މެލޭޝިއާގެ ކުރީގެ ބޮޑުވަޒީރު ނަޖީބް ރާޒާގުގެ މައްޗަށް، އެގައުމުގެ ތާރީޚުގައި ހިނގި އެންމެ ބޮޑު ކޮރަޕްޝަން މައްސަލައިގައި ބައިވެރިވި ކަމުގެ ކުށް ސާބިތުވެއްޖެއެވެ. މެލޭޝިއާގެ ތާރީޚުގައި ހިނގި އެންމެ ބޮޑު ސްކޭންޑަލް ކަމަށްވާ މަލްޓި ބިލިއަން ޑޮލަރު ސްކޭންޑަލް 1އެމްޑީބީ މައްސަލަ ފެންމަތިވެފައިވަނީ މީގެ ދިހަ ވަރަކަށް އަހަރު ކުރިންނެވެ. 

ކުއާލާލަމްޕޫރު ހައިކޯޓުން ހުކުރު ދުވަހު ނެރުނު މި ނިންމުމުގައި، 72 އަހަރުގެ ނަޖީބް ރާޒާގުގެ މައްޗަށް ބާރުގެ ނަހަމަ ބޭނުންކުރުމުގެ ހަތަރު ދަޢުވާ އާއި، 1MDB އިން ގަވާއިދާ ޚިލާފަށް 2.2 ބިލިއަން މެލޭޝިއަން ރިންގިޓް (539 މިލިއަން ޑޮލަރު) އޭނާގެ އަމިއްލަ އެކައުންޓުތަކަށް ބަދަލުކުރުމާ ގުޅޭގޮތުން މަނީ ލޯންޑަރިންގެ 21 ދަޢުވާ ސާބިތުވެފައިވެއެވެ.

ޕްރޮސެކިއުޓަރުން ބުނާ ގޮތުގައި، ނަޖީބް ރާޒާގު ވަނީ ބޮޑުވަޒީރުކަމާއި، ފިނޭންސް މިނިސްޓަރުކަމާއި، 1MDB އެޑްވައިޒަރީ ބޯޑުގެ ޗެއާމަންކަމުގެ މަޤާމުގެ ނާޖާއިޒު ފައިދާ ނަގާ، މެލޭޝިއާގެ ސޮވަރިން ވެލްތު ފަންޑުން ގިނަ އަދަދެއްގެ ފައިސާ އޭނާގެ އަމިއްލަ އެކައުންޓުތަކަށް ބަދަލުކޮށްފައެވެ.

ނަޖީބް ރާޒާގު ވަނީ މީގެ ކުރިން 2020 ވަނަ އަހަރު، 1MDB ފަންޑުން ގާތްގަނޑަކަށް 9.9 މިލިއަން ޑޮލަރު ނަހަމަގޮތުގައި ބޭނުންކުރުމުގެ ކުށުގައި ކުށްވެރިވެ 12 އަހަރުގެ ޖަލު ހުކުމެއް ކޮށްފައެވެ. ނަމަވެސް، ފަހުން އޭނާގެ ހުކުމް ހަ އަހަރަށް ކުޑަކުރެވުނެވެ. މި ޝަރީޢަތަކީ ނަޖީބް ރާޒާގުގެ ދެވަނަ ޝަރީޢަތް ނަމަވެސް، 1MDB ގެ ކުންފުނިތަކާއި، ވަރަށް ގިނަ އަދަދެއްގެ ފައިސާ މި މައްސަލައިގައި ސީދާ ބައިވެރިވާތީ، މިއީ މިހާތަނަށް ހިނގި އެންމެ މުހިންމު ޝަރީޢަތެވެ 

މި މައްސަލައިގެ ޝަރީޢަތުގެ މަރުޙަލާ ހަތް އަހަރަށް ދެމިގެން ގޮސްފައިވާއިރު، ޝަރީޢަތަށް 76 ހެކިން ހާޒިރުކޮށްފައިވެއެވެ. މި ހެކިންގެ ތެރޭގައި ނަޖީބް ރާޒާގު ވެސް ހިމެނެއެވެ.

ނޮޓިންގހަމް އޭޝިއާ ރިސަރޗް އިންސްޓިޓިއުޓް މެލޭޝިއާގެ އޮނަރަރީ ރިސަރޗް އެސޯސިއޭޓް ބްރިޖެޓް ވެލްޝް ބުނިގޮތުން މިފަދަ ފައިނޭންޝަލް ކުށްތަކަކީ ގިނަ ފަށަލަތަކެއް ހިމެނޭ ކަންތައްތަކެއް ކަމަށާއި، މިއީ ދިގު އަދި ފުޅާ މަސައްކަތެއް ކަމަށެވެ.

ނަޖީބް ރާޒާގު މިދިޔަ އަހަރު 1MDB ސްކެންޑަލް ހިންގި ގޮތާ މެދު މާފަށް އެދިފައިވީ ނަމަވެސް، އޭނާގެ މިފަހަރުގެ ޝަރީޢަތުގައި ދިފާޢުގައި ބުނެފައިވަނީ، 2016 ވަނަ އަހަރުން ފެށިގެން އިންޓަޕޯލް އިން ހޯދަމުންދާ އަދި މިހާރު ހުރި ތަނެއް ނޭނގޭ މެލޭޝިއާގެ މާލީ ކުށްވެރިޔާ ޖޯ ލޯ އޭނާ މަގުފުރައްދާފައިވާ ކަމަށެވެ.

ނަމަވެސް، ހުކުރު ދުވަހު ހިނގި ޝަރީޢަތުގެ ކަންކަމުގައި، ފަނޑިޔާރު ކޮލިން ލޯރެންސް ސެކެރާ ވަނީ ނަޖީބް ރާޒާގުގެ، އޭނާ އަތުލި ނަހަމަ ފައިސާގެ ތެރެއިން ބައެއް ފައިސާއަކީ ސަޢޫދީ ރޯޔަލް ފެމެލީގެ "ހަދިޔާ" ކަމަށް ބުނެ ދެއްކި ދިފާއާ މެދުވެސް ސުވާލުއުފައްދާފައެވެ.