މި ދުވަސްވަރު ޑެންގީ އާއި ނޭވާލާ ނިޒާމުގެ ބަލިތައް އަދި ހޮޑުލުމާއި ބޭރަށް ހިނގުން ފަދަ ބަލިތައް އިތުރުވާތީ ސަމާލުވާން އެދިއްޖެ އެވެ.

ހެލްތް ޕްރޮޓެކްޝަން އެޖެންސީ އިން މިރޭ ބުނީ ރާއްޖޭގެ އެކި ހިސާބުތަކުގައި ޑެންގީ އާއި ނޭވާލާ ނިޒާމުގެ ބަލިތައް ޖެހިގެން ރިޕޯޓްކުރާ މިންވަރު އިތުރުވެފައިވާ ކަމަށެވެ. އަދި މާލެ ސަރަހައްދުގައި ހޮޑުލުމާއި ބޭރަށް ހިނގުން އިތުރުވަމުންދާ ކަމަށް ތަފާސް ހިސާބުތަކުން ދައްކާ ކަމަށެވެ.

އެހެން ކަމުން ރައްކާތެރިވުމަށާއި ބަލިތައް ފެތުރުނަ ނުދިނުމަށް ފިޔަވަޅުތައް އެޅުމަށް އިލްތިމާސް ކޮށްފައިވެ އެވެ. އެގޮތުން އަރިދަފުސް ރޯގާއިން ރައްކާތެރިވުމަށް އެފަދަ އަލާމާތެއް ހުރިނަމަ މީހުން އުޅޭ ތަންތަނަަށް ނިކުމެ އުޅޭއިރު ނޭފަތާއި އަނގަ ރަނގަޅަށް ނިވާކުރުމާއި ސައިބޯނި ލައިގެން ރަނގަޅަށް އަތް ދޮވުމާއި ބަލި މީހުން ކުޑަކުދީންގެ ގާތަށް ނުދިއުމަށް އެދިފައިވެ އެވެ.

ޑެންގީ އިން ރައްކާތެރިވުމަށް މިއީ މަދިރީގެ ޒަރިއްޔާއިން ޖެހޭ ބައްޔެއް ކަމުން މަދިރި އާލާވާ ގޮތަށް ހުންނަ ތަންތަން ނައްތާލުމާއި މަދިރި ނުހަފާނެހެން ލޯޝަން ލުމަށް އިލްތިމާސްކޮށްފައިވެ އެވެ.

ބޭރަށް ހިންގުމާއި ހޮޑުލުމުން ރައްކާތެރިވުމަށް ކާބޯތަކެތި ތައްޔާރުކުރުމާއި ކާނާ ހެދުމާއި ކާން ދިނުމުގެ ކުރީން އަދި ފާހާނާ ކުރުމަށް ފަހު ސައިބޯނިލައިގެން ރަނގަޅަށް އަތްދޮވުމާއި ކާބޯތަކެތީގައި މަތިޖަހާފައި ބެހެއްޓުމާއި ކެއުމަށް ފަހު ގިނައިރު ބަހައްޓާނަމަ ފްރީޒްގައި ބެހެއްޓުމާއި ބޭރަށް ހިންގާ ހޮޑުލެވޭނަމަ އޯއާރުއެސް ނުވަތަ ދިޔާ ބޭސް ބޭނުން ކުރުމަށް އިލްތިމާސް ކޮށްފައިވެ އެވެ.

މީގެ އިތުރުން ބޮޑުވަރުވުމުގެ ކުރީން ސިއްހީ އެހީތެރިއެއްގެ ލަފާ ހޯދުމަށް ވެސް ވަނީ އެދިފަ އެވެ. އެ ގޮތުން ގަދަޔަށް ބަނޑުގައި ރިއްސާނަމަ ނޫނީ އާދަޔާ ހިލާފަށް ވަރުދެރަވާނަމަ ނުވަތަ ކުޑަކަމުދިއުން މަދުނަމަ ނޫނީ ތުއްތުކުދީންނަށް ކިރުބޮވޭަރު މަދުނަމަ އަދި ހަށިގަނޑުގެ އެއްވެސްތާކުން ލޭ އަންނަ ނަމަ ލަސްނުކޮށް ސިއްހީ ފަރުވާ ހޯދަން އެދިފައިވެ އެވެ.