ނޭޕާލާ ދެކޮޅަށް ކުޅުނުމެޗްވެސް ރާއްޖެ ކާމިޔާބުކޮށްފި
ސާފް ފުޓްސަލް ޗެމްޕިއަންޝިޕްގައި ރާއްޖޭގެ ޤައުމީ ފުޓްސަލް ފިރިހެން ތީމް މިއަދު ނޭޕާލާ ދެކޮޅަށް ކުޅުނުމެޗްވެސް ކާމިޔާބުކޮށްފިއެވެ.
މުބާރާތުގައި މިއަދު ނޭޕާލާ ދެކޮޅަށް ކުޅުނުމެޗް ކާމިޔާބުކުރީ، ދޭއް އެކެއްގެ ނަތީޖާއަކުންނެވެ. މިމެޗަށް ނިކުތުމުގެ ކުރިންވެސް މެޗް އުނދަގޫވާނޭކަމަށް ދިވެހިޓީމުން ވަނީ ލަފާކޮށްފައެވެ. މިމެޗަކީ ދިވެހިޓީމް މި މުބާރާތުގައި ކުޅުނު އެންމެ އުނދަގޫ އެއް މެޗެވެ.
ވާދަވެރި ކުޅުމެއް ފެނިގެންދިޔަ މިމެޗްގައި ހުރިހާ ގޯލްތަކެއްވެސް ޖަހާފައިވަނީ ފަހުހާފްގެ ތެރޭގައެވެ. މެޗްގައި އެންމެ ފުރަތަމަ ގޯލް ޖަހާފައިވަނީ ދިވެހިރާއްޖެއިންނެވެ. ރާއްޖެއިން ލަނޑުޖަހާފައިވަނީ ނޭޕާލް ކުޅުންތެރިންނަށް ހެދުނު ގޯހެއްގައި ފުރުސަތުގެ ބޭނުން ހިފައި އަބްދުﷲ ޝަފީޢުއެވެ.
ރާއްޖެ އާ ނޭޕާލާ ދެކޮޅަށް ނިކުތުމުގެ ކުރިން.. ފޮޓޯ: ސާފް
ރާއްޖެއިން ލަނޑެއް ޖަހާފައި މާ ގިނައިރުތަކެއްނުވެ ނޭޕާލުން ވަނީ ލަނޑެއް ޖަހައި މެޗްގެ ނަތީޖާ ހަމަހަމަކޮށްފައެވެ. މެޗުން ރާއްޖެ މޮޅުކޮށްދިން ލަނޑު ޖަހައިދިނީ ކެޕްޓަން މުހައްމަދު އިމްރާނެވެ.
މިމެޗުން ލިބުނު މޮޅާއެކު ރާއްޖެ ވަނީ މުބާރާތުގެ ޗެމްޕިއަންކަމާ ގާތަށް ޖެހިލާފައެވެ. ރާއްޖެއަށް ބާކީ ދެން އޮތީ އެންމެ ދެ މެޗެވެ. އެއީ ބޫޓާން އަދި ސްރީލަންކާ އާ ދެކޮޅަށް ނިކުންނަ މެޗެވެ. މި ދެމެޗް އެއްވަރުކޮށްލައިގެންވެސް ރާއްޖެއަށް މުބާރާތުގެ ޗެމްޕިއަންކަން ހޯދުމުގެ ފުރުސަތު އެބައޮތެވެ.
Advertisement
This content is created and paid for by advertisers and does not involve Voice Journalists
