ށ. މިލަންދޫ ސަހަރާގެ ވަށައިގެން ދާއިމީ ބައްތި ހަރުކުރުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އިން ކާމިޔާބުކަމާއެކު ނިންމާލައިފިއެވެ.

އާރްޑީސީން ބުނި ގޮތުގައި މި މަސައްކަތަކީ އެ ކޯޕަރޭޝަނުގެ އިޖްތިމާޢީ ޒިންމާ (ސީ.އެސް.އާރް) ގެ ދަށުން އެ ރަށުގެ ރައްޔިތުންނަށް ފޯރުކޮށްދިން އެހީތެރިކަމެކެވެ. މި މަޝްރޫޢުގެ ދަށުން މިލަންދޫ ސަހަރާގެ ވަށައިގެން ކުރަމުންދިޔަ ދާއިމީ ބައްތި ހަރުކުރުމުގެ ހުރިހާ މަސައްކަތެއް މިހާރު ވަނީ އެއްކޮށް ނިމިފައެވެ.

މި މަސައްކަތް ނިމުމާ ގުޅިގެން، ރޭގަނޑު ވަގުތުތަކުގައި ސަހަރާ ސަރަޙައްދު އަލިވެ، އެ ތަނުގެ ބޭނުންކުރާ ފަރާތްތަކަށް ބޮޑެތި ފަސޭހަތަކެއް ލިބިގެންދާނެއެވެ. ޚާއްޞަކޮށް ރޭގަނޑު ވަގުތުތަކުގައި ދިމާވާ ދަތިތަކަށް މިކަމުގެ ސަބަބުން ޙައްލެއް ލިބިގެންދާނެއެވެ.

އާރްޑީސީން އަންނަނީ ރަށްރަށުގެ ތަރައްޤީއަށް ކުރިއަށްގެންދާ މަޝްރޫޢުތަކުގެ އިތުރުން، މިފަދަ އިޖްތިމާޢީ ކަންކަމުގައި އަތޮޅުތެރޭގެ އެކި ރަށްރަށަށް އެހީތެރިކަން ފޯރުކޮށްދެމުންނެވެ. އެގޮތުން، ރާއްޖޭގެ ހުރިހާ ހިސާބެއްގައިވެސް މިފަދަ މަސައްކަތްތައް އާރްޑީސީއިން އަންނަނީ ކުރަމުންނެވެ.