އިނގިރޭސި ޕްރިމިއާ ލީގްގައި ރޭ މެންޗެސްޓަރ ސިޓީ އާއި ޗެލްސީ ބައްދަލުކުރިމެޗް އެއްވަރުވެގެން ނިމިއްޖެއެވެ. 

ސިޓީގެ އިއްތިހާދު ސްޓޭޑިއަމްގައި ކުޅުނު މިމެޗް ނިމުނީ 1-1 ގެ ނަތީޖާއަކުންނެވެ. މެޗަށް ޗެލްސީން ނިކުތީ، މިހާތަނަށް ކޯޗްކަމުގެ މަގާމުގައި ހުރި އެންޒޯ މަރެސްކާ އިސްތިއުފާ ދިނުމާ ގުޅިގެން ވަގުތީ ކޯޗެއްގެ ބެލުމުގެ ދަށުންނެވެ. މިމެޗްގައި ޗެލްސީގެ ޓީމަށް އިރުޝާދު ދީފައިވަނީ، މެކްފާލޭން އެވެ.

މެޗްގައި އެންމެ ފުރަތަމަ ލަނޑެއްޖަހައި ކުރި ހޯދީ މެންޗެސްޓަރ ސިޓީއެވެ. އެއީ ފުރަތަމަ ހާފް ނިމުމުގެ ކުރިން ރެއިންޑާސް ކާމިޔާބުކޮށްދިން ލަނޑުންނެވެ. ސިޓީން ލަނޑެއްޖަހައި ލީޑް ނަގާފައިވަނިކޮށް ޗެލްސީން އެއްވަރުކޮށްފައިވަނީ މެޗްގެ އިތުރުވަގުތުގެ ކުޅުމުގެ ތެރޭގައި ފެނާންޑެޒް އެވެ.

މެޗްގައި މޮޅަށް ކުޅެ ގިނަ ހަމަލާތައް ސިޓީން އުފެއްދިނަމަވެސް ޗެލްސީގެ ކުޅުންތެރިންވެސް ވަނީ ނުރައްކާތެރި ގިނަ ހަމަލާތަކެއް ފޮނުވާލާފައެވެ. 

ރޭގެ މެޗް އެއްވަރުވުމުން އެކަމުގެ ފައިދާ އެންމެ ބޮޑަށްކުރި ޓީމަކީ ތާވަލްގެ އެންމެ ކުރީގައި އޮތް އާސެނަލް އަށެވެ. މިމެޗުން މެންޗެސްޓަރ ސިޓީ މޮޅުވިނަމަ އާސެނަލް އާ ދެމެދު އޮތް ޕޮއިންޓް ފަރަގު 4 ޕޮއިންޓަށް ކުޑަކުރުމުގެ ފުރުސަތު ލިބުނީހެވެ. ނަމަވެސް މެޗް އެއްވަރުވުމުން ދެޓީމްގެ ދެމެދު މިހާރު 6 ޕޮއިންޓްގެ ފަރަގެއް އެބައޮތެވެ. 

ރޭގެ މެޗް އެއްވަރުވުމުން ތާވަލްގެ ހަތަރުވަނައަށް އެރުމަށް ޗެލްސީ ކުރަމުން އައި އުއްމީދުވެސް ވަނީ ގެއްލިފައެވެ. 

1- އާސެނަލް 48

2- މެންޗެސްޓަރ ސިޓީ 42

3- އެސްޓަން ވިލާ  42

4- ލިވަޕޫލް  34

5- ޗެލްސީ   31

6- މެންޗެސްޓަރ ޔުނައިޓެޑް  31

އިނގިރޭސި ޕްރިމިއާ ލީގްގައި ރޭ ކުޅުނު އެހެނިގެން މެޗްތަކުގެ ނަތީޖާތަކަށް ބަލާއިރު، އެވަޓަން އާއި ބްރެންޓްފޯޑް ބައްދަލުކުރިމެޗް 4-2 ގެ ނަތީޖާއަކުން ބްރެންޓްފޯޑް ކާމިޔާބުކުރިއިރު، ނިއުކާސަލް ޔުނައިޓެޑާ ކްރިސްޓަލް ޕެލަސް ބައްދަލުކުރިމެޗް 2-0 ގެ ނަތީޖާއަކުން ކާމިޔާބުކުރީ ނިއުކާސަލްއެވެ. ސްޕާސް އާ ސަންޑަލޭންޑް ބައްދަލުކުރިމެޗް 1-1 ގެ ނަތީޖާއަކުން ނިމުނުއިރު، ފްލަމް އާއި ލިވަޕޫލް ބައްދަލުކުރިމެޗް ނިމުނީ 2-2 ގެ ނަތީޖާއަކުންނެވެ. މީގެ އިތުރުން މެންޗެސްޓަރ ޔުނައިޓެޑާއި ލީޑްސް ބައްދަލުކުރިމެޗްވެސް ނިމުނީ 1-1 ގެ ނަތީޖާއަކުންނެވެ.