ޓްރާންސްފާ ސިޔާސަތާމެދު ހިތްހަމަނުޖެހި، ދުނިޔޭގެ އެންމެ މޮޅު އެއް ފުޓުބޯޅަ ކުޅުންތެރިޔާ، ކްރިސްޓިއާނޯ ރޮނާލްޑޯ އަލް-ނަޞްރަށް ކުޅެން ދެކޮޅުހަދައިފިއެވެ.
ސައުދީ ޕްރޯ ލީގުގައި އެންމެ ފަހުން އަލް-ރިޔާޟާ ދެކޮޅަށް އަލް-ނަޞްރު ކުޅުނު މެޗުގައި ކްރިސްޓިއާނޯ ރޮނާލްޑޯ ފެނިފައެއް ނުވެއެވެ. މިކަމާއި ގުޅިގެން އެތައް ބައެއްގެ ސުވާލުތައްވެސް ވަނީ އަލް-ނަސްރާއި އަމާޒުވެފައެވެ. މިކަމާއި ގުޅިގެން ބައިނަލްއަޤްވާމީ އިތުބާރު ހުރި ޚަބަރު ފަތުރާ ވަސީލަތްތަކުން ހާމަކުރާގޮތުގައި، ރޮނާލްޑޯ މި މެދައް އައިސްފައިނުވަނީ އަނިޔާގެ ސަބަބުން ނުވަތަ ކޯޗުގެ ނިންމުމަކުންނެއް ނޫނެވެ. އޭނާ ސްކޮޑުގައި ހިމެނެން ދެކޮޅު ހެދީ، ކުޅުންތެރިން ޓްރާންސްފާ ކުރުމުގައި ކްލަބުގެ މެނޭޖްމަންޓުން ކަންކަން ކުރަމުންދާ ގޮތާމެދު ހިތްހަމަނުޖެހިގެންނެވެ.
ރޮނާލްޑޯގެ އެންމެ ބޮޑު ޝަކުވާއަކީ، ސައުދީ ޕަބްލިކް އިންވެސްޓްމަންޓް ފަންޑު ގެ އެހީތެރިކަން ލިބޭ އެހެން ކްލަބުތަކާ އަޅާބަލާއިރު، އަލް-ނަޞްރުގެ ޓީމު ވަރުގަދަކުރުމަށް ކުރާ އިންވެސްޓްމަންޓް ކުޑަވުން ކަމަށާއި، އަލް-ހިލާލް ފަދަ ވާދަވެރި ކްލަބުތަކުން ކަރީމް ބެންޒެމާ ފަދަ މަޝްހޫރު ތަރިން ގެނެސް ޓީމު ވަރުގަދަކުރަމުންދާއިރު، އަލް-ނަޞްރުން މި ސީޒަނުގައި ގެނެސްފައިވަނީ މަދު ކުޅުންތެރިންތަކެއް ކަމަށާއި، އޭގެ ތެރޭގައި އޭނާ އުންމީދުކުރި ފަދަ މަތީ ފަންތީގެ ކުޅުންތެރިން ނެތްކަން ރޮނާލްޑޯ ފާހަގަކުރާކަމަށް ނޫސްތަކުގައި ރިޕޯޓުކޮށްފައިވެއެވެ.
2023 ވަނަ އަހަރު ރޮނާލްޑޯ އަލް-ނަޞްރާ ގުޅުނު ފަހުން އޭނާއަކީ ސައުދީ ލީގުގެ އެންމެ މުހިންމު ސަޚްޞިއްޔަތެވެ. އެހެންކަމުން، އޭނާގެ މި ނިންމުމާއެކު މުޅި ލީގަށް ބޮޑު ސިހުމެއް ލިބިފައިވާއިރު، ކްލަބުތަކުގެ މެދުގައި އިންވެސްޓްމަންޓްތައް ހަމަހަމަކުރުމާ ބެހޭގޮތުންނާއި، ބޮޑެތި ކުޅުންތެރިން ކްލަބުގެ ނިންމުންތަކަށް ނުފޫޒު ފޯރުވާ މިންވަރާ ބެހޭގޮތުން ބޮޑެތި ބަހުސްތަކެއް ވަނީ އުފެދިފައެވެ.
ރޮނާލްޑޯގެ މި އަމަލަށް ބައެއް ފަރާތްތަކުން ދަނީ ފާޑުކިޔަމުންނެވެ. ކުރީގެ ބައެއް ކުޅުންތެރިން ބުނާ ގޮތުގައި، ދުނިޔޭގެ އެންމެ ބޮޑު އާމްދަނީއެއް ލިބޭ އެއް ތަރީގެ ހައިސިއްޔަތުން ރޮނާލްޑޯގެ މައިގަނޑު ޒިންމާއަކީ ކުޅުމާއި ޓީމަށް އެހީތެރިވުމެވެ. އަދި ފާޅުގައި ކްލަބަށް ޕްރެޝަރު ކުރުމަކީ އަމިއްލަ އެދުން އިސްކުރުން ކަމަށް އެފަރާތްތަކުން ސިފަކުރެއެވެ.
އަލް-ނަޞްރާއި އެކު ރޮނާލްޑޯ ވެފައިވާ ކޮންޓްރެކްޓް 2027 އާ ހަމައަށް ދެމިގެންދާނެއެވެ. އަދި މިވަގުތު ތާވަލުގެ ކުރީގައި އަލް-ނަސްރު އޮތްއިރު، މި ދެބަސްވުންތައް ހައްލުނުވާނަމަ، އޭނާގެ މުސްތަޤްބަލަށް ބޮޑެތި ބަދަލުތަކެއް އައުން އެކަށީގެންވާ ކަމަށާއި، އޭގެ ތެރޭގައި އެހެން ކްލަބަކަށް ބަދަލުވުން ވެސް ހިމެނޭ ކަމަށް ރިޕޯޓްތައް ބުނެއެވެ.
ކޮންމެއަކަސް، ރޮނާލްޑޯގެ މި އިހުތިޖާޖަކީ މިވަގުތު ދުނިޔޭގެ ފުޓްބޯޅައިގައި އެންމެ ގަދައަށް ދެކެވޭ އެއް ވާހަކައަށް ވެފައިވާއިރު، ދުނިޔޭގެ އެކި ކަންކޮޅުތަކުގެ ސަޕޯޓަރުންނާއި މީޑިއާތަކުން ދަނީ މިކަން ނިމޭނެ ގޮތަކަށް ވަރަށް ފަރުވާތެރިކަމާއެކު ބަލަމުންނެވެ.
Advertisement
This content is created and paid for by advertisers and does not involve Voice Journalists
