ދައުލަތުގެ އާމްދަނީގެ ކުރިއެރުން މިހާރު ދެމެހެއްޓެނިވި ގޮތެއްގައި ހިފެހެއްޓިފައިވާކަމަށް ފިނޭންސް މިނިސްޓްރީން ބުނެފިއެވެ.

މާލީ ވުޒާރާއިން ޝާއިއުކުރަމުން އަންނަ ވީކްލީ ފިސްކަލް ޑިވެލޮޕްމަންޓްސް ރިޕޯޓަށް ރިޔާއަތްކޮށް މިއަދު އެ ވުޒާރާއިން ބުނެފައިވަނީ، ސަރުކާރުން މުސާރަތައް އެއްހަމަކޮށްފައިވާއިރު، އާމްދަނީގެ ކުރިއެރުން ދެމެހެއްޓެނިވި ގޮތެއްގައި ހިފެހެއްޓިފައިވާ ކަމަށެވެ. 

މާލީ ވުޒާރާއިން އެންމެފަހުން ނެރުނު ވީކްލީ ފިސްކަލް ރިޕޯޓަށް ބަލާއިރު، އަހަރުގެ މިހާތަނަށް ދައުލަތުގެ ބައިތުލް މާލަށް އާމްދަނީއާއި ހިލޭ އެހީގެ ގޮތުގައި ވަނީ 33.2 ބިލިއަން ރުފިޔާ ލިބިފައެވެ. މިއީ ކުރީ އަހަރުގެ މި މުއްދަތާ އަޅާބަލާއިރު، 9.9 އިންސައްތަ އިތުރު އަދަދެކެވެ. މިދިޔަ އަހަރުގެ މި މުއްދަތުގެ ތެރޭގައި ދައުލަތުގެ ބައިތުލްމާލަށް ލިބުނު އާމްދަނީ ހުރީ 30.3 ބިލިއަން ރުފިޔާގައެވެ.

އަހަރުގެ މިހާތަނަށް ދައުލަތަށް ލިބުނު އާމްދަނީއަށް ބަލާއިރު، މުދަލާ ހިދުމަތުގެ އަގުން ނަގާ ޓެކުހުން ވަނީ 13.5 ބިލިއަން ރުފިޔާ ލިބިފައެވެ. މިއީ 11.5 އިންސައްތަ އިތުރުވުމެކެވެ. އަހަރުގެ މިހާތަށް ޖީއެސްޓީގެ ގޮތުގައި ލިބުނު އަދަދު އިތުރުވުމުގެ މައިގަނޑު ސަބަބަކީ، މި އަހަރުގެ ޖުލައި 1 އިން ފެށިގެން ޓޫރިޒަމް ޖީ.އެސް.ޓީ ނުވަތަ ޓީ-ޖީ.އެސް.ޓީ ރޭޓު %17 އަށް ބޮޑުކުރި އަދަދުން ނަގަން ފެށުމެވެ.

ދައުލަތުގެ ޚަރަދުތަކަށް ބަލާއިރު، އަހަރުގެ މިހާތަނަށް ޖުމްލަ ޚަރަދުތައް ހުރީ 34.1 ބިލިއަން ރުފިޔާގައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 13.5 އިންސައްތަ ދަށްވުމެކެވެ. މިދިޔަ އަހަރު ދައުލަތުގެ ހަރަދުތައް ހުރީ 39.4 ބިލިއަން ރުފިޔާގައެވެ. ބަޖެޓުން ކުރި ހޭދައަސް ބަލާއިރު ސަރުކާރު ހިންގުމުގެ ޚަރަދުތައް ވަނީ 10.7 އިންސައްތައިން ދަށްކޮށް މިދިޔަ އަހަރާ އަޅައިބަލާއިރު 2.0 ބިލިއަން ރުފިޔާއިން ޚަރަދުތައް ކުޑަކޮށްފައިވެއެވެ.

މި މުއްދަތުގެ ތެރޭގައި ސަރުކާރުން ދޭ އެހީ އިޝްތިރާކާއި ސަބްސިޑީސްއަށް ކުރާ ޚަރަދުތައް ވަނީ 4.0 އިންސައްތައިން ކުޑަކޮށްފައިވެއެވެ. ސަބްސިޑީއަށް ކަނޑައަޅާފައިވާ ބަޖެޓަށްވުރެ އިތުރު ނަމަވެސް، މިބަޔަށް ހިނގާފައިވާ ޚަރަދުތައް ފާއިތުވި އަހަރާ އަޅައިބަލާއިރު 11.1 އިންސައްތަ ދަށްކަމަށް ރިޕޯޓުން ދަށްކާއިރު، މީގެ މައިގަނޑު ސަބަބަކީ ދުނިޔޭގެ ބާޒާރުގައި ތެލުގެ އަގުތައް ދަށްވުންކަމަށް މާލީ ވުޒާރާއިން ބުނެއެވެ.