އިރާނުން ތެލް އަވީވަށް އަސްކަރީ ހަމަލާއެއް ދީފިނަމަ ރައްދުގައި ވަރުގަދަ ހަމަލާތަކެއް ދޭނެކަމުގެ އިންޒާރު ބެންޖަމިން ނަތަންޔާހޫ ދީފިއެވެ.
ނަތަންޔާހޫ މި އިންޒާރު ދިނީ އިއްޔެ ބޭއްވި ނޫސްވެރިންގެ ބައްދަލުވުމުގައެވެ.
"އިޒްރޭލާ ދެކޮޅަށް ދޭ ކޮންމެ ހަމަލާއެއްގެ ބަދަލުގައި ވަރަށް ހަރުކަށި ރައްދެއް ދޭނަން."ނަތަންޔާހޫ ބުންޏެވެ.
މިފަހަކަށް އައިސް އިޒްރޭލާއި އިރާނާ ދެމެދު ވަނީ ނުތަނަވަސްކަން އިތުރުވެފައެވެ. އެގޮތުން އިޒްރޭލުން ވަނީ އިރާނުން ބެލިސްޓިކް މިސައިލް އުފެއްދުން އަވަސްކުރަމުންދާ ކަމަށް ތުހުމަތުކޮށްފައެވެ.
އެގޮތުން، މިދިޔަ ޖޫން މަހުގެ 13 ވަނަ ދުވަހު އިޒްރޭލުން ވަނީ އިރާނުގެ ޢަސްކަރީ، ނިއުކްލިއަރ އަދި ސިވިލް ސައިޓުތަކަށާއި، އިސް އަސްކަރީ ކޮމާންޑަރުންނާއި ނިއުކްލިއަރ ސައިންޓިސްޓުންނަށް އަމާޒުކޮށްވެސް ހަމަލާތަކެއް ދީފައެވެ.
މި ހަމަލާ އިޒްރޭލުން ދިނީ، ނިއުކްލިއަރ މަޝްވަރާތަކެއް ކުރިއަށްދަނިކޮށް އިރާނަށް ހަމަލާނުދިނުމަށް އެމެރިކާއިން އިންޒާރު ދީފައިވަނިކޮށެވެ.
އިޒްރޭލުން ދިން މި ހަމަލާއަށް ރައްދު ދިނުމުގެ ގޮތުން އިރާނުން ވަނީ މިސައިލާއި ޑްރޯން ހަމަލާތަކެއް ދީފައެވެ. އެއާގުޅިގެން އެމެރިކާއިން ވަނީ އިރާނުގެ ތިން ނިއުކްލިއަރ ސައިޓަކަށް ބޮން އަޅާފައެވެ.
ޖުމްލަ 12 ދުވަހުގެ މި ހަނގުރާމަ ހުއްޓުނީ ޖޫން މަހުގެ 24 ވަނަ ދުވަހު އެމެރިކާގެ ބައިވެރިވުމާއެކު ހެދުނު ހަނގުރާމަ ހުއްޓާލުމުގެ އެއްބަސްވުމެއްގެ ދަށުންނެވެ.
Advertisement
This content is created and paid for by advertisers and does not involve Voice Journalists
