ހދ.ކުޅުދުއްފުށި ރީޖަނަލް ހޮސްޕިޓަލުގައި އޮތް ބަލިމީހަކަށް ލޭ ނުލިބިގެން އުޅުނު މައްސަލަ އެންމެފަހުން ހައްލުވެއްޖެއެވެ.

ޑެންގޫ ޖެހިގެން ހޮސްޕިޓަލްގައި އޮތް ހދ.ނޮޅިވަރަންފަރަށް ނިސްބަތްވާ މީހަކަށް ލޭ ބޭނުންވެގެން ރޭ ވަނީ އާއްމުންގެ އެހީތެރިކަމަށް އެދިފައެވެ. ބަލިމީހާއަށް ބޭނުންވީ އޭބީ ނެގެޓިވް ލޭ ހުންނަ 4 ޑޯނަރުންނެވެ. ކުޅުދުއްފުއްޓާއި ކައިރި ރަށްރަށުން ލޭ ނުލިބިގެން އެންމެފަހުން ބަލިމީހާގެ އާއިލާއިން ވަނީ ލޭ ހޯދުމަށް އާއްމުންގެ އެހީތެރިކަމަށް އެދިފައެވެ.

ވޮއިސްއާ މައުލޫމާތު ހިއްސާކުރަމުން ބަލިމީހާގެ އާއިލާގެ ފަރާތުން ލޭ ހޯދުމުގައި އިސްކޮށް އުޅުނު މީހަކު ބުނީ، އާއްމުންގެ އެހީތެރިކަމަށް އެދެން ޖެހުނީ އާއިލާއިން ލޭ ހޯދަން ކުރި މަސައްކަތުން އެއްވެސް ކޮޅެއްގައި ނުޖެހުމުން ހަދާނެގޮތް ހުސްވެގެން ކަމަށެވެ. އެގޮތުން މާލެ ސަރަހައްދުގައި އޭބީ ނެގެޓިވް ލޭ ހަދިޔާކުރެވޭ ހާލަތުގައި ހުރި މީހެއްނަމަ ޓިކެޓް ދީގެންވެސް ގެނައުމަށް ނިންމީ އެހެންވެގެންކަމަށް އޭނާ ބުންޏެވެ.

ލޭ ހޯދުމަށް ކުރެވުނު މަސައްކަތުން މާލެ ސަރަހައްދުގައި ހުރި އެމްއެންޑީއެފްގައި މަސައްކަތްކުރާ މީހަކު ވަނީ އެންމެފަހުން ކުޅުދުއްފުއްޓަށްވެސް ގެނެސްފައެވެ.

އޭނާ ބުނީ ލޭ ހޯދުމަށް ކުރި މަސައްކަތުން ހޮސްޕިޓަލުގައި މަސައްކަތްކުރާ ޑޯނަރަކުވެސް ހަމަޖެހުނުކަމަށެވެ. ލޭ ހޯދުމަށް ކުރި މަސައްކަތުން ރ އިން ފެށިގެން ހއ އަތޮޅާ ހިސާބަށް މަސައްކަތް ކުރެވުނުކަން އޭނާ ވަނީ ބުނެފައެވެ. ބަލިމީހާގެ ހާލަތަށް މިހާރު ކުރިއެރުން ލިބެމުން އަންނަކަންވެސް އޭނާ ފާހަގަކުރިއެވެ.

މިދުވަސްވަރަކީ ލޭ ލިބުން ދަތި ދުވަސްވަރެކެވެ. ލޭ ލިބުން ދަތިވުމުން ބްލަޑް ސާވިސްއިން ވަނީ އާއްމުންގެ އެހީތެރިކަމަށްވެސް އެދިފައެވެ. ލޭލިބުން ދަތިވުމުން ސަރުކާރު ހިއްސާވާ ގިނަ ކުންފުނިތަކާއި އަމިއްލަ ކުންފުނިތަކުންވެސް ވަނީ ލޭ ހަދިޔާކުރުމުގެ މަސައްކަތް ފަށާފައެވެ.

ރައްޖޭގައި ލިބުން އެންމެ ދަތިކަމަށް ފާހަގަކުރެވޭ ލޭގެ ގްރޫއްޕަކީ އޯ ނެގެޓިވް އެވެ. އެމްބީއެސްއިން ވަނީ 6 ބާވަތެއްގެ ލޭ ހަދިޔާކުރުމަށް އެދި އާއްމުންގެ އެހީއަށްވެސް އެދިފައެވެ. ބޭނުންވާ ލޭގެ ބާވަތްތަކުގެ ތެރޭގައި، އޭ ޕޮޒިޓިވްއޯ އާއި އޯ ޕޮޒިޓިވް ލެޔާއި ބީ ނެގެޓިވާއި ބީ ޕޮޒިޓިވް ލޭގެ އިތުރުން އޭބީ ޕޮޒިޓިވް ލެޔާއި އޭބީ ނެގެޓިވް ލޭ ހިމެނެއެވެ.