ދުނިޔޭގެ އެކްސްޕޯ ބަލާލަން ދިޔަ އެތައް ބަޔަކު ސިއްސުވާލި އިންސާނުން ދޮންނަ މެޝިން، ޖަޕާނުގެ ބާޒާރަށް ނެރެ ވިއްކަން ފަށައިފިއެވެ. 

މި މެޝިނުގެ ޕްރޮޓޯޓައިޕް ނުވަތަ މޮޑެލްއެއް، "ފިއުޗަރ ހިއުމަން ވޮޝަރ" ގެ ނަމުގައި، މިދިޔަ އޮކްޓޯބަރު މަހު ނިމުނު އޮސާކާ ވޯލްޑް އެކްސްޕޯގައި ދައްކާފައިވެއެވެ.

މި އެކްސްޕޯއަށް 27 މިލިއަނަށް ވުރެ ގިނަ މީހުން ޒިޔާރަތްކޮށްފައިވާއިރު، މި މެޝިން ބަލާލުމަށް ދިގު ކިޔޫތައް ހެދިފައި ހުއްޓެވެ. ހަ މަސް ދުވަހަށް ދެމިގެންދިޔަ މި އެކްސްޕޯގައި މި މެޝިނަށް ވަރަށް ބޮޑު ސަމާލުކަމެއް ލިބިފައިވެއެވެ.

ޖަޕާނުގެ ކުންފުންޏެއް ކަމަށްވާ ސައިންސް އިން އުފައްދާފައިވާ މި އީޖާދަކީ، 1970 ވަނަ އަހަރު އޮސާކާގައި އެކްސްޕޯ ބޭއްވި އިރު ދެއްކި މިފަދަ އީޖާދެއްގެ އަޕްޑޭޓް ކޮށްފައިވާ ވަރޝަންއެކެވެ. ސައިންސްގެ ތަރުޖަމާނު ސާޗިކޯ މައެކުރާ އެއެފްޕީއަށް ބުނީ، ކުންފުނީގެ ރައީސްއަށް މި އީޖާދުގެ ހިޔާލު ލިބިފައިވަނީ، 10 އަހަރުގެ ކުއްޖެއްގެ ގޮތުގައި 1970 ވަނަ އަހަރުގެ އެކްސްޕޯއަށް ކުރި ޒިޔާރަތުގައި ކަމަށެވެ.

މައެކުރާ އިތުރަށް ބުނީ، މި މެޝިނަކީ ހަމައެކަނި ހަށިގަނޑު ދޮންނަ މެޝިނެއް ނޫން ކަމަށާއި، ”ރޫހު“ވެސް ދޮންނަ މެޝިނެއް ކަމަށެވެ. މީގެ އިތުރުން، މި މެޝިނުން، އެ ބޭނުންކުރާ މީހުންގެ ހިތުގެ ވިންދާއި އެހެނިހެން މުހިންމު ސިއްހީ މައުލޫމާތުތައް ވެސް މޮނިޓަރ ކުރެއެވެ.

މި މެޝިން ބޭނުންކުރާ ގޮތަށް ބަލާއިރު، ބޭނުންކުރާ މީހާ ޕޮޑުގެ ތެރެއަށް ވަދެ، އިށީނދެ އޭގެ މަތި ޖަހައި ޖައްސާލުމުން، ހެދުން ދޮންނަ މެޝިނެއްގައި ހެދުން ދޮންނަ ގޮތަށް ސާފުކޮށް މީހާ ދޮވެދޭނެއެވެ. ނަމަވެސް އެ މެށިން އެނބުރޭ ގޮތަށް މި މެށިނެއް ނުވެއް އެނބުރޭނެއެވެ.

އޮސާކާގެ ހޮޓެލަކުން މިފަދަ ފުރަތަމަ މެޝިން ގަނެފައިވާއިރު، އެ ހޮޓެލްގެ މެހެމާނުންނަށް މި ހިދުމަތް ދިނުމަށް ތައްޔާރުވަމުންދާ ކަމަށް ތަރުޖަމާނު ބުންޏެވެ.

މީގެ އިތުރުން، ޖަޕާނުގެ ކޮންސިއުމަރ އިލެކްޓްރޯނިކްސްގެ ބޮޑު ރީޓެއިލް ޗެއިނެއް ކަމަށްވާ ޔަމަދާ ދެންކީ އިން ވެސް ވަނީ މި މެޝިން ގަނެފައެވެ. އެ ކުންފުނީގެ އުންމީދަކީ މި މެޝިންގެ ސަބަބުން ގިނަ ބަޔަކު އެމީހުންގެ އައުޓްލެޓްތަކަށް ޒިޔާރަތްކުރުން ކަމަށްވެސް މައެކުރާ ބުނެފައިވެއެވެ.

މީގެ އިތުރުން މައެކުރާ ބުނިގޮތިގައި އެކުންފުނިން އުފައްދަން ނިންމާފައިވަނީ މިކަހަލަ، ޖުމްލަ 50 މެޝިން އެކަންޏެވެ.

އެކި މީޑިއާ ރިޕޯޓުތައް ބުނާ ގޮތުގައި، މި މެޝިނުގެ އަގަކީ 60 މިލިއަން ޔެން (385,000 ޑޮލަރު) އެވެ.