ސައުދީ ޕްރޯ ލީގުގައި ރޭ ކުޅުނު މެޗުގައި އަލް-ޙަޒަމްގެ މައްޗަށް 4-0 ގެ ނަތީޖާއަކުން ކުރިހޯދައި، އަލް-ނަޞްރުން ތާވަލުގެ އެއްވަނަ މަގާމަށް ޖެހިލައިފިއެވެ. 

މި މޮޅާއެކު އަލް ނަސްރު ތާވަލުގެ އެއްވަނައިގައި އޮތީ ކުޅުނު 22 މެޗުން ލިބުނު 55 ޕޮއިންޓާއެކުއެވެ. އެޓީމާ ޖެހިގެން ތާވަލުގެ ދެވަނައިގައި އަލް ހިލާލް އޮތީ 54 ޕޮއިންޓާއެކުއެވެ.

މި މެޗު ފެށުނީއްސުރެ އަލް-ނަޞްރުން ވަނީ ކުޅުން ކޮންޓްރޯލްކޮށް، ގިނަ ފުރުސަތުތަކެއް ތަނަވަސްކޮށްފައެވެ. އަދި މި މެޗުގައި ކްރިސްޓިއާނޯ ރޮނާލްޑޯ ވަނީ އެ ޓީމަށް 2 ލަނޑު ވެސް ކާމިޔާބުކޮށްދީފައެވެ.

މެޗުގެ ފުރަތަމަ ލަނޑު ރޮނާލްޑޯ ކާމިޔާބުކޮށްފައިވަނީ 13 ވަނަ މިނެޓުގައެވެ. އެއަށްފަހު މެޗުގެ 28 ވަނަ މިނެޓުގައި ޓަލިސްކާ ވަނީ ޕެނަލްޓީ އޭރިއާގެ ބޭރުން ފޮނުވާލި ހަމަލާއަކުން އަލް-ނަސްރުގެ ލީޑު ފުޅާކޮށްދީފައެވެ. އޭގެ ފަހުން، މެޗުގެ 79 ވަނަ މިނެޓުގައި އިދިކޮޅު ޓީމުގެ ދިފާއީ ބައިން ހެދި ގޯހެއްގެ ފައިދާ ނަގައި، ރޮނާލްޑޯ ވަނީ ބާރުގަދަ ހަމަލާއަކުން ޓީމުގެ ތިންވަނަ ލަނޑު ކާމިޔާބުކޮށްދީފައެވެ. އަލް-ނަސްރުގެ ހަތަރުވަނަ ލަނޑު މެޗުގެ 86 ވަނަ މިނެޓުގައި ކާމިޔާބުކޮށްދިނީ އެންޑަސަން ޓަލިސްކާ އެވެ. 

ރޮނާލްޑޯގެ މި ލަނޑުތަކާއިއެކު އޭނާ ވަނީ އަމިއްލަ ރެކޯޑެއްވެސް އައުކޮށްފައެވެ. އެގޮތުން، އުމުރުން 30 އަހަރު ފުރުނު ފަހުން އޭނާ މިހާތަނަށް ކާމިޔާބުކުރި ލަނޑުގެ އަދަދު މިހާރު މިވަނީ 500 އަށްވުރެ މައްޗަށް އަރާފައެވެ. މިއީ މި ސީޒަނުގައި އޭނާ ޖެހި 19 ވަނަ ލަނޑެވެ. އެއާއިއެކު ރޮނާލްޑޯގެ ކެރިއަރުގައި ޖެހި ލަނޑުތަކުގެ އަދަދު ވަނީ 964 އަށް އަރާފައެވެ.