ޤައުމީ ފުޓްސަލް ފިރިހެންޓީމަށް އަންނަ އަންގާރަދުވަހަކީ ހަމަ ގައިމުވެސް ވަރަށް މުހިންމު ދުވަހަކަށް ވާނެއެވެ. ސާފް ފުޓްސަލް ޗެމްޕިއަންޝިޕްގައި ރާއްޖެ އެދުވަހު ނިކުންނާނީ އިންޑިއާ އާ ދެކޮޅަށެވެ. މުބާރާތުގެ މެޗްތައް މިހާރު ގޮސްފައިވާ ހިސާބަށް ބަލާއިރު، އިންޑިއާ އާ ދެކޮޅަށް ނިކުންނަ މެޗަކީ ރާއްޖެއަށް ފައިނަލެއްކަމަށް ގިނަ ބަޔަކު ދެކެއެވެ. 

މު ބާރާތުގައި ރާއްޖެ މިހާތަނަށް ކުޅުނު ދެ މެޗްގެ ނަތީޖާއަށް ބަލާއިރު، ފުރަތަމަ މެޗްގައި ޕާކިސްތާނާ ދެކޮޅަށް ކުޅެ ރާއްޖެ މޮޅުވީ، 7-1 ގެ ނަތީޖާއިންނެވެ. ދެވަނަ މެޗްގައި އިއްޔެ ބަންގްލަދޭޝްއާ ދެކޮޅަށް ކުޅުނުމެޗުން ރާއްޖެ މޮޅުވީ، 6-1 ގެ ނަތީޖާއަކުންނެވެ. މުބާރާތް ފެށުމުގެ ކުރިން މި ދެޓީމްވެސް ބެލެވުނީ ބަލިކުރަން އުނދަގޫވާނެ ދެ ޓީމްގެ ގޮތުގައެވެ. ނަމަވެސް ރާއްޖޭގެ ޓީމުން ވަނީ ކުރިން ހީކުރިގޮތާ ހިލާފަށް މޮޅަށް ކުޅެ ގިނަ ގޯލްތަކެއް ޖަހައިގެން ދެ މެޗުންވެސް މޮޅުވެފައެވެ. 

މުބާރާތުގައި ރާއްޖެ ބަންގްލަދޭޝްއާ ބައްދަލުކުރިމެޗްގެ ތެރެއިން.. ފޮޓޯ: ސާފް

ކޯޗުންނާއި ގިނަ ފަރާތްތަކުން ފާހަގަކޮށްފައިވަނީ، އިންޑިއާ އާ ދެކޮޅަށް ނިކުތުމުގެ ކުރިން މި ދެމެޗްގެ ނަތީޖާއަކީ ރާއްޖެއަށް ލިބިގެންދިޔަ އެޑްވާންޓޭޖެކެވެ. ހަމައެގޮތަށް މި ނަތީޖާއިން އަވައްޓެރި އިންޑިއާއިން ރާއްޖޭގެ ޓީމާމެދު އިތުރަށް ސީރިއަސްކޮށް ނަގާނޭކަމަށްވެސް އެފަރާތްތަކުން ވަނީ ފާހަގަކޮށްފައެވެ.

ރާއްޖޭގެ ފުޓްސަލް ޓީމް.. ފޮޓޯ: ސާފް

ވޮއިސްއާ މައުލޫމާތު ހިއްސާކުރަމުން ކުރީގެ ރާއްޖޭގެ އެއްވަނަ ފުޓްބޯޅަ ކުޅުންތެރިޔާ އަދި މިހާރު ފުޓްބޯޅަ އަދި ފުޓްސަލްގައި ކުޅުންތެރިން ތަމްރީނުކުރުމަށް ހަރަކާތްތެރިވާ އަލީ ޝިހާމް (ހުރާ އައްޔަ) ބުނީ، ރާއްޖޭގެ ފިރިހެން ފުޓްސަލް ޓީމްގެ ފަރާތުން ފެނިގެންދިޔައީ ސަޕްރައިސް ނަތީޖާއެއްކަމަށެވެ. ޓީމްގެ ކުޅުން ވަރަށް ރަނގަޅުކަން ފާހަގަކުރަމުން އައްޔަ ބުނީ، މިއީ އިންޑިއާ މެޗަށް ނިކުތުމުގެ ކުރިން ލިބިގެންދިޔަ ވަރަށްބޮޑު ހިތްވަރެއް ކަމަށެވެ. އިންޑިއާ މެޗް ވެގެންދާނީ ރާއްޖެއަށް ފައިނަލެއް ފަދަ މެޗަކަށް ކަންވެސް އައްޔަ ފާހަގަކުރިއެވެ.

އަވައްޓެރި އިންޑިއާ އާ ދެކޮޅަށް ކުޅޭ މެޗުން މޮޅުވުމަކީ މި މުބާރާތް ކާމިޔާބުކުރުމަށް ލިބިގެންދާނޭ ވަރަށް މުހިންމު ފުރުސަތަކަށް ވާނޭކަމަށް އެފަރާތްތަކުން ފާހަގަކުރެއެވެ. މި މުބާރާތުގެ ޕޮއިންޓް ތާވަލް މިހާރު އޮތްގޮތަށް ބަލާއިރު ތާވަލްގެ އެއްވަނާގައި 6 ޕޮއިންޓާއެކު އޮތީ ދިވެހިރާއްޖެ އެވެ.

މުބާރާތުގެ ޕޮއިންޓް ތާވަލް..

މި މުބާރާތުގެ ފިރިހެން ޓީމްތަކުގެ މެޗްތައް މާދަމާ އަލުން ފެށިގެންދާއިރު، އިންޑިއާ ނިކުންނާނީ، ނޭޕާލާ ދެކޮޅަށެވެ. ޕާކިސްތާން ނިކުންނާނީ ސްރީލަންކާ އާ ދެކޮޅަށެވެ. އަދި ބަންގްލަދޭޝް ނިކުންނާނީ ބޫޓާނާ ދެކޮޅަށެވެ.