މިދިޔަ އަހަރު ނިމުނުއިރު ދައުލަތުގެ ބަޖެޓް ޑެފިސިޓް އޭގެ ކުރީ 2024 ވަނަ އަހަރާ އަޅާބަލާއިރު 73.5 އިންސައްތަ ދަށަށް ދިޔަކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީން ނެރެފައިވާ ވީކްލީ ފިސްކަލް ރިޕޯޓްގެ ތަފާސްހިސާބުތަކަށް ބަލާއިރު، ދައުލަތަށް ލިބުނު އާމްދަނީ އިތުރުވެ، ޖުމްލަ ހަރަދުތައް ކުޑަވުމާއެކު އޯވަރޯލް ޑިފިސިޓް 9.6 ބިލިއަން ރުފިޔާއަށް ދަށްވެފައިވާކަމަށެވެ. ފިނޭންސް މިނިސްޓްރީން ވަނީ މިދިޔަ އަހަރު ދައުލަތުގެ ހަރަދުތައް އެދެވޭ މިންވަރެއްގައި ކުޑަކުރެވިފައިވާކަން ފާހަގަކޮށްފައެވެ. އެގޮތުން ރިކަރަންޓް ހަރަދުތައް ކުޑަކުރެވިފައިވާއިރު ޖުމްލަ ހަރަދުތައް ދަށަށްދިޔަކަންވެސް ވަނީ ފާހަގަކޮށްފައެވެ.

ތަފާސްހިސާބަށް ބަލާއިރު ނިމިގެންދިޔަ ޑިސެމްބަރުގެ ނިޔަލަށް ދައުލަތުގެ ޖުމްލަ ޚަރަދު ހުރީ 43.1 ބިލިއަން ރުފިޔާގައެވެ. މިއީ 2024 ވަނަ އަހަރާ އަޅާބަލާއިރު، 10.6 އިންސައްތަ ދަށްވުމެކެވެ. މިދިޔަ އަހަރުގެ ކުރީއަހަރު ދައުލަތުގެ ހަރަދުތައް ހުރީ 48.2 ބިލިއަން ރުފިޔާގައެވެ.

ފިނޭންސްސުން ބުނީ މިދިޔަ އަހަރުގެ ތެރޭގައި ދައުލަތުގެ މުވައްޒަފުންގެ މުސާރަ އެއްހަމަކުރުން ފަދަ ސިޔާސަތުތައް ތަންފީޒުކުރުން ފަދަ ކަންކަމުގެ ސަބަބުން ރިކަރަންޓް ޚަރަދުތައް އިތުރުވެ، 36.3 ބިލިއަން ރުފިޔާއަށް ވަނީ އަރާފައިވާކަމަށެވެ. މިއީ ކުރީގެ 34.9 ބިލިއަން ރުފިޔާއާ އަޅާބަލާއިރު 4.1 އިންސައްތައިގެ އިތުރުވުމެކެވެ. މި އިތުރުވުމުގެ މައިގަނޑު ސަބަބަކީ މުސާރައަށް އައިސްފައިވާ ބަދަލާއެކު މުވައްޒަފުންނަށް ކުރާ ޚަރަދުތައް އިތުރުވެފައިވުމެވެ.

މިދިޔަ އަހަރު އަހަރު ކެޕިޓަލް ޚަރަދުގެ ގޮތުގައި 6.8 ބިލިއަން ރުފިޔާ ހޭދަވެފައިވާއިރު، މިއީ 2024 ވަނަ އަހަރާ އަޅާބަލާއިރު 48.8 އިންސައްތަ ދަށްވުމެކެވެ. 2024 ވަނަ އަހަރު ކެޕިޓަލް ހަރަދުގެ ގޮތުގައި 13.3 ބިލިއަން ރުފިޔާ ވަނީ ހޭދަވެފައވެެ.

2024 ވަނަ އަހަރުގެ ނިޔަލަށް ދައުލަތުގެ ބަޖެޓުގެ އޯވަރޯލް ޑެފިސިޓް 13.1 ބިލިއަން ރުފިޔާގައި ހުރިނަމަވެސް މިދިޔަ އަހަރު އެއަދަދު ވަނީ 3.5 ބިލިއަން ރުފިޔާއަށް ދަށްވެފައެވެ. މިއީ ދައުލަތުގެ ޚަރަދުތައް ކޮންޓްރޯލްކުރުމާއެކު އާމްދަނީގެ ސިޔާސަތުތަކަށް ގެނެސްފައިވާ ބަދަލުގެ ހެޔޮ ނަތީޖާކަމަށް މާލީ ވުޒާރާއިން ބުނެއެވެ.

މާލީ ވުޒާރާއިން މި ރިޕޯޓްގައި އިތުރަށް ބުނެފައިވަނީ، އިންވެސްޓަރުން ދައުލަތުގެ މާލީ ދެމެހެއްޓެނިވިކަން ވަޒަންކުރުމުގައި ބަލާ މުހިންމު މިންގަނޑެއް ކަމަށްވާ ޕްރައިމަރީ ބެލެންސް، ދަރަނީގެ އިންޓްރެސްޓް ޚަރަދު ނުހިމަނައި، އާމްދަނީއާއި ޚަރަދުގެ ފަރަގު މިދިޔަ އަހަރު  ވަރަށް ބޮޑަށް ރަނގަޅުވެފައިވާކަމަށެވެ. އެގޮތުން2024 ވަނަ އަހަރު 8.4 ބިލިއަން ރުފިޔާއިން ޑެފިސިޓްވި ޕްރައިމަރީ ބެލެންސް ގައި ހުރިނަމަވެސް މިދިޔަ އަހަރު ނިމުނުއިރު އެ އަދަދު ހުރީ 1.2 ބިލިއަން ރުފިޔާގެ ސަރޕްލަސްއެއްގައެވެ. މިއީ ފަހުގެ ތާރީޚެއްގައި ފުރަތަމަ ފަހަރަށް ޕްރައިމަރީ ސަރޕްލަސް އެއްގައި މާލީ އަހަރެއް ނިންމާލެވުނު ފުރަތަމަ ފަހަރުކަން މާލީ ވުޒާރާއިން ވަނީ ފާހަގަކޮށްފައެވެ.