ސާފް ވުމެންސް ފުޓްސަލް މުބާރާތުގައި މިއަދު ދިވެހިރާއްޖެ އަވައްޓެރި އިންޑިއާ އާ ދެކޮޅަށް ނިކުންނާނެއެވެ.
ބިލިއަނަކަށްވުރެ އާބާދީގެ ގޮތުން ބޮޑު އިންޑިއާ އާ ދެކޮޅަށް ރާއްޖެ ނިކުންނަ މެޗް ފެށުމަށް ހަމަޖެހިފައިވަނީ، މެންދުރު 12 ޖަހާއިރުއެވެ. މިއީ މުބާރާތުގައި ރާއްޖޭގެ ކުޅުންތެރިންނަށް ކުރިމަތިވާނެ އެންމެބޮޑު އިމްތިހާނެވެ. އަދި އެންމެ އުނދަގޫވާނެ އެއް މެޗެވެ.
މެޗާއި ބެހޭގޮތުން މީޑިއާ އާ ވާހަކަދައްކަމުން ޤައުމީ ފުޓްސަލް ޓީމުގެ ކޯޗް އާތިފް މުޙައްމަދު (އާތީ) ބުނެފައިވަނީ، މިއަދުގެ މެޗަށް ނިކުންނައިރު، ޓީމް އޮތީ ވަރަށް ރަނގަޅަށް ތައްޔާރުވެގެން ކަމަށާއި، އެގޮތުން ޓީމް ތެރޭގައި އަނިޔާގެ އެއްވެސް މައްސަލައެއް ނެތްކަމަށެވެ. މިވަގުތަށް ނެގެން އޮތް އެންމެ ވަރުގަދަ ޓީމް ފައިނަލްކޮށްފައިވާއިރު، މުބާރާތުގައި އިތުރަށް ބަދަލެއް ގެންނާނީ މިއަދުގެ މެޗަށްފަހުކަމަށްވެސް އާތި ވަނީ ބުނެފައެވެ.
ސާފު ވުމެންސް ފުޓްސަލް މުބާރާތަކީ ރާއްޖޭގެ އަންހެން ޓީމް ކުރާ މިފެންވަރުގެ ފުރަތަމަ ތަޖުރިބާއެވެ. ރާއްޖެއާ ދެކޮޅަށް ނިކުންނަ އިންޑިއާ ފެނިގެންދާނީ މި މުބާރާތުގެ ފޭވަރިޓް ޓީމްގެ ގޮތުގައިކަން ގިނަބަޔަކު ފާހަގަކުރެއެވެ.
މުބާރާތުގެ މެޗްތައް ޖެނުއަރީ 25ގެ ނިޔަލަށް ކުރިއަށްދާއިރު މިފަހަރުގެ މެޗްތައް ކުޅުމަށް ހަމަޖެހިފައިވަނީ، ތައިލެންޑްގެ ނޮންތަބުރީ ސްޓޭޑިއަމްގައެވެ. މުބާރާތުގައި އިންޑިއާގެ އިތުރުން ޕާކިސްތާން، ސްރީލަންކާ، ބޫޓާން، އަދި ބަނގްލަދޭޝް ވާދަކުރާއިރު، މުބާރާތުގެ ޗެމްޕިއަންކަން ލިބޭނީ ކުޅޭ މެޗްތަކަށްފަހު އެންމެގިނައިން ޕޮއިންޓް ލިބޭ ޓީމަކަށެވެ.
Advertisement
This content is created and paid for by advertisers and does not involve Voice Journalists
