ފާއިތުވި ޖަނަވަރީ މަހުގެ ފަހު 3 ހަފްތާގައި އެކަނިވެސް ބޭރަށްހިންގުމުގެ 5،500 އަށްވުރެ ގިނަ ކޭސް ރިޕޯޓްކޮށްފައިވާކަމަށް އެޗްޕީއޭއިން ބުނެފިއެވެ.

މިދިޔަ ޖަނަވަރީ މަހުގެ 11 އިން ފެށިގެން 31 ގެ ނިޔަލަށް ބަލިތައް ޖެހިގެން ރިޕޯޓްކުރި އަދަދު ހާމަކޮށް އެޗްޕީއޭއިން ނެރުނު ތަފާސްހިސާބުގައިވާގޮތުން، އެ މުއްދަތުގައި ބޭރަށް ހިންގުމުގެ 5621 ކޭސް ރިޕޯޓްކޮށްފައިވެއެވެ. 

އަދި އެ މުއްދަތުގައި، 21،993 އަރިދަފުސްރޯގާގެ ކޭސް ރިޕޯޓްކޮށްފައިވާއިރު، ޑެންގީ ހުމުގެ 359 ކޭސް ވަނީ ރިޕޯޓްކޮށްފައެވެ. 

ބޭރަށް ހިންގުން މިދުވަސްވަރު އިތުރުވަމުންދާއިރު، އެބަލިން ރައްކާތެރިވުމަޢް، ތިމާ ބޯ ފެނަކީ، ސާފު ބޯފެންތޯ ޔަގީން ކުރުމަށް ޑޮކްޓަރުން އިރުޝާދު ދެއްވައެވެ. އެގޮތުން، ކެއްކުމަށްފަހު، ފިނި ކޮށްފައި ހުންނަ ފެނާއި، ފިލްޓަރ ކޮށްފައި ހުންނަ ފެނަކީ ރައްކާތެރި ފެން ކަން ޑޮކްޓަރުން ފާހަގަކުރެއެވެ.

އަދި މީގެ އިތުރުން، އަތް ރަނގަޅަށް ސާފުކޮށް ދޮވުމާއި، ތިމާގެ އަމިއްލަ ހަށިގަނޑުވެސް ސާފުތާހިރު ކަންމަތީ ބެހެއްޓުމަކީ ބަލިން ރައްކާތެރިވުމަށް އެޅިދާނެ ފިޔަވަޅެކެވެ. 

ބޭރަށް ހިންގުމަކީ އޭގެ ޒާތުގައި މާ ސީރިއަސް ބައްޔަކަށް ނުވި ނަމަވެސް، އެކަށީގެންވާ ފަރުވާ ނުދެވިއްޖެނަމަ ނުރައްކާ ހާލަތަކަށް ބަދަލުވެގެންދާ ބައްޔެކެވެ.

ޚާއްސަކޮށް ކުޑަކުދިން ބޭރަށް ހިންގާނަމަ ޑީހައިޑްރޭޓްވެ، ހަށިގަނޑުން ފެން ހުސްވުމުގެ މިންވަރު އަވަސްވެއެވެ. އެހެންކަމުން ކުޑަކުއްޖަކު ބޭރަށް ހިންގާތާ 24 ގަޑިއިރުވާއިރުވެސް ބަލި ރަނގަޅު ނުވެއްޖެނަމަ، ވީ އެންމެ އަވަހަކަށް ޑޮކްޓަރުގެ އެހީ ހޯދުމަށް އެޗްޕީއޭއިން އިލްތިމާސްކުރެއެވެ. 

ހަކުރުނާޅާ، އަލި ކުލައިގެ ބުއިންތައް ބޭނުންކުރުން

ބޮޑުކަމުދާ ކޮންމެ ފަހަރަކު ގިނައިން ދިޔާތަކެތި ބޭނުންކުރުން. (މަދުވެގެން 1 ޖޯޑު)

މައިގަނޑު ކެއުން ކާ ގަޑިތަކުގެ ދެމެދަށް އޮންނަ ގަޑިތަކުގައި ދިޔާތަކެތި ބޭނުންކުރުން

ޕޮޓޭސިއަމްއިން މުއްސަނދިވެފައިވާ ބާވަތްތައް ބޭނުންކުރުން. (މިސާލު: ތޮށި ނޮޅާފައި ހުންނަ އަލުވި، ދޮންކެޔޮ)

ލޮނު އެކުލެވޭ ބުއިންތައް ބޭނުންކުރުން

ކްރީމް ހުންނަ ކާބޯތަކެއްޗާ، ތެލުލި އެއްޗިއްސާ، ހަކުރުއެޅީ ކާބޯތަކެއްޗާ ދުރުވުން

ބަނޑުހަރުކުރަން އެހީވެދޭ ބަތާ، އޯޓްމީލް ފަދަ ކާބޯތަކެތި އިހުތިޔާރު ކުރުން

ޝުގާ-ފްރީ ޖަހާފައި ހުންނަ ޗުއިންގް-ގަމް، ބްރެތްފްރެޝް މިންޓްސް ބޭނުން ނުކުރުން

ކެފޭން ބޭނުންކުރުން މަދުކުރުން

ތުއްތު ދަރިފުޅަށް 6 މަސްވަންދެން ގާތުން ދޭ ކިރު ފިޔަވާ އިތުރު އެއްޗެއް ނުދިނުން