އަދުގެ ސަރުކާރުގެ ބޯހިޔާވަހިކަމުގެ ސިޔާސަތުތަކުގެ ތެރޭގައި ހިމެނޭ އެންމެ އުއްމީދީ މަޝްރޫޢު ކަމަށްވާ "ރަސްމާލެ" ހިއްކުމަށް ފަށާފައިވާ މަސައްކަތުގެ ދަށުން ސައިޓް އޭއިން 23 ހެކްޓަރު ހިއްކައި ނިމިފައިވާކަމަށް އެމްއޭސީއެލުން ބުނެފިއެވެ.

ރަސްމާލެ ހިއްކުމުގެ މަސައްކަތުގެ ކަންކަން މިހާރު ކުރިއަށްގެންދަނީ އެމްއޭސީއެލްގެ ބެލުމުގެ ދަށުންނެވެ. މަޝްރޫޢުގެ މަސައްކަތް ކުރިއަށްދާގޮތާ ބެހޭގޮތުން އެމްއޭސީއެލުން އެކްސްގައި ކުރި ޕޯސްޓެއްގައި ބުނެފައިވަނީ ސައިޓް އޭއިން ހިއްކަންޖެހޭ %17 މަސައްކަތް ނިމިފައިވާކަމަށެވެ. ސައިޓް އޭއިން ހިއްކުމަށް ކަނޑައަޅާފައިވަނީ 137.5 ހެކްޓަރެވެ. 

ރަސްމާލެ ހިއްކުމުގެ ތެރެއިން 

ރަސްމާލެ ހިއްކުމުގެ މަސައްކަތް ކުރުމަށް ގެނައި ދެ ޑްރެޖަރާއެކު އެ މަޝްރޫޢުގެ މަސައްކަތް ވަރަށް ބާރުސްޕީޑުގައި ކުރިއަށްދާ ރަސްމާލެފަޅުން މިހާތަނަށް 215 ހެކްޓަރަށްވުރެ ބޮޑު ސަރަހައްދެއް ވަނީ ހިއްކާފައެވެ.

ރަސްމާލެ ހިއްްކުމުގެ މަޝްރޫއު ކުރިއަށް ގެންދަނީ މުޅި ދުނިޔޭއިންވެސް އެންމެ ބޮޑު އެއް ޑްރެޖަރު ކަމަށްވާ 'ކްރިސްޓޯބަލް ކޮލޯން' ޑްރެޖަރު ބޭނުންކޮށްގެންނެވެ. މި ޑްރެޖަރު ރާއްޖެ ގެނެސް މަސައްކަތް ފަށާފައިވަނީ މިމަހުގެ 1 ވަނަ ދުވަހެވެ. ރައީސުލްޖުމްހޫރިއްޔާ ވިދާޅުވިގޮތުގައި މި ޑްރެޖަރުގެ ސަބަބުން ރަސްމާލެ ހިއްކުމުގެ މަސައްކަތް 3 ގުނައަށް އިތުރުވެގެންދާނެއެވެ.  

ރަސްމާލެ ހިއްކުމުގެ ތެރެއިން.. ފޮޓޯ: އެމްއޭސީއެލް 

ރައީސުލްޖުމްހޫރިއްޔާގެ އުއްމީދީ މަޝްރޫޢުކަމަށްވާ "ރަސްމާލެ" އަކީ ދުނިޔޭގެވެސް ފުރަތަމަ އީކޯ ސިޓީގެ ގޮތުގައި ތަރައްޤީކުރާ ރަށެވެ. އަދި ރަސްމާލޭގެ އިތުރުން، ހުޅުމާލެ 3 ވަނަ ފިޔަވައްސާއި ގުޅީފަޅު ހިއްކުމުގެ މަސައްކަތް ވެސް ސަރުކާރުން ގެންދަނީ ހަލުވި ކަމާއިއެކު ކުރިއަށްގެންދަވަމުންނެވެ.

ރަސްމާލެއިން ޖުމްލަ 25000 ގޯތި ދޫކުރުމަށް ހަމަޖެހިފައިވާއިރު، ފުރަތަމަ ބުރުގައި އެކަނިވެސް 15000 ގޯތިދޫކުރުމަށް ނިންމާފައިވާކަމަށް ރައީސް ޑރ.މުއިއްޒު ވަނީ ވިދާޅުވެފައެވެ. ރަސްމާލެ ހިއްކުމުގެ މަސައްކަތް ނިންމުމަށް ސަރުކާރުން އަމާޒު ހިފާފައިވަނީ އަންނަ އަހަރުގެ އޭޕްރިލްމަހުގެ ތެރޭގައެވެ. ރަސްމާލެ ހިއްކާ ނިންމުމަށްޓަކައި ފަޅުގެ ތިން ސަރަހައްދަކުން ހިއްކުމުގެ މަސައްކަތް ކުރިއަށްގެންދާކަން ފާހަގަކޮށްލެވެއެވެ.

ކ. ފުށިދިއްގަރުފަޅުގައި ރަސްމާލެ މަޝްރޫއުގެ އަމަލީ މަސައްކަތް ފެއްޓެވީ 2023ވަނަ އަހަރުގެ ޑިސެމްބަރު މަހު އެވެ. ތިމާވެއްޓާ ރައްޓެހި "އިކޯ ސިޓީ" އެއްގެގޮތުގައި ތަރައްގީ ކުރާ ރަސްމާލެ ތަރައްގީ ކުރުމަށް 1،153 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ