ރަސްމާލެ ހިއްކުމުގެ މަސައްކަތުގެ ތެރެއިން ސައިޓް އޭގެ ދެބައިކުޅަ އެއްބައި ހިއްކާ ނިމިފައިވާކަމަށް އެމްއޭސީއެލުން ބުނެފިއެވެ.

އެމްއޭސީއެލުން މިއަދު އެކްސްގައި ކުރި ޕޯސްޓެއްގައި ބުނެފައިވަނީ ސައިޓް އޭއިން 51.64 އިންސައްތަ ހިއްކައި ނިމިފައިވާކަމަށެވެ. އެގޮތުން ސައިޓް އޭއިން އެކަނިވެސް މިހާރު 71 ހެކްޓަރުގެ ސަރަހައްދެއް ހިއްކާފައިވާކަމަށް އެމްއޭސީއެލުން ބުންޏެވެ.

ރަސްމާލެ ހިއްކުމުގެ މަސައްކަތް ސައިޓްތަކަކަށް ބަހާލައިގެން ކުރިއަށްދާއިރު، ސައިޓް އޭއިން 137.5 ހެކްޓަރު ހިއްކުމަށް ވަނީ ނިންމާފައެވެ. އެމްއޭސީއެލުން ބުނީ ރަސްމާލެ ހިއްކުމުގެ މަސައްކަތް ކަނޑައެޅިފައިވާ ސްޓަންޑަރޑާ އެއްގޮތަށް އަދި ހަމަޖެހިފައިވާ ތާވަލާ އެއްގޮތަށް ކުރިއަށްދާކަމަށެވެ.

ރަސްމާލެ ހިއްކުމުގެ ސްޕީޑަށް ބަލާއިރު މިހާރު ދުވާލަކު ހެކްޓަރެއް ހިއްކަމުންދާކަން ފާހަގަކޮށްލެވެއެވެ.

ރަސްމާލެ ހިއްކުމުގެ މަސައްކަތް ބާރު ސްޕީޑްގައި ކުރިއަށްދާއިރު، އެ މަސައްކަތުގައި މިވަގުތު ބޭނުންކުރަމުން ދަނީ ބިންހިއްކުމުގައި މިވަގުތު ދުނިޔޭގައި އޮތް އެންމެ ބޮޑު ޑްރެޖަރުގެ ތެރޭގައި ހިމެނޭ ޑްރެޖަރު ގެނެސްގެންނެވެ. މި ޑްރެޖަރަކީ އެއްފަހަރާ 46،000 ކިއުބިކް މީޓަރުގެ ވެލި ނެގުމުގެ ގާބިލްކަން ލިބިގެންވާ ޑްރެޖަރެކެވެ. 

ރަސްމާލެ ހިއްކުމުގެ މަޝްރޫޢުއަކީ މި ސަރުކާރުން ކުރިއަށްގެންދިއުމަށް ނިންމާފައިވާ ބޯހިޔާވަހިކަމުގެ އެންމެ އުއްމީދީ މަޝްރޫޢުއެވެ. ކ. ފުށިދިއްގަރުފަޅުގައި ރަސްމާލެ މަޝްރޫއުގެ އަމަލީ މަސައްކަތް ފެއްޓެވީ 2023ވަނަ އަހަރުގެ ޑިސެމްބަރު މަހު އެވެ. ތިމާވެއްޓާ ރައްޓެހި "އިކޯ ސިޓީ" އެއްގެގޮތުގައި ތަރައްގީ ކުރާ ރަސްމާލެ ތަރައްގީ ކުރުމަށް 1،153 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މީގެ ތެރެއިން މިހާތަނަށް 280 ހެކްޓަރުގެ ބިން ހިއްކައި ވަނީ ނިމިފައެވެ.

ރަސްމާލެއިން ޖުމްލަ 25000 ގޯތި ދޫކުރުމަށް ހަމަޖެހިފައިވާއިރު، ފުރަތަމަ ބުރުގައި އެކަނިވެސް 15000 ގޯތިދޫކުރުމަށް ނިންމާފައިވާކަމަށް ރައީސް ޑރ.މުއިއްޒު ވަނީ ވިދާޅުވެފައެވެ. ރަސްމާލެ ހިއްކުމުގެ މަސައްކަތް ނިންމުމަށް ސަރުކާރުން އަމާޒު ހިފާފައިވަނީ އަންނަ އަހަރުގެ އޭޕްރިލް މަހުގެ ތެރޭގައެވެ.