ރ.އަތޮޅު ކަނދޮޅޫދޫގައި ކޯލްޑް ސްޓޯރޭޖަކާއި ފާނަ ޕްރޮސެސްކުރާ ފެސިލިޓީއެއްގެ އިތުރުން މަސްބަނދަރެއް ގާއިމްކުރުމަށް އަމިއްލަ ކުންފުންޏަކާ ހަވާލުކޮށްފިއެވެ.
ސަރުކާރުން މި މަޝްރޫޢު ހަވާލުކޮށްފައިވަނީ ދިވެހި ކުންފުންޏެއްކަމަށްވާ ތްރީ ވޭ އެންޓަޕްރައިސެސް އާއެވެ. މިކަމަށްޓަކައި މިރޭ ދުވާފަރުގައި ބޭއްވި މަސްވެރިކަމުގެ ހާއްސަ ޖަލްސާގައި ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ، މަސްވެރިކަމާއި ކަނޑުގެ ވަސީލަތްތަކާބެހޭ މިނިސްޓަރު އަޙުމަދު ޝިޔާމްއެވެ. މަސައްކަތް ކުރާ ކޮންޓްރެކްޓަރުގެ ފަރާތުން ސޮއިކުރެއްވީ މެނޭޖިން ޑިރެކްޓަރ ޙަސަން އިބްރާޙިމްއެވެ.
ކަނދޮޅުދޫގައި މަސްވެރިކަމުގެ އިންފްރާސްޓަކްޗަރ ގާއިމްކުރުމުގެ އެއްބަސްވުމުގައި ސޮއިކުރުމުގެ ތެރެއިން... ފޮޓޯ: ވޮއިސް
މި މަޝްރޫޢުއާ ގުޅޭގޮތުން މަސްވެރިކަމާ ބެހޭ ވުޒާރާއިން ބުނީ، ކަނދޮޅުދޫގައި ކޯލްޑް ސްޓޯރޭޖަކާއި ފާނަ މަސް ޕްރޮސެސްކުރާ ފެސިލިޓީގެ އިތުރުން މަސްވެރިކަމުގެ އުޅަނދުތައް ކައިރިކުރުމަށް ވަސީލަތްތައް ހިމެނޭ ބަނދަރެއްވެސް ތަރައްޤީކުރެވިގެންދާނޭކަމަށެވެ.
ސުނާމީއަށްފަހު ރ.އަތޮޅު ކަނދޮޅުދޫއަކީ މީހުން ދިރި ނޫޅޭ ރަށެއްގެ ގޮތުގައި ހަމަޖައްސާފައިވާ ރަށެކެވެ. އޭގެ ކުރިން އެރަށަކީ ރާއްޖޭގެ ނިސްބަތުންވެސް މަސްވެރިކަމުގައި އެންމެ ފާހަގަކޮށްލެވޭ އެ ރަށެވެ.
Advertisement
This content is created and paid for by advertisers and does not involve Voice Journalists
