ސަޔަކީ މުޅި ދުނިޔޭގައިވެސް އެންމެ މަގުބޫލު އެއް ބުއިމެވެ. އޭގެ މީރު ރަހައާއި، ހިތްގައިމު ވަހާއި، އެއިން ލިބިދޭ ސިއްހީ ފައިދާތަކަށްޓަކައި ސައިވެފައި މިވަނީ ވަރަށް ޑިމާންޑްބޮޑު އެއްޗަކަށެވެ.

ސައިން ލިބޭ ސިއްޙީ ފައިދާއަށް ބަލާއިރު އެއީ ހިތުގެ ދުޅަހެޔޮކަމަށާ އެހީވެދޭ، އެންޓިއޮކްސިޑެންޓްސް ހިމެނޭ، މެޓަބޮލިޒަމް ހަލުވިކޮށް، ހިތް ހަމަޖައްސައިދޭ މާއްދާތައް ހިމެނޭ އެއްޗެކެވެ.

ނަމަވެސް، ސައި ބޯއިރު ސަޔާއެކު ކާ ތަކެއްޗަށްވެސް ސަމާލުވާންޖެހެއެވެ. އެހެނީ، ސަޔާއެކު ކާ އެއްޗެއްގެ ސަބަބުންވެސް އޭގެ ރަހައާއި ލިބިދޭ ފައިދާތަކަށް އަސަރު ކުރުވައެވެ. އެހެންކަމުން، ސަޔާއެކު ނުކާންވީ ތަކެތި ދެނެގަތުމަކީ، ސައިގެ ރަހަ އާއި ސިއްހީ ފައިދާތައް ފުރިހަމައަށް ހާސިލުކުރުމަށް އެހީތެރިވެދޭނެ ކަމަކަށްވާއިރު މި ލިޔުމުގައި މި އަލިއަޅުވާލަނީ އެތަކެތީގެ މައްޗަށެވެ. 

ސަޔަށް ކިރު އެޅުމަކީ ބައެއް މީހުން އާންމުކޮށް ކުރާ ކަމެކެވެ. ނަމަވެސް، ސަޔާއެކު ޗީޒް، ޔޯގަޓް، ނުވަތަ ކްރީމް ފަދަ އެހެން ކިރުގެ ބާވަތްތައް ބޭނުންކުރުމަކީ އޭގެ ރަހައާއި ފައިދާއަށް އަސަރުކުރާ ކަމެކެވެ. ކިރުގެ ބާވަތްތަކުގައި ހުންނަ ޕްރޮޓީންތަކަކީ، ސައިގައި ހިމެނޭ ކެޓެކިންސް ނަމަކަށް ކިޔާ އެންޓިއޮކްސިޑެންޓްތަކާ ގުޅިގެން މަސައްކަތްކުރާ މާއްދާތަކެކެވެ.

ކެޓެކިންސް އެންޓިއޮކްސިޑެންޓްތަކަކީ ހަށިގަނޑުގައި އިންފްލެމޭޝަން މަދުކުރުމަށް، ހިތުގެ ދުޅަހެޔޮކަމަށް އަދި މެޓަބޮލިޒަމަށް އެހީތެރިވެދޭ އެއްޗަކަށްވާއިރު ކިރާއި އެކުވުމުން އެންޓިއޮކްސިޑެންޓް ތަކުގެ ބާރު ކުޑަވެއެވެ. 

ޖާނަލް އޮފް ފޮޓޯކެމިސްޓްރީ އެންޑް ފޮޓޯބަޔޮލޮޖީ ބީ: ބަޔޮލޮޖީ އިން ކުރި ދިރާސާއަކުން ހާމަވެފައިވާ ގޮތުގައި، ކިރުގައި ހުންނަ ޕްރޮޓީން އަލްފާ-ކެސެއިން އަކީ ސައިގައި ހުންނަ ޕޮލިފެނޯލްސްއާ ގުޅި، އެންޓިއޮކްސިޑެންޓްގެ މަސައްކަތް  ދަށްކޮށްލާ އެއްޗެކެވެ.

ހުތް ކާނާގެ ތެރޭގައި ހިމެނޭ، އޮރެންޖު، ލުނބޯ ފަދަ ތަކެއްޗަކީ ވިޓަމިން ސީ އިން މުއްސަނދި މޭވާއެވެ. ނަމަވެސް ސަޔާއެކު ހުތް މޭވާ ބޭނުން ކުރުމަކީ ސައިގައި ހިތި ރަހަލާނެ ކަމެކެވެ. އަދި އޭގެ ސަބަބުން ބަނޑަށް އުނދަގޫ ވުމަކީވެސް އެކަށީގެންވާ ކަމެކެވެ. 

ސަޔާއެކު ކުޅި އެއްޗެހި ކެއުމަކީ މީހުން އާއްމުކޮށް ކޮށްއުޅޭ ކަމެއް ނަމަވެސް،  ކުޅި އެއްޗެހީގައި ހިމެނޭ ބައެއް މާއްދާތައް ސަޔާއެކުވުމުން، ގޭސްޓްރިކްވެ މެއިން ދިލަނެގުން ފަދަ ކަންކަން ދިމާވާނެއެވެ. ހަމަ އެހެންމެ، ކުޅި އެއްޗެހީގެ ސަބަބުން ސައިގެ މީރު ރަހައަށްވެސް އަސަރު ކުރުވައެވެ. 

ފައިބަރު ގިނަ ބާވަތްތައް، ރޯ ތަރުކާރީ، ހޯލް ގްރައިންސް ފަދަ ތަކެއްޗަކީ ހަޖަމުކުރުމަށް އެހީވެދޭ އެއްޗެއް ނަމަވެސް، ސަޔާއެކުވުމުން، އެތަކެތީގައި ހިމެނޭ ހަޖަމްކުރުމަށް އެހީވެދޭ މާއްދާގެ ބާރު ކުޑަކޮށްލައެވެ. އެހެނީ ސައިގައި އޮކްސްސެލޭޓް ހިމެނޭއިރު އެއީ ކެލްޝިއަމް، މެގްނީޒިއަމް އަދި އަޔަން އާއި އެކުވެ، އެ މާއްދާތަކުގެ ބާރު ކުޑަކޮށްލައެވެ.  

ހަ އެފަދައިން ޕްރޮޓީން ގިނަ، މަހުގެ ބާވަތްތަކާއި، ބިސް އަދި އަޔަން ގިނައިން ހިމެނޭ، ސްޕިނެޗް، ނަޓްސް އަދި ބީންސް ފަދަ ތަކެއްޗާއެކު ސައި ބުއިމުންވެސް އެ ތަކެތީގައި ހިމެނޭ މުހިންމު މާއްދާތަކުގެ ބާރު ކުޑަކޮށް، ސައިގެ ރަހައަށް ބަދަލުތައް ގެނުވައެވެ. 

އެހެންކަމުން ސަޔާއެކު ކައިބޮއި ހަދާ ތަކެއްޗާމެދު ސަމާލުވާން ޖެހެއެވެ.