ކުރިއަށް އޮތް ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިޚާބުގެ ކެމްޕޭނަށް ރާއްޖޭގެ އެކި ރަށްތަކަށް ކުރަމުންދާ ދަތުރުތަކުން ފެންނަނީ ރައްޔިތުން ތިލަފަތަށް ވޯޓު އަޅާ މަންޒަރު ކަމަށް އިދިކޮޅު އެމްޑީޕީގެ ކުރީގެ ޗެއާޕާސަން ފައްޔާޒު އިސްމާޢިލް ވިދާޅުވެއްޖެއެވެ.

ފައްޔާޒު މިހެން ވިދާޅުވީ އެމްޑީޕީން މިހާރު ކުރިއަށްގެންދާ ކެމްޕޭން ދަތުރުތަކާ ގުޅޭގޮތުން އެކްސްގައި ކުރެއްވި ޕޯސްޓެއްގައެވެ.

މި ދަތުރުތަކުގެ ތެރެއިން އިއްޔެ ރ. އަތޮޅުގެ ބައެއް ރަށްތަކަށް ކުރެއްވި ޒިޔާރަތަށްފަހު ފައްޔާޒު ވަނީ، ރ. ވާދޫ، މާކުރަތު، ދުވާފަރު، ފައިނު، މީދޫ އަދި މަޑުއްވަރީގެ އެމްޑީޕީ މެންބަރުން ކިޔާފައިވާ މަރުހަބާ އާއި ބެހެއްޓެވި ގާތްކަމަށްޓަކައި ޝުކުރު އަދާކުރައްވާފައެވެ.

މިއާއެކު ފައްޔާޒު ވިދާޅުވީ، ރަށްރަށުގެ އިހުތިސާސް ވަކިކޮށް، އެފަދަ ސަރަހައްދުތަކުން ސީދާ ކައުންސިލަށް ނަފާ ހޯދުމަށް މަގުފަހިވުމަކީ ކައުންސިލްތަކަށް މާލީ މިނިވަންކަން ލިބިގެންދިޔަ ކަމެއް ކަމަށެވެ.

އަދި އެމްޑީޕީގެ ކެންޑިޑޭޓުން އިންތިޚާބުގައި ވާދަކުރަނީ އެފަދަ ހަރުދަނާ ތަސައްވުރަކާއެކު ކަމަށްވެސް އޭނާ ފާހަގަކުރެއްވިއެވެ.

"ރާއްޖޭގެ އެކި ކަންކޮޅުތަކުން ވެސް ފެންނަމުންދަނީ ތިލަފަތަށް ރައްޔިތުން ވޯޓު އަޅާ މަންޒަރު،" ފައްޔާޒު ވިދާޅުވިއެވެ.

ރ. އަތޮޅުގެ ދަތުރުތައް ނިންމަވާލެއްވުމަށްފަހު، އެމްޑީޕީގެ ކެމްޕޭން ޓީމުން މިއަދު ވަނީ ބ. އަތޮޅަށް ފުރާފައެވެ.