އާ އަހަރަށް މަރުހަބާ ކިޔުމަށް މިއަދުން ފެށިގެން ތިން ދުވަހުގެ މުއްދަތަށް ހުޅުމާލޭގައި ހާއްސަ ފެސްޓިވަލެއް ބާއްވައި މާދަމާރޭ ޑްރޯން ޝޯ އަކާއެކު ހަވާ އަރުވަން ނިންމައިފި އެވެ.

ވިޒިޓް މޯލްޑިވްސް ކޯޕަރޭޝަނާއި، ފަތުރުވެރިކަމާ ތިމާވެއްޓާބެހޭ ވުޒާރާއާއި، ހައުސިންގ ޑިވެލޮޕްމެންޓް ކޯޕަރޭޝަން ގުޅިގެން ބާއްވާ މި ފެސްޓިވަލް އޮންނާނީ މިއަދު ހަވީރުން ފެށިގެން ޖެނުއަރީ 1އާ ހަމައަށް ހުޅުމާލެ ސެންޓްރަލް ޕާކުގައެވެ. 

މި ކަމާގުޅޭގޮތުން މައުލޫމާތު ދިނުމަށް މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޔޫތު މިނިސްޓަރު އިބްރާހިމް ވަހީދު ވިދާޅުވީ މިއީ ވަރަށް ގިނަ ކަންކަމުގެ ކާމިޔާބީ ފާހަގަ ކުރުމަށް ކުރިއަށް ގެންދާ ހަރަކާތެއް ކަމަށެވެ.

އަދި މި ފެސްޓިވަލްގައި ފުޑް ސްޓޯލްތަކުގެ އިތުރުން ކުޑަކުދިންނަށް ކަމުދާނެ ކުޅިވަރުތައް ވެސް ކުރިއަށް ގެންދާނެ ކަމަށް ވިދާޅުވިއެވެ.

ވިޒިޓް މޯލްޑިވްސްގެ މެނޭޖިން ޑިރެކްޓަރު އިބްރާހިމް ޝިއުރީ ވިދާޅުވީ މިދިޔަ އަހަރު އެއް ދުވަހުގެ މުއްދަތަށް ކުރިއަށް ގެންދިޔަ ފެސްޓިވަލަށް ލިބުނު ކާމިޔާބީއާ އެކު މި އަހަރުގެ ހަރަކާތް ތިން ދުވަހަށް ކުރިއަށް ގެންދަން ނިންމާފައިވާ ކަމަށެވެ.

”’ވިޒިޓް މޯލްޑިވްސް ކަލްޗާ އެންޑް ފުޑް ފެސްޓިވަލް‘ މި ބާއްވަނީ. މިއީ މީގެ ދެވަނަ އެޑިޝަން. މިދިޔަ އަހަރުވެސް ވަރަށް ކުލަގަދަކޮށް ކާމިޔާބު ކަމާއެކު ނިންމާލާފައި. ދެން މިދިޔަ އަހަރުގެ ކާމިޔާބީ ތަކަށް ބަލާފައި އަޅުގަނޑުމެން މި އަހަރުވަނީ މި ފެސްވަލް އިތުރު ތިން ދުވަހަށް ދަންމާލާފައި. މިއަދު ހަވީރު 4 އިން 6 އަށް އަދި ރޭގަނޑު 8 އިން 12 އަށް ކުރިއަށް ދާނެ. އަދި މާދަމާވެސް އެގޮތަށް، ޖަނަވަރީ 1 ވަނަ ދުވަހުވެސް..“

މީގެ އިތުރުން މިދިޔައަހަރެކޭ އެއްގޮތަށް މި އަހަރުވެސް ޑްރޯން ޝޯއެއް ފެނިގެންދާނެ ދާނެ ކަމަށާ އެ ހަރަކާތާއެކު ހަވާ އެރުވުން ވެސް ކުރިއަށް ދާނެ ކަމަށް ޝިއުރީ ވިދާޅުވުއެވެ. ޝިއުރީ ވިދާޅުވި ގޮތުގައި މިއަހަރުގެ ޑްރޯން ޝޯ ކުރީއަގމހަރާ ތަފާތު ވާނެއެވެ. އަދި އެ ޝޯގެ ތެރެއިން ތަފާތު ކަންކަން ފެނިގެންދާނެ ކަމަށްވެސް ވިދާޅުވިއެވެ. 

ޑްރޯން އާ ހަވާއެރުވުން ކުރިއަށްދާނީ މާދަމާރޭ 9 ޖަހާއިރު އެވެ. 

”މި އަހަރުގެ ޑްރޯން ޝޯގައި، ޑްރޯންގައި ފަޔާ ވޯކްސްވެސް ހިމެނިގެން ދާކަހަލަ ގޮތަކަށް ކުރިއަށްދާނީ. މިއީ މިގޮތަށް ރާއްޖޭގައި ބޭއްވޭ ފުރަތަމަ ޑްރޯން ޝޯ“ ޝިއުރީ ވިދާޅުވިއެވެ.