މާތްވެގެންވާ އިސްލާމްދީން ދެކެ އެންމެ ލޯބިވާ ޕާޓީއަކީ އެމްޑީޕީ ކަމަށް މާލެސިޓީގެ މޭޔަރު އާދަމް އާޒިމް މިރޭ ވިދާޅުވެއްޖެއެވެ.

އިދިކޮޅު މައިޕާޓީ، އެމްޑީޕީން މިރޭ ބޭއްވި ހަރުގެ ޖަލްސާގައި ވާހަކަދައްކަވަމުން މޭޔަރު އާޒިމް ވިދާޅުވީ އެމްޑީޕީއަށްވުރެ ވަކިން ބޮޑަށް އިސްލާމްދީން ދަމަހައްޓާނެއެހެން ޕާޓީއެއް ނޯންނާނެ ކަމަށައި އިސްލާމްދީނުގެ ކޮންމެފަދަ ޤުރުބާނީއެއް ވާންޖެހުނަސް އެމްޑީޕީގެ މެމްބަރުން ތިބޭނީ އެކަމަށް ތައްޔާރުވެގެން ކަމަށެވެ.

އާޒިމް ވިދާޅުވީ މިހާރުގެ ސަރުކާރަށް ނިސްބަތްވާ ފަރާތްތައް މީގެކުރިން ވެރިކަމުގައި ތިބިއިރު މާލެސިޓީ ކައުންސިލަށް ދަތިކޮށް، ސިޓީ ކައުންސިލުން ކުރަންޖެހޭ މަސައްކަތްތަކަށް ވަރަށްބޮޑަށް ދަތިކުރިކަމަށެވެ. އަދި މިހާރުގެ ރައީސުލްޖުމްހޫރިއްޔާ މޭޔަރަކަށް ހުންނެވިއިރުވެސް ލިބުނު ވަކިމޮޅެއް ނެތްކަން ފާހަގަކުރައްވަމުން އާޒިމް ވިދާޅުވީ، އެމްޑީޕީ ވެރިކަމުގައި ލާމަރުކަޒީ ނިޒާމުން ކައުންސިލްތަކަށް ދިން ބާރުވެރިކަން އަނެއްކާވެސް މި ސަރުކާރުން ނިގުޅައިގަނެފައިވާކަމަށެވެ.

އެގޮތުން މާލެސިޓީ ކައުންސިލަށް ދީފައިވާ ބާރުތައް ނަގަމުންދާކަން ފާހަގަކުރައްވައި އާޒިމް ވިދާޅުވީ ސިޓީކައުންސިލަށް މުއައްޒަފުން ނުނެގޭއިރު، މިސްކިތްތައް ބެލެހެއްޓުމަށްވެސް މުއައްޒަފުން ނެގުން ސަރުކާރުން ހުއްޓުވާފައިވާކަމަށެވެ.

އާޒިމް ވިދާޅުވީ މީގެ ކުރިން ހުންނެވި މޭޔަރު މިސްކިތްތައް ސާފުކުރުމުގެ ކަންކަން ކުރަމުންގެންދިޔައީ މަގުމަތީގައިތިބޭ ބޭރުމީހުން ގެނެސްގެން، ނަމަވެސް އެމްޑީޕީން މިސްކިތްތައް ސާފްކުރަނީ ދިވެހިން ބޭނުންކޮށްގެންކަމަށެވެ. 

އާޒިމް ވިދާޅުވީ ދީނުގެ ކަންތައްތަކުގައި އެންމެ ކުރީގައި ތިބުމާއި ދީނަށް އެންމެ ރަނގަޅު ކަންތައް ކުރުމަކީ އެމްޑީޕީގެ ސިޔާސަތެއް ކަމަށާއި، އެކަން އެގޮތުގައި ދެމިއޮންނާނޭކަމަށެވެ. އަދި ސަރުކާރުން ދަތިކުރިނަމަވެސް މިސްކިތްތައް ސާފްކޮށް ބަލަހައްޓާނޭކަމަށާއި، އެކަން އެގޮތުގައި ދެމި އޮންނާނޭކަމަށް މޭޔަރު އާޒިމް ވިދާޅުވިއެވެ.

މިރޭ އެމްޑީޕީން ބޭއްވި ޖަގަހަ ޖަލްސާގައި އާޒިމް ވަނީ ޕީއެންސީއަށް ވަރަށްބޮޑަށް ފާޑުވިދާޅުވެ، މާލެސިޓީ ކައުންސިލްގައި ތިއްބަވާ އެޕާޓީއަށް ނިސްބަތްވާ ބޭފުޅުންނަށްވެސް ވަރަށްބޮޑަށް ފާޑުވިދާޅުވެ ވާހަކަދައްކަވާފައެވެ.