ރާއްޖޭގެ 10 އަތޮޅެއްގެ 24 ރަށެއްގައި ސޯލާ ޕީވީ (ފޮޓޯވޮލްޓައިކް) ސިސްޓަމް ބެހެއްޓުމަށް ސަރުކާރުން ކުރަމުންގެންދާ މަސައްކަތުގެ ދަށުން ރ. އިންނަމާދޫގައިވެސް އެ މަސައްކަތް ކުރަމުންދާކަމަށް ފަތުރުވެރިކަމާއި ތިމާވެއްޓާ ބެހޭ ވުޒާރާއިން ބުނެފިއެވެ. 

އެ ވުޒާރާއިން އިއްޔެ ސޯޝަލް މީޑިއާގައި އާއްމުކުރި މައުލޫމާތު ތަކުގައި ވާގޮތުން 'ސްޓޭޓް-އޮފް-ދަ-އާޓް-ސޯލާ-ޑީސަލް-ބެޓެރީ ހައިބްރިޑް ސިސްޓަމް' ގެ ދަށުން އިންނަމާދޫގައި ގާއިމުކުރެވެމުން ދަނީ 350 ކިލޯވޮޓްގެ ސޯލާ ފޮޓޯވޮލްޓިކް (ޕީވީ) ސިސްޓަމަކާއި 618 ކިލޯވޮޓް ބެޓެރީ އެނާޖީ ސްޓޯރޭޖް ސިސްޓަމް (ބީއީއެސްއެސް) ހިމެނޭނެހެން އެންމެ ޒަމާނީ ހައިބްރިޑް ސިސްޓަމެކެވެ.

މިނިސްޓްރީއިން މައުލޫމާތު ދޭގޮތުގައި މި ނިޒާމު ހިންގަން ފެށުމުން އެރަށުގައި ހަކަތަ ބޭނުންކުރާ ގޮތަށް ބޮޑު އަސަރެއް ކޮށް، އަހަރަކު 164،672 ލީޓަރުގެ ޑީސަލް ސަލާމަތްވެ، ޖައްވަށް ދޫކުރާ ކާބަންޑައޮކްސައިޑް ކޮންމެ އަހަރަކު 403 ޓަނު މަދުކުރެވޭނެއެވެ.

މި މަޝްރޫއަކީ 2028 ވަނަ އަހަރުގެ ނިޔަލަށް ރާއްޖޭގައި ބޭނުންކުރާ ކަރަންޓުގެ %33 އިއާދަކުރަނިވި ހަކަތަ މެދުވެރިކޮށް ފޯރުކޮށްދިނުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގެންގުޅުއްވާ ސިޔާސަތުގެ ދަށުން ހިންގޭ މުހިންމު މަޝްރޫއެކެވެ.