ވޭތުވެދިޔަ އަހަރުގެ މުހިންމު ހާދިސާތަކާއި ކާމިޔާބީތައް އެއްފޮތަކުން ފެންނާނެހެން އެކުލަވާލާފައިވާ "ނިމުނު 52 ހަފުތާ" ފޮތް ޕީއެސްއެމް ނިއުސްއިން ރަސްމީކޮށް ނެރެފިއެވެ. މިއީ ރާއްޖޭގައި މިފަދަ ގޮތަކަށް އަހަރީ ރިވިއުއެއްގެ ގޮތުގައި ނެރުނު ފުރަތަމަ ފޮތެވެ.
މި ފޮތް ނެރުމުގެ އެންމެ ބޮޑު މަޤްޞަދަކީ ވޭތުވެދިޔަ އަހަރުގެ މުހިންމު ތާރީޚުތަކާއި، ފާހަގަކޮށްލެވޭ ކަންކަމާއި، އެކިއެކި ޙާދިސާތައް ރެކޯޑުކޮށް ބެލެހެއްޓުމެވެ. މިއީ ކިޔަވާކުދިންނާއި، ނޫސްވެރިންގެ އިތުރުން ދިރާސާކުރާ ފަރާތްތަކަށް ބޭނުންވާނެ މުހިންމު މަޢުލޫމާތުތަކެއް އެއް ފޮތަކުން ރައްކާތެރިކަމާއެކު ލިބޭނެ މަގު ފަހިކޮށްދިނުމަށް އެޅުނު ފިޔަވަޅެކެވެ.
"ނިމުނު 52 ހަފުތާ" ފޮތުގައި ވޭތުވެދިޔަ އަހަރު ރާއްޖެ ކުރިމަތިލީ ގޮންޖެހުންތަކާއި، ހޯދި ބޮޑެތި ކާމިޔާބީތައް ވަނީ ތަފްޞީލީ ގޮތެއްގައި ހިމަނާފައެވެ. ޚާއްޞަކޮށް، ޚިދުމަތްތަކާ ގުޅިގެން ކުރެވުނު މަސައްކަތްތަކާއި، ދިވެހި ރައްޔިތުންގެ ކެތްތެރިކަމާއި އެއްބައިވަންތަކަމާއެކު ކުރިއަށް ދިޔަ ގޮތް މި ފޮތުން ރަމްޒުކޮށްދެއެވެ.
ޕީއެސްއެމްއިން މައުލޫމާތު ދޭގޮތުން މި ފޮތަކީ މުސްތަޤްބަލަށްޓަކައި އެކުލަވާލެވުނު މުހިންމު ރިފަރެންސެކެވެ. އެގޮތުން މާޒީގައި ކަންކަން ހިނގައިދިޔަ ގޮތް ލިޔެކިޔުމުން ފެންނަން އޮތުމަކީ، ކުރިއަށް އޮތް ތަނުގައި އެކިކަންކަން ރޭވުމުގައާއި، އަންނަ ބަދަލުތައް ދެނެގަތުމުގައި ބޭނުންކުރެވޭނެ އަގުހުރި ވަސީލަތެއްކަން ފާހަގަކޮށްލަންޖެހެއެވެ.
މި މަސައްކަތް އެކުލަވާލާފައިވަނީ ޕީއެސްއެމް ނިއުސްގެ ޓީމަކުންނެވެ. މިގޮތުން ނޫސްވެރިންނާއި، އެޑިޓަރުންނާއި، ޑިޒައިނަރުންގެ އިތުރުން ފޮޓޯގްރާފަރުން ވަނީ މި ފޮތް ފުރިހަމަކުރުމުގައި މަސައްކަތްތަކެއް ކޮށްފައިވާ ކަން ޕީއެސްއެމްއިން ފާހަގަކޮށްފައިވެއެވެ.
ޕީއެސްއެމް ނިއުސްއިން އިތުރަށް ބުނީ، ކޮންމެ އަހަރަކުވެސް ވޭތުވެދިޔަ އަހަރަށް ބަލާލައި މިފަދަ ފޮތެއް ނެރުމަށް ނިންމާފައިވާ ކަމަށެވެ.
Advertisement
This content is created and paid for by advertisers and does not involve Voice Journalists
