ޖަރުމަނުގެ މިއުނިކްގައި ކުރިއަށްދާ ސަލާމަތީ ކޮންފަރެންސާ ދިމާކޮށް، އީރާނުގެ ސަރުކާރާ ދެކޮޅަށް ބޭއްވި ބޮޑު މުޒާހަރާއެއްގައި ދެލައްކައަށްވުރެ ގިނަ މީހުން ބައިވެރިވެއްޖެއެވެ.

ފުލުހުންގެ ހިސާބުތަކުން ދައްކާގޮތުގައި ހޮނިހިރު ދުވަހު ބޭއްވި މި މުޒާހަރާގައި ގާތްގަނޑަކަށް 250،000 މީހުން ބައިވެރިވެފައިވެއެވެ. މިއީ އިންތިޒާމުކުރި ފަރާތްތަކުން އުންމީދުކުރި އަދަދަށްވުރެ ދެގުނަ އިތުރު އަދަދެކެވެ.

މި މުޒާހަރާ ބާއްވާފައިވަނީ މިއުނިކްގެ މަޝްހޫރު "ތެރޭސިއަންވީސޭ" މައިދާނުގައެވެ. މިއީ ދުނިޔޭގެ އެކި ކަންކޮޅުތަކުން ސިޔާސީ އަދި އަސްކަރީ އިސްވެރިން ބައިވެރިވާ "މިއުނިކް ސެކިއުރިޓީ ކޮންފަރެންސް" ހިނގަމުންދާ ތަނާ ތިން ކިލޯމީޓަރު ކައިރީގައި އޮންނަ ސަރަހައްދެކެވެ. މުޒާހަރާގެ ބައިވެރިން ވަނީ އީރާނުގެ ވެރިކަމާ ދެކޮޅަށް އަޑުއުފުލައި، މިދިޔަ ޖެނުއަރީ މަހު އީރާނުގައި ކުރި މުޒާހަރާތައް ބާރުގެ ބޭނުންކޮށްގެން ހުއްޓުވި ހުއްޓުވުން ކުށްވެރިކޮށްފައެވެ.

މުޒާހަރާގެ ބައިވެރިންގެ ތެރެއިން ގިނަ ބަޔަކު ވަނީ 1979 ވަނަ އަހަރުގެ އިންގިލާބުގެ ކުރިން އީރާނުގައި ބޭނުންކުރި ރަސްކަމުގެ ދިދަ އުފުލާފައެވެ. މި މުޒާހަރާގައި އީރާނުގެ ކުރީގެ ޝާހުގެ ދަރިކަލުން ރިޒާ ޕަހްލަވީ ބައިވެރިވެވަޑައިގެން އާންމުންނާ މުޚާތަބު ކުރެއްވިއެވެ. އޭނާ ވިދާޅުވީ އީރާނަށް ޑިމޮކްރެޓިކް މުސްތަގުބަލެއް ހޯދައިދިނުމަށް ބޭނުންފުޅުވާ ކަމަށާއި، ބައިނަލްއަގުވާމީ މުޖުތަމައުން ދައްކަމުންދާ އެއްބައިވަންތަކަމަށް ޝުކުރު އަދާކުރައްވާ ކަމަށެވެ.

ޕަހްލަވީ އިތުރަށް ވިދާޅުވީ، އީރާނުގެ ސަރުކާރާއެކު ބާއްވާ މަޝްވަރާތަކަކީ އެ ގައުމުގެ ސަރުކާރުން ވަގުތު ހޯދުމަށް ކުރާ ކަމެއް ކަމަށާއި، އެމެރިކާގެ ރައީސް ޑޮނަލްޑް ޓްރަމްޕް އީރާނުގެ ރައްޔިތުންނަށް އެހީތެރިކަން ފޯރުކޮށްދެއްވުމަށް ވެވަޑައިގެންފައިވާ ވައުދު ފުއްދަވާނެ ކަމަށް އުންމީދުކުރައްވާ ކަމަށެވެ.

އިންސާނީ ހައްގުތަކަށް މަސައްކަތްކުރާ ޖަމާއަތްތަކުން ލަފާކުރާ ގޮތުގައި، އީރާނުގެ ސަރުކާރާ ދެކޮޅަށް ކުރި މުޒާހަރާތަކުގައި މިހާތަނަށް 7،000 އަށްވުރެ ގިނަ މީހުން ވަނީ މަރުވެފައެވެ. މީގެ ތެރޭގައި 150 އަށްވުރެ ގިނަ ކުޑަކުދިން ހިމެނެއެވެ. މި މުޒާހަރާތައް ކުރަމުންދަނީ އީރާނުގައި ތަކެތީގެ އަގުތައް އުފުލި އާއްމުންނަށް ދަތިތަކާ ކުރިމަތިވަމުންދާތީކަމަށް ރިޕޯޓްތައް ބުނެއެވެ.  

މިއުނިކްގެ އިތުރުން ކެނެޑާގެ ޓޮރޮންޓޯ އަދި އެމެރިކާގެ ލޮސް އެންޖެލިސްގައިވެސް އީރާނުގެ ރައްޔިތުންނަށް ތާއީދުކޮށް މުޒާހަރާތައް ބާއްވާފައިވެއެވެ.

އީރާނުގެ ނިއުކްލިއަރ މައްސަލައިގައި އެމެރިކާއާއެކު ބާއްވާ މަޝްވަރާތައް މިހާރު އޮމާންގައި ކުރިއަށްދާއިރު، އެމެރިކާގެ ރައީސް ޓްރަމްޕް ވަނީ އީރާނުގެ ސަރުކާރު ބަދަލުވުމަކީ އެންމެ ރަނގަޅު ގޮތް ކަމަށް ވިދާޅުވެފައެވެ. ނަމަވެސް، އީރާނުން އެމެރިކާގެ ޝަރުތުތަކަށް އެއްބަސްވެއްޖެނަމަ ހަމަލާ ދިނުމަކާ ނުލައި މައްސަލަ ހައްލުކުރެވިދާނެ ކަމުގެ އިޝާރާތެއްވެސް އޭނާ ވަނީ ދެއްވާފައެވެ.