ރަމަޟާން މަހުގެ މަތިވެރިކަމާއި ޙުރުމަތް ހިފެހެއްޓުމުގެ ގޮތުން، މީހުން ދިރިއުޅޭ ރަށްރަށުގައި ހުންނަ ރެސްޓޯރެންޓު ފަދަ ތަންތަނުން އާންމުންގެ ކުރިމަތީގައި ފަތުރުވެރިންނަށް ކެއިންބުއިމުގެ ޚިދުމަތް ދިނުމަކީ ހުއްދަ ކަމެއް ނޫން ކަމަށް މިއަދުގެ ހުކުރު ޚުޠުބާގައި ބުނެފިއެވެ.
"ރުއްސެވުމާ ފުއްސެވުމުގެ މަހަށް މަރުޙަބާ" މި މައުޟޫޢަށް މިއަދު އިއްވި ޚުޠުބާގައި ބުނީ، ރަމަޟާން މަހަކީ ހެޔޮކަމާއި ބަރަކާތާއި ފާފަ ފުއްސެވުމުގެ މޫސުމެއް ކަމަށާއި، މުސްލިމު މުޖުތަމަޢުތަކުގައި އެ މަހުގެ މަތިވެރިކަން ދަމަހައްޓަން ޖެހޭނެ ކަމަށެވެ. ވަކީން ޚާއްޞަކޮށް މީހުން ދިރިއުޅޭ ރަށްތަކުގައި ފަތުރުވެރިންނަށް ޚިދުމަތްދޭ ފަރާތްތަކުން މިކަމަށް ބޮޑު ސަމާލުކަމެއް ދޭންޖެހޭނެ ކަމަށް ޚުޠުބާގައި ބުންޏެވެ.
ހާމަކަން ބޮޑު ގޮތުގައި ރޯދަމަހުގެ ދުވާލު، މީހުން ދިރިއުޅޭ ރަށްތަކުގައި ރެސްޓޯރެންޓު ފަދަ ތަންތަން ހުޅުވައިގެން އާންމުންގެ ކުރިމަތީގައި ކެއިންބުއިމުގެ ޚިދުމަތްދިނުމަކީ ހުއްދަވާނޭކަމެއްނޫނެވެ. މީހުން ދިރިއުޅޭ ރަށްރަށުގައި މިފަދަ ޚިދުމަތެއް ފަތުރުވެރީންނަށް ފޯރުކޮށްދޭ ފަރާތްތަކުން އެ ޚިދުމަތެއް ފޯރުކޮށްދިނުމަށް ޓަކައި ޚާއްޞަ އިންތިޒާމުތަކެއް ހަމަޖެއްސިދާނެއެވެ. ޝަރުޢީ ޢުޒުރަކާ ހުރެ ރޯދަ ދޫކޮށްލާ ޢުޒުރުވެރީން ވެސް ރޯދަމަހުގެ ޙުރުމަތް ދަމަހައްޓާންވާނެއެވެ.
ޚުތުބާ
ރޯދައިގެ ޝަރުޢީ މާނައަށް އަލިއަޅުއްވާލަމުން ޚުޠުބާގައި ބުނީ، ރޯދައަކީ ފަޖުރުލީއްސުރެ އިރު އޮއްސިއްޖައުމަށް ދާންދެން ކެއިންބުއިމާއި ރޯދަ ގެއްލޭ އެންމެހައި ކަންކަމުން ދުރުހެލިވެ ހުރުން ކަމަށެވެ. އަދި ހަމައެކަނި ނުކައި ނުބޮއި ހުރުމުގެ ބަދަލުގައި، ދޮގުހެދުމާއި އުރެދުމުގެ ޢަމަލުތަކުން ދުލާއި ގުނަވަންތައް ރައްކާތެރިކުރަން ޖެހޭނެ ކަމަށާއި، އެހެން ނޫންނަމަ ރޯދައިގެ ފުރިހަމަ ސަވާބުން މަޙުރޫމުވެދާނެ ކަމުގެ އިންޒާރުވެސް ޚުޠުބާގައި ދީފައިވެއެވެ.
ކުރިއަށް އޮތީ ބަރަކާތްތެރި ރަމަޟާން މަސް ކަމަށްވާތީ، ރޯދައާ ގުޅޭ މުހިންމު ޙުކުމްތަކެއްވެސް މިއަދުގެ ޚުޠުބާގައި އޮޅުންފިލުވައިދީފައިވެއެވެ.
އޭގެ ތެރޭގައި ހިމެނެނީ:
ދަތުރުވެރިންނާއި ބަލިމީހުންނަށް ރޯދަ ދޫކޮށްލުމުގެ އިޚުތިޔާރު އޮތް ނަމަވެސް، ފަހުން ޤަޟާކުރަން ޖެހޭނެކަން.
ދާއިމީ ބަލިމީހުންނާއި މުސްކުޅިބަލީގެ ސަބަބުން ރޯދަ ނުހިފޭ މީހުން ކޮންމެ ދުވަހަކަށް މިސްކީނަކަށް ކާންދޭން ޖެހޭނެކަން.
ހަށިގަނޑަށް ހަކަތަ ލިއްބައިދޭ އިންޖެކްޝަން ޖެހުމާއި ޑަޔަލިސިސް ހެދުމުން ރޯދަ ގެއްލޭނެކަން.
ޝަރުޢީ ޢުޒުރަކާ ނުލައި ގަސްތުގައި ރޯދަ ދޫކޮށްލުމަކީ ބޮޑު ފާފައެއް ކަމަށާއި، އެކަމަށް އޮތް ކައްފާރާއަކީ ވިދިވިދިގެން ދެ މަސް ދުވަހު ރޯދަ ހިފުން ނުވަތަ ފަސްދޮޅަސް މިސްކީނުންނަށް ކާންދިނުން ކަމަށް ޚުތުބާގައި ބުނެފައިވެއެވެ.
މީގެ އިތުރުން، ރަމަޟާން މަހުގެ ވަގުތުތައް ކުޅިވަރާއި މަޖަލުގައި ހޭދަނުކޮށް، ތަރާވީޙު ނަމާދާއި ރޭއަޅުކަމުގައި ހީވާގިވުމަށް ޚުތުބާގައި ވަނީ ނަޞޭޙަތްތެރިވެފައެވެ. އަދި ގޭތެރޭގެ މަސައްކަތްތަކުގައި އެކަކު އަނެކަކަށް އެހީތެރިވެ، އޯގާވެރިކަން އިސްކުރުމަށްވެސް ޚުތުބާގައި އެދިފައިވެއެވެ.
Advertisement
This content is created and paid for by advertisers and does not involve Voice Journalists
