ދިވެހިރާއްޖޭގައި ވަރަށް އާންމުކޮށް ހެދޭ އަދި ގިނަ ބަޔަކު ދަންނަ "ނަންރީތި މާ" ނުވަތަ އިނގިރޭސި ބަހުން ނަމަ "ބަޓަފްލައި ޕީ" އަކީ އެއިން ހަށިގަނޑަށް ފައިދާ ހުރި އެއްޗެއް ނަމަވެސް، މާބަނޑުއަންހެނުން އެ ބޭނުންކުރުން ރަނގަޅުނޫން ކަމަށް ދިރާސާތަކުން ދައްކާ ކަމަށް ރާއްޖޭގެ ތަޖުރިބާކާރު އެތެރެހަށީގެ ޑޮކްޓަރު މުޙައްމަދު ޢަލީ ވިދާޅުވެއްޖެއެވެ. 

ދާދިފަހުން ޑރ މުހައްމަދު އަލީ ވަނީ ނަންރީތިމަލުގެ ފައިދާއާ ބެހޭގޮތުން ވީޑިއޯއެއް ހަދާފައެވެ. 

އެ ވީޑިއޯއާއެކު، ބައެއް މީހުން، މާބަނޑު އަންހެނުން ނަންރީތިމާ ބޭނުންކުރުމާ ބެހޭގޮތުން ސުވާލުކޮށްފައިވާކަން ޑޮކްޓަރު ފާހަގަކުރެއްވިއެވެ. 

”މާބަނޑުމީހުން ނަންރީތިމަލުގެ ސައި، ނޫނީ ފެނަަށް އަޅައިގެން ނުވަތަ، ސެލެޑް ހަދައިގެންވެސް ބޭނުންކުރުމާމެދު ހެދިފައިހުރި ދިރާސާތަކުން ދައްކަނީ، ވަކިން ޚާއްސަކޮށް މާބަނޑުއިރު މި މާ ބޭނުން ނުކުރުން. އެއްވެސް ގޮތަކަށް ބޭނުން ނުކުރުން. އެއްވެސް ގޮތަކަށް މި މާ ބޭނުންކޮށްފިނަމަ ރަހިމު ފިތޭގޮތް ވުމުގު ފުރުސަތު މަތިވޭ. އެހެންވެއްޖެއްޔާ ކިއްޖާ ބައިގެންދިޔުމުގެ ފުރުސަތު އިތުރުވާނެ“ ޑޮކްޓަރު މުހައްމަދު ޢަލީ ވިދާޅުވިއެވެ. 

މީގެ ކުރިން ޑޮކްޓަރު އާއްމުކުރި ވީޑިއޯގައި ބުނެފައިވާގޮތުން، އެމަލަކީ ހަށިގަނޑަށް ފައިދާހުރި ގިނަ ސިއްޙީ ގުނަވަންތަކެއް އެކުލެވިގެންވާ މަލެކެވެ. 

ޑރ. މުހައްމަދު ޢަލީ ވިދާޅުވި ގޮތުގައި، މި މަލަކީ ރާއްޖޭގައި ވަރަށް ގިނައިން ބޭނުންކުރަމުން އަންނަ މަލަކަށް ވާއިރު، މަލުގެ ފައިދާއާ ބެހޭގޮތުން ގިނަ ބަލިމީހުން ސުވާލުކުރެއެވެ. އަދި ނަންރީތި މާ ހޫނުފެނަށް އަޅައިގެން ތައްޔާރުކުރާ ސައި ބުއިމަކީ ހަށިގަނޑަށް އެތައް ފައިދާއެއް ލިބިގެންދާ ކަމެއްކަން އޭނާ ފާހަގަކުރެއްވިއެވެ.

ހަކުރު ކޮންޓްރޯލްކުރުން: ކެއުމަށްފަހު ހަށިގަނޑުގެ ހަކުރު މަތިވާ މިންވަރު ކުޑަކޮށްދީ، އިންސިއުލިން އުފައްދައިދޭ މިންވަރު އިތުރުކޮށްދެއެވެ.

ސަރުބީ މަދުކުރުން: ހަށިގަނޑުގައި ހުންނަ ސަރުބީގެ މިންވަރު މަދުކޮށްދިނުމުގެ އިތުރުން، ކެއުމަށްފަހު ލޭގައި "ޓްރައިގްލިސަރައިޑް" ނުވަތަ ކޮލެސްޓްރޯލް މަތިވާ މިންވަރު ދަށްކޮށްދެއެވެ.

ވިހަ ބޭރުކުރުން: މީގައި ހިމެނޭ "އެންޓިއޮކްސިޑަންޓް" ތަކުގެ ސަބަބުން ހަށިގަނޑުގައި ހުންނަ ވިހަ މާއްދާތައް ނައްތާލުމަށް އެހީތެރިވެދެއެވެ.

ޑޮކްޓަރު އިރުޝާދު ދެއްވާ ގޮތުގައި، މި ސައި ތައްޔާރުކުރުމަށް ބޭނުންކުރަންވާނީ ގާތްގަނޑަކަށް 1 ނުވަތަ 2 ގްރާމްގެ ހިއްކާފައި ހުރި މަލެވެ. ނުވަތަ 20 ވަރަކަށް ތާޒާ މާ ބޭނުންކޮށްގެންވެސް މި ސައި ތައްޔާރުކުރެވިދާނެއެވެ.

މި ސައި ބުއިމުން އޭގެ އަސަރު ދެތިން މިނެޓާއި ގަޑިއިރެއްގެ ތެރޭގައި ފެންނަން ފަށާނެއެވެ. އަދި މި އަސަރު ގާތްގަނޑަކަށް 3 ގަޑިއިރާއި 6 ގަޑިއިރާ ދެމެދުގެ ވަގުތަކަށް ހަށިގަނޑުގައި ހުންނާނެއެވެ. ނަމަވެސް 6 ގަޑިއިރު ފާއިތުވުމުން އޭގެ އަސަރު މަޑުމަޑުން ކެނޑިގެންދާނެއެވެ.

ޑރ. މުހައްމަދު ޢަލީ ޚާއްސަކޮށް ފާހަގަކުރެއްވި ގޮތުގައި، ނަންރީތި މަލަކީ ސިއްޙީ އެހީތެރިކަމެއް ފޯރުކޮށްދޭ އެއްޗަކަށް ވީނަމަވެސް، މިއީ ބޭހުގެ ބަދަލުގައި ބޭނުންކުރަންޖެހޭ އެއްޗެއް ނޫނެވެ.

ބަލިތަކަށް ފަރުވާ ހޯދުމަށް ބޭނުންކުރާ ބޭސްތައް ހުއްޓާލުމަށްފަހު މި ސައި ބޭނުންކުރުމަކީ ރަނގަޅު ގޮތެއް ނޫންކަމަށާއި، މިއީ މުޅި އުމުރަށް ބަލި ރަނގަޅުކޮށްދޭ ފަރުވާއެއް ނޫންކަންވެސް އޭނާ ހަނދާންކޮށްދެއްވިއެވެ.