ޖިންސުންލަތީފުންގެ ޒާތީ ކަންކަމާ ގޮތްކިޔާތީ ކުރީގެ ރައީސް މުހައްމަދު ނަޝީދު ނުރުހުން ފާޅުކުރައްވައިފިއެވެ.

ސަރުކާރުގެ އޮފީސްތަކުގައި މަސައްކަތްކުރާ އަންހެން އަދި ފިރިހެން މުވައްޒަފުން ހެދުން އެޅުމުގައި ގެންގުޅެން ޖެހޭ މިންގަނޑުތަކާ ބެހޭ ޤަވާއިދު ގެޒެޓްކޮށްފައިވާއިރު އެ ޤަވާއިދުގައި ވަނީ ބައެއް ކަންކަން އިސްލާހްކުރަން އަންގާފައެވެ. އެގޮތުން ހެދުންއަޅަންޖެހޭ ގޮތާއި، ބޮލުގެ އިސްތަށިގަނޑު ހުންނަންޖެހޭ ގޮތް ފާހަގަކޮށްލެވެއެވެ.

މިކަމާ ގުޅޭގޮތުން ރައީސް ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ، މުސްލިމް ޖިންސުންލަތީފުންގެ ޒީނަތްތެރިކަމާއި ނަޒާހަތްތެރިކަން ހިފެހެއްޓުމުގެ ނަމުގައި އެބައިމީހުންގެ އެންމެ ޒާތީ ކަންތައްތަކާ ދައުލަތް ހިންގަންތިބި ފަރާތްތަކުން ގޮތްކިޔަމުން ގެންދާކަމަށެވެ. ރައީސް ނަޝީދު ވިދާޅުވީ ޖިންސުންލަތީފުންގެ ޒާތީ ކަންކަމުގެ ތެރެއަށް ދައުލަތުން ވަދެ، ގޮތް ކިޔައިދޭން ނުޖެހޭ ކަމަށެވެ.

ސަރުކާރުގެ އޮފީސްތަކުގައި މަސައްކަތްކުރާ މުއައްޒަފުން އޮފީހަށް އައުމުގައި ސިވިލްސާވިސް ކޮމިޝަނުން އެކުލަވާލި އައު އުސޫލްތަކާމެދު ރައީސް ނަޝީދު ނުރުހުން ފާޅުކުރެއްވިއިރު ކުރީގެ އިކޮނަމިކް މިނިސްޓަރު އަދި ކުރީގެ އެމްޑީޕީ ޗެއާޕާސަން ފައްޔާޒު އިސްމާޢިލް ވެސް ވަނީ އެކަމާމެދު ނުރުހުން ފާޅުކުރައްވާފައެވެ. 

ފައްޔާޒު އެކްސްގައި ކުރެއްވި ޕޯސްޓެއްގައި ވިދާޅުވީ، ރަޢީސް ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިފަހުން ހުރިހާ ކަމެއް ކުރައްވަމުން ދަނީ ހުދުމުހުތާރުކަން ދައްކަވައި ރައްޔިތުންގެ މައްޗަށް ވެރިވެގަތުމަށްކަމަށެވެ. ފައްޔާޒު ވިދާޅުވީ، ރައްޔިތުންނަކީ ތަންދޮރުނުދަންނަ ގަމާރު ބައެއް ކަމަށް ދެކިގެން އެ މީހުންގެ ޒާތީ ކަންކަމާ ބެހި އޮބިހެއްޓޭނެ ކަމަށް ސަރުކާރުން ދެކިގެން ނުވާނެ ކަމަށެވެ. އަދި ގާނޫނުއަސާސީއިން ކަށަވަރުކޮށްދޭ ހިޔާލާއި ފިކުރާއި ޒާތީ ދިރިއުޅުމުގެ މިނިވަންކަން ދިވެހިންނަށް މާ މުހިންމުކަމަށްވެސް ވިދާޅުވިއެވެ.

ސަރުކާރުގެ އޮފީސްތަކުގައި މަސައްކަތްކުރާ މުއައްޒަފުން ހެދުން އެޅުމުގައި އަލަށް އެކުލަވާލި މިންގަނޑުތަކަށް ބަލާއިރު، އަންހެން މުވައްޒަފުން ރަސްމީ މަސައްކަތަށް ނުކުންނައިރު އަޅާހެދުން ހުންނަންޖެހޭނީ ބުޑު ނިވާވާ ގޮތަށް ފަލަމަސްގަނޑާ ހަމައަށެވެ. އަދި ކަރުވަޅުވެސް ހުންނަންވާނީ ނިވާ ކޮށްފައެވެ. މި ގަވާއިދުގައި އަންހެން މުއައްޒަފުންގެ އިތުރުން ފިރިހެން މުވައްޒަފުންނަށްވެސް ވަނީ އުސޫލްތަކެއް ބަޔާންކޮށްފައެވެ.