ރޯދަ ހަދިޔާގެ ގޮތުގައި ސަރުކާރުން ރައްޔިތުންނަށް ބަހާ މަސްދަޅު ކޭސްތައް ނެގުމުގެ ސުންގަޑި މިރޭ 23:00 އަށް ހަމަވާނެ ކަމަށް ސިޓީތަކާއި އިދާރާތައް ހިންގުމާއި އާންމު މަސައްކަތްތަކާ ބެހޭ ވުޒާރާއިން ބުނެފިއެވެ.
އެ ވުޒާރާއިން މައުލޫމާތުދޭ ގޮތުގައި، މާލެ، ވިލިމާލެ އަދި ހުޅުމާލެ ހިމެނޭހެން 15 ސަރަހައްދެއްގައި މަސްދަޅު ކޭސް ދޫކުރުމުގެ އިންތިޒާމު ހަމަޖައްސާފައި ވެއެވެ. އަދި ރޭގެ ނިޔަލަށް މާލޭ ސަރަޙައްދުގެ 43،923 ގޭބިސީއަކަށް މަސްދަޅު ކޭސް ވަނީ ދޫކޮށްފައެވެ.
މީގެ އިތުރުން، އަތޮޅުތެރޭގެ ރަށްތަކަށްވެސް ބެހުމަށް ފޮނުވަންޖެހޭ ހުރިހާ މަސްދަޅު ކޭސްތަކެއް މިހާރު ފޮނުވާ ނިންމާފައިވާ ކަމަށާއި، މަދު ރަށެއްގައި ފިޔަވައި ރާއްޖޭގެ ހުރިހާ ރަށެއްގެ ގޭބިސީތަކަށް މިހާރު މަސްދަޅު ކޭސްތައް ހަވާލުކުރެވިފައިވާ ކަމަށްވެސް މިނިސްޓްރީއިން މައުލޫމާތުދީފައިވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން، ރޯދަ މަހުގެ ހަދިޔާގެ ގޮތުގައި ކޮންމެ ގޭބިސީއަކަށް މަސްދަޅު ކޭހެއް ދިނުމަށް ސަރުކާރުން ނިންމެވި މި މަޝްރޫޢުގެ ދަށުން، މާލޭ ސަރަޙައްދުގައި މަސްދަޅު ބަހަން ފަށާފައިވަނީ ޖަނަވަރީ މަހުގެ 24 ވަނަ ދުވަހުއެވެ.
Advertisement
This content is created and paid for by advertisers and does not involve Voice Journalists
