ރަސްމާލެ ހިއްކުމުގެ މަޝްރޫޢުގެ މަސައްކަތުގެ ތެރެއިން ސައިޓް އޭ ހިއްކުމުގެ މަސައްކަތް ތާވަލްކޮށްފައިވާގޮތަށް ބާރަށް ކުރިއަށްދާކަމަށް އެމްއޭސީއެލުން ބުނެފިއެވެ.

ރަސްމާލެ މަޝްރޫޢުގެ މަސައްކަތް ކުރިއަށްދާގޮތް އެމްއޭސީއެލުން އެކްސްގައި އާއްމުކުރަމުންދާއިރު، މިއަދު ކުރި ޕޯސްޓްގައި ބުނެފައިވަނީ، ސައިޓް އޭއިން މިހާތަނަށް 64 ހެކްޓަރުގެ ސަރަހައްދެއް ހިއްކައި ނިމިފައިވާކަމަށެވެ. ސައިޓް އޭއިން ހިއްކުމަށް ނިންމާފައިވަނީ، 138 ހެކްޓަރެވެ.

ސައިޓްއޭ ހިއްކުމުގެ 47 އިންސައްތަ މަސައްކަތް ނިމިފައިވާއިރު، އެހެން ސައިޓްތައް ހިއްކުމުގެ މަސައްކަތްވެސް ކަނޑައެޅިފައިވާ ތާވަލާ އެއްގޮތަށް ކުރިއަށްދާކަމަށް އެމްއޭސީއެލުން ބުނެއެވެ.

ރަސްމާލެ ހިއްކާފައިވާ ސަރަހައްދު... ފޮޓޯ: އެމްއޭސީއެލް

ރަސްމާލެ ހިއްކުމުގެ މަސައްކަތް އަވަސްކުރުމަށް ބިންހިއްކުމުގައި މިވަގުތު ދުނިޔޭގައި އޮތް އެންމެ ބޮޑު ޑްރެޖަރުގެ ތެރޭގައި ހިމެނޭ ޑްރެޖަރެއް ވަނީ ގެނެސްފައެވެ. މި ޑްރެޖަރަކީ އެއްފަހަރާ 46،000 ކިއުބިކް މީޓަރުގެ ވެލި ނެގުމުގެ ގާބިލްކަން ލިބިގެންވާ ޑްރެޖަރެކެވެ. ކ. ފުށިދިއްގަރުފަޅުގައި ރަސްމާލެ މަޝްރޫއުގެ އަމަލީ މަސައްކަތް ފެއްޓެވީ 2023ވަނަ އަހަރުގެ ޑިސެމްބަރު މަހު އެވެ. ތިމާވެއްޓާ ރައްޓެހި "އިކޯ ސިޓީ" އެއްގެގޮތުގައި ތަރައްގީ ކުރާ ރަސްމާލެ ތަރައްގީ ކުރުމަށް 1،153 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މީގެ ތެރެއިން މިހާތަނަށް 280 ހެކްޓަރުގެ ބިން ހިއްކައި ވަނީ ނިމިފައެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އުއްމީދީ މަޝްރޫޢުކަމަށްވާ "ރަސްމާލެ" އަކީ ދުނިޔޭގެވެސް ފުރަތަމަ އީކޯ ސިޓީގެ ގޮތުގައި ތަރައްޤީކުރާ ރަށެވެ. 

ރަސްމާލެއިން ޖުމްލަ 25000 ގޯތި ދޫކުރުމަށް ހަމަޖެހިފައިވާއިރު، ފުރަތަމަ ބުރުގައި އެކަނިވެސް 15000 ގޯތިދޫކުރުމަށް ނިންމާފައިވާކަމަށް ރައީސް ޑރ.މުއިއްޒު ވަނީ ވިދާޅުވެފައެވެ. ރަސްމާލެ ހިއްކުމުގެ މަސައްކަތް ނިންމުމަށް ސަރުކާރުން އަމާޒު ހިފާފައިވަނީ އަންނަ އަހަރުގެ އޭޕްރިލް މަހުގެ ތެރޭގައެވެ.