މިދިޔަ އަހަރާ އަޅާބަލާއިރު، މިފަހަރު މަސްދަޅުކޭސް ދޫކުރުމުގެ ކަންކަން ބާރުސްޕީޑްގައި ކުރިއަށްދާކަމަށް މިނިސްޓްރީ އޮފް ސިޓީސް ލޯކަލް ގަވަމަންޓުން ބުނެފިއެވެ.

ރަމަޟާންމަހު ސަރުކާރުން ރޯދަ ހަދިޔާގެ ގޮތުގައި ދޫކުރާ މަސްދަޅުކޭސް ދޫކުރުމުގެ މަސައްކަތް ފަށާފައިވަނީ، މިދިޔަ ހޮނިހިރުދުވަހެވެ. މިނިސްޓްރީން ބުނީ މަސްދަޅޫކޭސް ދޫކުރުމުގެ ކަންކަން ބާރުސްޕީޑްގައި ކުރިއަށްދާކަމަށެވެ.

މިކަމާ ގުޅޭގޮތުން މިނިސްޓްރީ އޮފް ސިޓީސް ލޯކަލް ގަވަމަންޓް މިނިސްޓްރީގެ ވަޒީރު އާދަން ޝަރީފް ވިދާޅުވީ، މާލޭގައި ރޯދަ ހަދިޔާ ބަހަން ފެށިފަހުން މިވީ 5 ދުވަހުގެ ތެރޭގައި 19,468 މަސްދަޅު ކޭސް ވަނީ ބަހައި ނިމިފައިވާކަމަށެވެ.

މިފަހަރު މަސްދަޅު ދޫކުރުމުގެ އިންތިޒާމްތައް ހަމަޖެހިފައި ހުންނާނީ، ކިއުގަ ނުޖެހި އެކަން ކުރެވޭ ގޮތަށެވެ. މިފަހަރު މިކަމުގައި ސަރުކާރުން ހަމަޖައްސާފައިވާ އިންތިޒާމް ވަރަށް ރަނގަޅުކަމަށް ގިނަބަޔަކު ވަނީ ބުނެފައެވެ. އެގޮތުން ގިނައިރު މަޑުކުރަން ނުޖެހި، މަސްދަޅޫކޭސް ލިބޭކަން ގިނަ ފަރާތްތަކަކުން ފާހަގަކުރެެވެ.

  ކިއުގައި ނުޖެހި، ޕޯޓަލް http://roadhahadhiya.mv އިން ޓޯކަން ނެގޭއިރު، މިފަހަރު ގްރޭޓާ މާލެ ސަރަހައްދުގެ 15 ތަނަކުން މަސްދަޅު ދޫކުރުމަށް ވަނީ ނިންމާފައެވެ. އެއީ މާލޭގެ 8 ސަރަހައްދަކާއި ހުޅުމާލެ 6 ސަރަހައްދެއްގެ އިތުރުން ވިލިމާލޭގެ 1 ސަރައްދުންނެވެ.

މާލޭ ސަރަޙައްދުގައި މަސްދަޅުކޭސް ދޫކުރުމަށް ހަމަޖެހިފައިވަނީ ހުކުރުދުވަސް ފިޔަވައި ކޮންމެ ރެއަކު 8:30 އިން 11:00 އަށެވެ. މި މަސައްކަތް ކުރިއަށް ދާނީ އަންނަ މަހުގެ 11 ވަނަ ދުވަހުގެ ނިޔަލަށެވެ.

ރޯަދަ ހަދިޔާގެ ގޮތުގައި ސަރުކާރުން ނިންމާފައިވަނީ ކޮންމެ ގޭބިސީއަކަށް 48 ދަޅުގެ މަސްދަޅު ކޭހެއް ހަދިޔާ ކުރުމަށެވެ.