އަންނަ ހުކުރު ދުވަހު ޖަޕާނުގެ ގާނޫނު ހަދާ މަޖިލިސް އުވާލައްވައި، އަވަސް އާންމު އިންތިޚާބެއް ބޭއްވުމަށް އެގައުމުގެ ބޮޑުވަޒީރު ސަނައޭ ތަކައިޗީ ނިންމަވައިފިއެވެ.

މި ނިންމެވުން ބޮޑުވަޒީރު އިއުލާން ކުރެއްވީ ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައެވެ.

ޖަޕާނުގެ ފުރަތަމަ އަންހެން ބޮޑުވަޒީރުގެ މަގާމާ ހަވާލުވެވަޑައިގަތްތާ އެންމެ ތިން މަސް ދުވަހުގެ ތެރޭގައި މި އިއުލާން ކުރެއްވި އަވަސް އިންތިޚާބު ބޭއްވުމަށް ހަމަޖެހިފައިވަނީ އަންނަ ފެބްރުއަރީ މަހުގެ 8 ވަނަ ދުވަހުއެވެ. މި އިންތިޚާބުގައި ގާނޫނު ހަދާ މަޖިލީހުގެ ހުރިހާ ގޮނޑިއަކަށް މެންބަރުން އިންތިޚާބު ކުރާނެއެވެ. ޖަޕާނުގެ ގަނޫނު ހަދާ މަޖިލީހުގައި ހިމެނެނީ ޖުމްލަ 465 ގޮނޑިއެވެ. 

ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ބޮޑުވަޒީރު ތަކައިޗީ ވިދާޅުވީ، އައު އިންތިޚާބުގެ ބޭނުމަކީ ސަރުކާރުން ހުށަހަޅާފައިވާ ޚަރަދު ކުރުމުގެ ޕްލޭންތަކާއި އެހެނިހެން ސިޔާސަތުތަކަށް ރައްޔިތުންގެ ތާއީދު އޮތް މިންވަރު ބެލުމެވެ. އަދި މި ވަގުތު އޮތް ރައްޔިތުންގެ ވަރުގަދަ ތާއީދާ އެކު، ވެރިކަން ކުރާ ލިބަރަލް ޑިމޮކްރެޓިކް ޕާޓީ (އެލް.ޑީ.ޕީ) ގެ މައްޗަށް އޮތް ބާރު ގަދަކުރުމަކީ ވެސް ބޮޑުވަޒީރުގެ އަމާޒެކެވެ.

މި އިންތިޚާބު ކުރިމަތި މިވަނީ ޖަޕާނުގެ ރައްޔިތުންގެ މެދުގައި ދިރިއުޅުމުގެ ޚަރަދުތައް ބޮޑުވުމުގެ ކަންބޮޑުވުން އިންތިހާއަށް އޮތް ދަނޑިވަޅެއްގައެވެ. ޖަޕާނުގެ ރަސްމީ ބްރޯޑްކާސްޓަރު އެން.އެޗް.ކޭ އިން ކުރި ސާވޭއަކުން ދައްކާ ގޮތުގައި، 45 އިންސައްތަ މީހުންގެ އެންމެ ބޮޑު ކަންބޮޑުވުމަކީ ތަކެތީގެ އަގު ބޮޑުވުމެވެ.

ޚާރިޖީ ގުޅުންތަކަށް ބަލާއިރު، ދާދިފަހުން ޖެނުއަރީ 13 ވަނަ ދުވަހު ބޮޑުވަޒީރު ތަކައިޗީ ވަނީ ދެކުނު ކޮރެއާގެ ރައީސް ލީ ޖައޭ މިއުންގްއާ ނާރާގައި ބައްދަލުކުރައްވައި، ދެ ގައުމުގެ ސަލާމަތީ އަދި އިގްތިސާދީ ގުޅުންތަކާ ބެހޭގޮތުން މަޝްވަރާ ކުރައްވާފައެވެ.

އަވަސް އިންތިޚާބެއްގެ ޚަބަރާއެކު ޖަޕާނުގެ ހިއްސާގެ ބާޒާރު ވަނީ ތިން އިންސައްތައަށް ވުރެ މައްޗަށް ޖެހިލާފައެވެ. ނަމަވެސް، ޗައިނާ އާއި ޓައިވާނުގެ މައްސަލައިގައި ޖަޕާނުން ގެންގުޅޭ ހަރުކަށި ސިޔާސަތުގެ ސަބަބުން ދެ ގައުމުގެ ގުޅުން ވަނީ ނުތަނަވަސްވެފައެވެ. ޗައިނާއިން މިހާރު ވަނީ ޖަޕާނަށް ބައެއް މުހިންމު މައުދަންތައް އެކްސްޕޯޓް ކުރުން މަނާކޮށްފައެވެ.

ބޮޑުވަޒީރު ތަކައިޗީ ވިދާޅުވެފައިވަނީ ޗައިނާއާއެކު ވާހަކަދެއްކުމަށް އަބަދުވެސް ތައްޔާރަށް ހުންނެވި ކަމަށެވެ. އަދި ދެކުނު ކޮރެއާގެ ރައީސް ލީ ވެސް ގެންގުޅުއްވަނީ ޗައިނާ، ޖަޕާން އަދި އެމެރިކާއާ އެކު އަމަލީ ގޮތުން ފައިދާހުރި ޚާރިޖީ ސިޔާސަތެއް ކުރިއަށް ގެންދިއުމުގެ އުސޫލެކެވެ.