެ ތެރެއިން އަންނަ އަހަރުގެ އޭޕްރިލްމަހު އެކަނިވެސް ރައްޖެއިން 600 މިލިއަން ޑޮލަރު ދައްކަންޖެހޭކަމަށް ފިނޭންސް މިނިސްޓަރު މޫސާ ޒަމީރު މޫސާ ޒަމީރު ވަނީ ބަަޖެޓް ހުށަހަޅުއްވަމުން ވިދާޅުވެފައެވެ. ކުރިއަށްއޮތް އަހަރު ވެގެންދާނީ ރާއްޖޭގެ ތާރީހުގައިވެސް އެންމެ ބޮޑު އަދަދަކުން ދަރަނިތައް ދައްކަންޖެހޭނެ އަހަރަށްކަމަށް މާލީ ވުޒާރާއިން ވަނީ މީގެކުރިންވެސް ބުނެފައެވެ. އެގޮތުން ބޭރުގެ އެކި ފަރާތްތަކުން ނަގާފައިވާ ލޯނުތަކުގެ އިންޓަރެސްޓާއެކު 1 ބިލިއަނަށްވުރެ ގިނަ ޑޮލަރު ބޭރުގެ އެކި ފަރާތްތަކަށް ދައްކަންޖެހެއެވެ.
Advertisement
This content is created and paid for by advertisers and does not involve Voice Journalists
